Katolski Posoł – 1. měrca 2026
Kak móžeš so ze žohnowanjom za druhich stać – wo tym rozmysluje serbski duchowny w swojim zawodnym nastawku. Při tym złožuje so na wuznamnu wosobu ze Stareho zakonja.
Nowum zhonichu wopytowarjo prěnjeho póstneho seminara w Smochćicach. Referent rysowaše ambiwalentny wobraz cyrkwje a nabožiny w towaršnosći, štož měło k hłubšim přemyslowanjam a zdobom debaće wjesć.
Na hłownej zhromadźiznje Towarstwa Cyrila a Metoda z.t. (TCM) dźakowaše so jeje předsyda z małym připóznaćom štyrjom čłonam za jich spomóžne skutkowanje na dobro towarstwa. Tež za lětsa maja sekcije TCM wšelake akcije planowane.
Wosebity napoj je awtorka w Keniji woptała, z kotrymž domoródni zdobom ritual přewjedu. W kruhu swojeje hóstneje swójby dožiwi hišće dalši, kiž pak wubudźi w njej měšane začuća.
Rěčny centrum WITAJ woswjeći lětsa wosebitu róčnicu. Zdobom zwjazuje wuski kontakt k wulkej ličbje serbskich kubłanišćow. Kotry wuznam ma na polu wěry kaž tež dwurěčneho kubłanja, wo tym awtor nadrobnišo w swojim přinošku pisa.
W ewangeliju tuteje njedźele hraja tři symbole wažnu rólu, kotrež móhli wo rjanej idylce swědčić. Tola runje na tymle městnje – na horje – chce Bóh něšto zdźělić. Wo tym zhonja dźěći na stronje za młódšich čitarjow.
„Pokleće abo žohnowanje – Sekularizacija wčera a dźensa“ rěka hesło dalšeho zarjadowanje Ekumeniskeho póstneho seminara w Smochčanskim kubłanišću swjateho Bena. Wone budźe póndźelu, 2. měrca, w 19.30 hodź. Referent je profesor dr. Eberhardt Tiefensee z Lipska. Zastup je darmotny.
Redakciski team Dekanatneho dušepastyrstwa młodźiny we Worklecach je nowy serbski podcast přihotował, kotryž zaběra so z prašenjemi dokoławokoło wěry a žiwjenja. Pod titlom „Tak a znak – Štóž ma wuši k słyšenju, słyš! (Mt 13, 9)“ chce team dwutydźensce přinošk w formje rozmołwy wozjewić, w kotrymž rěčitaj kapłan Florian Mróz a Glorija Lanzyna. Jednotliwe wusyłanja maja 20 do 30 mjeńšin trać. Prěni přinošk wozjewja pjatk, 6. měrca, na Spotify a Youtube.
Zhromadne wječorne modlenje dekanatneje młodźiny
z taizéskimi pěsnjemi budźe přichodnu sobotu, 7. měrca,
w 20.00 hodź. w Ralbicach. Přizamknje so zabawny wječor w sportowej hali.
Dekanatne dušepastyrstwo za dźěći a młodźinu we Worklecach přeprošuje šulerki a šulerjow nětčišeho 4. do 8. lětnika w lětnich prózdninach na jězbu do Zhorjelca. Wona wotměje so wot póndźele do pjatka, 3. do 7. awgusta. Přizjewjenja přijimuja hač do pjatka, 1. meje, online.
Pod hesłom „Wujednaj so!“ wotměje so za šulerjow 6. do 8. lětnika sobotu, 21. měrca, wot 9.00 do 12.00 hodź. zhromadne dopołdnjo we Worklečanskim Don Boskowym domje. Tón dźeń změja móžnosć, sakrament wujednanja, swjatu spowědź, přijimać. Přizjewjenja přijimuja hač do wutory, 17. měrca, online.
Dalše zarjadowanje noweho rjadu Worklečanskeho dekanatneho dušepastyrstwa pod hesłom „Swójbne rituale w běhu lěta“ budźe pjatk, 27. měrca, wot 15.30 do 17.00 hodź. w Don Boskowym domje. Wone steji pod temu „Čakamy na jutry“. Přeprošeni su starši (mać abo nan) hromadźe z dźěsćom w
předšulskej starobje. Wobdźělnicy dóstanu w krótkej formje małe impulsy za swójbne, nabožne žiwjenje. Po tym sej hromadźe z dźěsćom něšto napasla. Přizjewjenja přijimuja hač do srjedy, 25. měrca, online.
Serbski kulturny archiw a Serbska centralna biblioteka při Serbskim instituće wobdźělitej so znowa na Dnju archiwow w Němskej, kotryž budźe sobotu, 7. měrca. Lětsa prezentuje so archiw jako městno komunikacije a dopóznaća. Nimo pokładow ze swójskeho domu, kotrež móža sej zajimcy wot 14.00 do 17.00 hodź. wobhladać, su wopytowarjo přeprošeni, dokumenty ze swójbnych stawiznow sobu přinjesć a předstajić. To móža historiske wupokazy, wopisma, listy, serbske knihi, dźeniki, wěnowanja, fotografije abo wuswědčenja a być.
Andreas Knapp z Lipska budźe z hosćom dalšeje Literarneje kofejownje w Budyskim Ekumeniskim tachantskim wobchodźe srjedu, 11. měrca, w rumnosćach wobchoda. Wón čita ze swojeje knihi „Atlas der unbegangenen Wege – Eine Reise zu dir selbst“, kotruž je zhromadnje z rjadnicu a awtorku Melanie Wolfers spisał. Započatk je w 19.00 hodź. Zajimcy móža sej knihu tón wječor tohorunja kupić a signować dać. Zastup je darmotny, wo dary proša.
Na tři jězby do Erfurta, sewjerneje Němskeje a Awstriskeje přeprošuje Radworske Šmitec-Schwarzec wozydłownistwo lětsa w běhu lěta. Nadrobniše informacije nańdu zajimcy w Powšitkownych wozjewjenjach.
Zwjazk za serbski kulturny turizm z.t. je w Lubinje w Błótach wustajeńcu wo narodnych drastach wotewrěł, hdźež wona hač do pjatka, 10. apryla, wostanje. Pozdźišo ma tež po Łužicy pućować.
Pod hesłom „Zhromadnje po puću“ steji putniska jězba do Israela, kotraž wotměje so wot póndźele do póndźele, 2. do 9. nowembra. Přewodźeć budu ju cistercienski pater dr. Johannes Müller a Enrico Scholze z Hellendorfa. Jězbu poskića zhromadnje z pućowanskim běrowom Scuba-Reisen ze Stuttgarta. Přizjewjenja su hač do pjatka, 7. awgusta, móžne. Ličba městnow je wobmjezowana.
Serbska protyka
