Katolski Posoł – 20. julija 2025
Přeco spěšnišo, přeco wjace – wšědny dźeń honi za eficiencu. Tola što, hdyž so runje w tym zmysł žiwjenja zhubi, praša so awtor zawodneho nastawka.
Vatikan je drje wot 2021 do 2024 trajacu swětowu synodu zakónčił. Tola pod bamžom Lejom XIV. přeńdźe wona do noweje fazy. Za to je Vatikan plan wozjewił.
Katolscy biskopja w Němskej připowědźuja zalutowanja. Jich generalna sekretarka wuzběhny, zo njebudu hižo wšo dale spěchować, „štož je bjezdwěla wažne a so ewangelijej wotpowědnje podpěrać měło“.
Kniha je „Chronika“ a zdobom inwentar za wulki dźěl hornjołužiskeho Serbstwa. Takle mjenuje recensent njedawno wušłu ediciju wo Chrósćicach.
Swjaty wótc wupraji so za to, starych ludźi sylnišo w towaršnosći zapřijeć. Wón skedźbni pak w tym zwisku tež na hinašu generaciju.
Poprawom zwjazuja nimale wšitcy město na Sicilskej ze złóstnistwowej organizaciju. Awtor přinoška pak je něšto našoł, wo čimž móhł wottam w nabožnym časopisu rozprawjeć – a to samo w zwisku z kulowatej róčnicu.
Za pasionske předstajenja w septembru na farskej łuce w Chrósćicach móža sej zajimcy wotnětka zastupne lisćiki kupić – tuchwilu pak jeničce online. Tež do předstajenja budu je při kasy předawać.
Serbska dekanatna młodźina je na wulět přeprošena, kotryž budźe njedźelu, 24. awgusta. Planowane je z busom do Deška pola Rózborka jěć a wottam po Nysy čołmikować.
Na wuměnu z pólskimi młodostnymi a dźěłarničku ikonografije přeprošuje Budyski Serbski muzej młodostnych. Ta budźe wot pjatka do soboty, 19. do 20. septembra, w „Domje Gerharta Hauptmanna“ w Jelenjej Górje a je za młodostnych darmotna.
Wšitcy wěriwi su sobotu, 23. awgusta, na zhromadny dźeń Budyskeho dekanata pod hesłom „Marija – znamjo nadźije“ do Róžanta přeprošeni. Liturgiske zahajenje budźe w 15.00 hodź. z wustajenjom Najswjećišeho w putniskej cyrkwi. Hižo wot 14.00 hodź. poskića wosady kofej, jeli to same organizuja. Štóž chce, móže piknikować. Wot 16.00 do 18.00 hodź. změja zamołwići pisany program wokoło cyrkwje spřihotowany. Dekanatny dźeń zakónči so z Božej mšu we 18.00 hodź. w Róžeńčanskej swjatnicy. Tón dźeń předwječorne kemše w serbskich wosadach njebudu.
Lětuši Gig-festiwal je wot pjatka do njedźele, 15. do 17. awgusta, w Róžeńće planowany. Program kaž tež přehlad wobdźělnikow stej na internetowej stronje festiwala wozjewjenej.
Serbska protyka
