Katolski Posoł – 31. meje 2026
Z matematiskim nadawkom bliži so awtor zawodneho nastawka wysokemu swjedźenjej, kotryž cyrkej tutu njedźelu swjeći. Mjez druhim pokaza wón na to, w čim Bóh eksistuje, ale što ludźo dźensa město toho dožiwjeja.
Bamž Leo XIV. je swoju prěnju encykliku wozjewił, kotruž je zdobom sam zjawnosći předstajił. W njej so wón z něčim zaběra, štož widźi jako prašenje přichoda čłowjestwa.
Jako njezapomnity dźeń dožiwi młoda awtorka swoje prěnje swjate woprawjenje w Kulowje. Kajki wón běše, wona wopisuje.
Tysacy wěriwych je so swjatkownu póndźelu znowa do Róžanta podało a Božu mšu na putniskej łuce sobu swjećiło. W swojim prědowanju serbski duchowny mjez druhim wuwjedźe, što pomha, wužadanja znjesć.
Na jewišću hišće njepředstajenu kompoziciju kaž tež dźěła nimale njeznateho serbskeho komponista móža přihladowarjo a připosłucharjo na lětušim hudźbnym swjedźenju w awgusće w Smochčanskim kubłanišću swjateho Bena dožiwić. Zhromadnje ze Serbskim ludowym ansamblom přeprošuje wone tónraz na „Serbskej nocy“.
Wo njebjeskim žohnowanju pisaše Katolski Posoł před 100 lětami. Nimo zwučeneho duchowneho razu nača awtorka přinoška prašenje, hač njeje tež dalši podawk, wo kotrymž tehdy rozprawjachu, tajke žohnowanje.
Młodostni ze wšeho Drježdźansko-Mišnjanskeho biskopstwa – tež serbscy, tež serbscy młodostni Kulowskeje wosady – su přeprošeni, pěši abo z kolesom zhromadnje do klóštra Marijineje hwězdy w Pančicach-Kukowje putnikować. Po mnohich lětach zetka so młodźina cyłeje diecezy z tym zaso raz we Łužicy – a to sobotu a njedźelu, 13. a 14. junija.
Na lětušim putnikowanju dźěći ze wšeho biskopstwa do Róžanta, kotrež budźe srjedu, 8. julija, wobrubitej zhromadny dźěćacy chór Drježdźansko-Mišnjanskeho a Zhorjelskeho biskopstwa kaž tež projektowy chór serbskich dźěći Božu mšu a nyšpor. Dźěći, kotrež chcedźa tón dźeń w serbskim chórje sobu spěwać, su lubje witane. Spěwy nazwučuja sobotu, 20. junija, wot 9.00 do 11.00 hodź. a sobotu, 4. julija, wot 10.00 do 11.30 hodź. we Worklečanskim Don Boskowym domje. Wobě probje stej wuměnjenje za spěwanje w projektnym chórje. Přizjewjenja přijimuja hač do póndźele, 15. junija, online.
Chór Lipa přeprošuje zhromadnje z Křesćansko-socialnym kubłanskim skutkom Sakskeje wšitkich zajimcow na nalětni koncert, kotryž wuhotuje tutu njedźelu, 31. meje, w 15.30 hodź. na zahrodźe Zežiwjenskeho a zeloweho centruma w klóštrje Marijinej hwězdźe w Pančicach-Kukowje. Program wuhotuja Lipjenjo zhromadnje z Błótowskim žónskim chórom z Lubina, kotryž wustupuje w błótowskej serbskej drasće, kaž tež z Lipjanskej dźěćinu Lipki. Wot 15.00 hodź. poskića tam kofej a tykanc.
Mjeztym 90. literarna kofejownja Budyskeho ekumeniskeho tachantskeho wobchoda budźe srjedu, 10. junija, w rumnosćach Budyskeje wokrjesneje ludoweje uniwersity, Wulka Bratrowska hasa 6. Započatk je w 19.00 hodź. Něhdyši intendant Serbskeho ludoweho ansambla Wolfgang Rögner předstaji swoju prěnju publikaciju „Die phantastischen Abenteuer des Malte Blomberg“. Po čitanju změja zajimcy přiležnosć, sej knihu kupić a wot awtora signować dać. Zastup je darmotny, wo dary proša.
Bjarnat Krawc a Sergej Rachmaninow stejitaj w srjedźišću dalšeho sinfoniskeho koncerta Serbskeje komorneje filharmonije. Wón je tutu njedźelu, 31. meje, w 17.00 hodź. na žurli Budyskeho Serbskeho ludoweho ansambla. Hižo wot 16.30 hodź. poskića zawod do koncerta. Zastupne lisćiku su online na předań.
Ewangelske nabožne wusyłanje w Serbskim rozhłosu MDR ma tutu njedźelu, 31. meje,
Serbski superintendent na wuměnku, farar Jan Malink z Budyšina.
