Katolski Posoł – 22. februara 2026
Wo nutřkownym konflikće čłowjeka a dwěmaj pućomaj z njeho won rozmysluje awtor w swojim zawodnym nastawku. Mjez druhim wón na to pokazuje, što křesćanske žiwjenje njeje, ale tež, a štó na kóncu derje před Bohom steji.
Połne zaćišćow a dožiwjenjow wróći so wjacore dźesatki družkow a hotowarničow z wosebiteje putniskeje jězby. Wona wjedźeše jich w zymskich prózdninach do Roma, hdźež čakaše na nich tohorunja zetkanje cyle wosebiteho razu.
Wo swojich dopóznaćach po njewěstosći rozprawja Alena Bětnarjec w dalšim dźělu swojeje rozprawy wo pućowanjach po Africe a Rańšich krajach. Te měješe wona po zetkanju z Keniskej swójbu.
Wysoke narodniny smědźeše serbska rjadniska sotra njedaloko Münstera swjećić. Na swjedźeń sej tohorunja swójbni z ródneje Łužicy dojědźechu.
Wo ćežach a přijomnosćach w zymskim času rozprawješe Katolski Posoł před sto lětami, kaž awtorka rubriki zwěsći. A tehdy skedźbnichu tež na nastroj, kotryž měješe nimo druhich tohorunja serbske pismiki. To běše za tehdyši čas nowum.
Jako kuzłarski swět Božeje stwórby wopisuje awtor krajinu, do kotrejež sej rady w zymje wuleći. Tam wopyta nětko mjez druhim tež městno, kotrež je w Starym zakonju wažne.
Wo swojim hłownym póstnym předewzaću pisataj Hańžka a Feliks na stronomaj za dźěći. Zdobom nańdu tam młodźi čitarjo zazběh do lětušeje serije w póstnym času. Tónraz steja wobrazy a temy jednotliwych ewangelijow póstnych njedźelow w srjedźišću.
Předsydstwo Towarstwa Cyrila a Metoda z.t. (TCM) přeprošuje wšitkich čłonow towarstwa, čłonow sekcijow a korporacijow na hłownu zhromadźiznu, kotraž budźe wutoru, 24. februara, w Baćonju. Započatk je z Božej mšu we 18.00 hodź.
Serbscy młodostni su w póstnym času na wšelake zarjadowanja přeprošeni. Přehlad je tule wozjewjeny.
Lěto po misionje přeprošuje Radworska wosada na dodatny mision z patrami Hünfeldskich oblatow. Tón wotměje so wot pjatka, 27. februara, do njedźele, 1. měrca.
W Smochčanskim kubłanišću swjateho Bena wotměje so tež lětsa ekumeniski póstny seminar. Po štyrjoch póndźelach wěnuja so referenća tónraz temje „Najebać wšeho … za cyrkej rady skutkować“.
Na tři jězby do Erfurta, sewjerneje Němskeje a Awstriskeje přeprošuje Radworske Šmitec-Schwarzec wozydłownistwo lětsa w běhu lěta. Nadrobniše informacije nańdu zajimcy w Powšitkownych wozjewjenjach.
Drježdźansko-Mišnjanske biskopstwo přeprošuje wšěch, kotřiž čestnohamtsce w chórach spěwaja, je nawjeduja, w cyrkwi kantorja, abo na instrumentach hraja respektiwnje chcedźa to přichodnje rady činić, na dalekubłanje. Wone budźe wot pjatka, 27. februara, do njedźele, 1. měrca, w Smochčanskim kubłanišću swjateho Bena. Za to měli so do toho přizjewić.
Pod hesłom „Zhromadnje po puću“ steji putniska jězba do Israela, kotraž wotměje so wot póndźele do póndźele, 2. do 9. nowembra. Přewodźeć budu ju cistercienski pater dr. Johannes Müller a Enrico Scholze z Hellendorfa. Jězbu poskića zhromadnje z pućowanskim běrowom Scuba-Reisen ze Stuttgarta. Přizjewjenja su hač do pjatka, 7. awgusta, móžne. Ličba městnow je wobmjezowana.
Projekt Lipšćanskeje uniwersity „Wobydlerjo činja žurnalizm“ přeprošuje wosoby wot 18 lět ze Sakskeje, so z wobydlerskim žurnalistom stać a wo temach ze swojeho regiona rozprawjeć, wo kotrychž hewak nichtó njerěči. Wobdźělenje je darmotne, nježada sej žane předznajomosće a ma so derje z powołanjom a swójbu zjednoćić dać. Zajimcy měli so hač do soboty, 28. februara, z mejlku na buergerjournalismus@uni-leipzig.de přizjewić. Ličba městnow je wobmjezowana. – wjace
Ambulantna hospicna słužba Hornjołužiskeho zwjazka Carity z.t. w Kamjencu poskićuje lětsa zaso kurs k čestnohamtskemu přewodźenju ćežkochorych a mrějacych. Za to trěbnu wědu posrědkuja w zakładnym kursu, kotryž wotměje so wot 4. měrca hač do 18. apryla trójce srjedu wot 17.00 do 20.00 hodź. kaž tež trójce sobotu wot 9.00 do 15.00 hodź. Na to sćěhuje dohromady 20hodźinski praktikum z dalšimi štyrjomi zetkanjemi. Pohłubšacy kurs je w septembru planowany. Štóž chcył wukubłanje absolwować, měł so pola hospicneje słužby Carity w Kamjencu pod telefonowym čisłom (0 35 78) 37 43 12 abo z mejlku na hospiz@caritas-oberlausitz.de přizjewić. Flajer z dalšimi informacijemi a terminami je pod www.posol.de podaty.
Seminar k přihotej na sakrament mandźelstwa wotměje so pjatk a sobotu, 27. a 28. februara, w Smochčanskim kubłanišću swjateho Bena. Přizjewjenja su online móžne.
Serbska protyka
