Katolski Posoł – 24. awgusta 2025
Wo wuprajenju filozofa Heraklita rozmysluje serbski duchowny w swojim zawodnym nastawku. Mjez druhim wón wuwjedźe, što ma te ze čłowječim žiwjenjom činić a kotru rólu swjaty Pawoł hraje.
Na sto lět swojeho skutkowanja je Kulowske sportowe towarstwo DJK Módro-běli z.t. zhladowało. Róčnicu woswjećichu z wosadnym swjedźenjom. Hłowny celebrant swjedźenskeje Božeje mšě běše Zhorjelski biskop Wolfgang Ipolt.
Na dworje klóštra Marijineje hwězdy, w tamnišim Zežiwjenskim a zelowym centrumje kaž tež w Lipju knježeše třeću njedźelu w awgusće čiłe žiwjenje. Konwent cisterciensow, Miłočanski Křesćansko-socialny kubłanski skutk z.t. kaž tež Budyski wokrjes běchu tónraz hnydom na dwójny swjedźeń přeprosyli.
Něhdyša nawodnica Radworskeho katolskeho dźěćaceho domu „Alojs Andricki“ je mnohe lětdźesatki spomóžnje za dźěći, rěč a wěru skutkowała. Tele dny swjećeše wona kulowate narodniny.
Swoje 90. žiwjenske lěto je duchowny Kulowskeje wosady dokónčił. Najebać wysokeje staroby wón hišće prawidłownje měšniske słužby wukonja.
Mnozy zajimcy a wěriwi ze wšelakich kóncow Łužicy su so tež lětsa zaso w Hrubjelčicach k dworowemu swjedźenjej zhromadźili. Wjeršk tworješe wospjet ekumeniski nyšpor.
Bóh a wěra steještaj w srjedźišću nabožneho festiwala w Róžeńće. Nimo Božich słužbow a modlenja móžachu wopytowarjo tež workshopy wopytać a modernu křesćansku hudźbu słyšeć.
Skupina Serbow je sej na festiwal za młodych wěriwych w Bosniskej a Hercegowinje dojěła. Wo swojich dožiwjenjach pisa jedna z wobdźělnikow.
Na Nóc wotewrjenych cyrkwjow su wšitcy zajimcy do Wojerec přeprošeni. Wona budźe wot pjatka do soboty, 29. do 30. awgusta, do Sakskeje krajneje domchowanki srjedź septembra, kotraž so tónraz w měsće wotměje. Wotewrjene budu wšelake Bože domy we Wojerecach a wokolinje.
Wustajeńca z mólbami Marija Ošiki budźe znowa w Chróšćanskim gmejnskim zarjedźe přistupna, a to wot wutory do štwórtka, 2. do 18. septembra, k wotewrjenskim časam zarjada: póndźelu, wutoru a štwórtk wot 9.00 do 12.00 hodź., wutoru přidatnje wot 14.00 do 17.30 hodź. a štwórtk wot 14.00 do 16.00 hodź. Tam móža sej zajimcy tohorunja knihu wuměłca „Za wokeńcu – Einblicke“ kupić.
Chór Meja přeproša wšitkich zajimcow na swój lětni koncert na zahrodźe při Radworskej farskej cyrkwi, kotryž budźe njedźelu, 31. awgusta, w 16.00 hodź. Program wuhotuje zhromadnje ze skupinu „Wólbernosće“. Wot 15.30 hodź. poskićuja swačinu.
Serbskich młodostnych přeprošuje Towarstwo Cyrila a Metoda z.t. (TCM) na jězbu do Dachauwa a Mnichowa. Wona wotměje so wot pjatka do soboty, 3. do 4. oktobra. Přizjewjenja su online móžne.
Za pasionske předstajenja w septembru na farskej łuce w Chrósćicach móža sej zajimcy zastupne lisćiki online kupić. Tež do předstajenja budu je při kasy předawać.