Lětuše putnikowanje młodźiny do Krupki je wot njedźele do pjatka, 26. do 31. julija. Putniske kemše w Krupce budu srjedu, 29. julija, w 10.00 hodź. Štóž chcył kemši z busom sobu jěć, měł so w Radworskim Šmitec-Schwarzec wozydłownistwje přizjewić, telefonowe čisło (03 59 35) 28 60.
Dekanatne dušepastyrstwo za dźěći a młodźinu we Worklecach přeprošuje šulerki a šulerjow nětčišeho 4. do 8. lětnika w lětnich prózdninach na jězbu do Zhorjelca. Wona wotměje so wot póndźele do pjatka, 3. do 7. awgusta. Přizjewjenja přijimuja hač do njedźele, 31. meje, online.
Za lětušu chórowu akademiju Budyskeho Rotaryjoweho kluba pytaja serbskorěčnych spěwarjow. Třećina spěwow koncertneho programa wobsteji z cyklusa „Počasy“ Korle Awgusta Kocora a Handrija Zejlerja. Cil chóroweje akademije pod nawodom Friedemanna Böhme je beneficny koncert njedźelu, 11. oktobra, w Budyskej Michałskej cyrkwi. Wunoški wěnuja so na dobro swětoweho programa Rotaryjoweho kluba k wutupjenju spinalneje mortwicy
(Kinderlähmung) pod hesłom „END POLIO NOW“. W přihoće móža sej zajimcy swój hłós z Wandu Wokowej wosobinsce kubłać.
Proby wotměja so stajnje srjedu w 19.00 hodź. w Budyskim Schillerowym gymnaziju, započejo 3. junija. Zajimcy měli so hač do kónca meje z mejlku na chorakademiebautzen@gmail.com přizjewić.
Proby w prěnjej fazy po srjedach 3. junija, 10. junija, 17. junija, 24. junija a 1. julija.
Proby w druhej fazy po srjedach 9. septembra, 16. septembra, 23. septembra, 30. septembra, 7. oktobra
Probowy dźeń: sobotu, 26. septembra, wot 10.00 do 16.00 hodź.
Hłowna proba: sobotu, 10. oktobra, wot 10.00 do 13.00 hodź.
Wustup: njedźelu, 11. oktobra, w 17.00 hodź. w Budyskej Michałskej cyrkwi.
Sekcija swójby Towarstwa Cyrila a Metoda z.t. (TCM) přeprošuje dźěći 4. a 5. lětnika, so sobotu, 13. junija, zhromadnje z klóšterskim hajnikom Guidom Budarjom z Božej stwórbu bliže zeznajomić. Wone zetkaja so w 10.00 hodź. w Smječkecach při hajnkowni, Winicowa 13 (Weinbergstraße), hdźež so zarjadowanje w 14.00 hodź. tež skónči. Wottam podadźa so pěši na puć po lěsu, zo bychu Božu stwórbu widźeli, słyšeli a čuli. Za to trjebaja krute črije a wotpowědnu drastu. Pućowanje wotměje so tež při špatnym wjedrje. Mjez druhim móža wobdźělnicy štomiki a druhe rostliny sadźeć. Přinošk wučinja tři eura na dźěćo. Wobdźělić móže so jeničce 20 dźěći.
Radworske Šmitec-Schwarzec wozydłownistwo přeprošuje na putnisku jězbu k pasionskim
hram do awstri skeho St. Margarethena, kotraž so wot pjatka do wutory, 26. do
30. junija, wotměje. Předstajenje budźe tam pod hołym njebjom před kulisu skały. Nimo
toho poskićuja kołojězby. Zajimcy móža so pola Šmitec-Schwarzec wozydłownistwa
w Radworju přizjewić, telefonowe čisło (03 59 35) 28 60. Městna su hišće swobodne.
Dalšu jězbu Radworskeho Šmitec-Schwarzec busoweho předewzaća pod hesłom „Wěra zetka hudźbu“ budźe wot póndźele do štwórtka, 10. do 13. awgusta, do Erfurta. Wobdźělnicy wopytaja mjez druhim klóšter awgustinow a tamniši měšniski seminar. Dale wobdźěla so na Erfurtskich domowych swjedźenskich hrach, hdźež předstaja musical „Jesus Christus Superstar“. Přizjewjenja přijimuje Šmitec-Schwarzec wozydłownistwa w Radworju, telefonowe čisło (03 59 35) 28 60. Městna su hišće swobodne.
Drježdźanska katedrala Najswjećišeje Trojicy bu před 275 lětami poswjećena. K tomu su w diecezy wobšěrny program z hudźbnymi předstajenjemi a čitanjemi zestajeli. Wjeršk ma swjatočna Boža mša w juniju z biskopom Heinrichom Timmereversom być.
Serbska protyka
