Katolski Posoł – 22. měrca 2026
Za kotrym znamjenjom mjez wšědnymi starosćemi a ćichimi přesłapjenjemi žadosć rosće, wujasnja awtor w swojim zawodnym přinošku. Zdobom rozjasnja, zo druhdy runje najćeši puć tam wjedźe, hdźež so wšitko znowa rjaduje.
Biskop Heinrich Timmerevers je mjez druhim Serbej nadawk lektorata swjatočnje přepodał, a to we wobłuku jeho wukubłanja na stajneho diakona w ciwilnym powołanju. Za nowy nadawk wón tež daloke puće na so wza.
Nimale tysac wopismow buchu w zańdźenych třoch lětach w diecezanskim archiwje w Budyšinje restawrowane. Kotre wosebitosće tam runje za křesćanskich Serbow wobchowaja, přeradźichu na nowinarskej konferency.
W Uzbekistanje měješe awtorka zetkanje z potencialom ke konfliktej. Na kotre wašnje móžeše situaciju wobknježić a kotre mysle ju při tym putachu, powěda w swojim mjeztym wosmym přinošku.
Póstny rub, kiž je w njewšědnym stilu zhotowjeny, zakrywa wołtar Drježdźanskeje katedrale. Kotre paralele móža so mjez wuměłskej twórbu a towaršnosću widźeć, wo tym pisa awtorka nadrobnišo.
Stupaja abo spaduja ličby kemšerjow, křćiznow, wěrowanjow abo wustupow ze cyrkwje? W kotrym dekanaće chodźi najwjace ludźi kemši? Aktualna statistika Němskeje biskopskeje konferency (DBK) w ličbach wuwiće poćaha čłowjeka ze cyrkwju rysuje.
Sakski katolski zwjazk za kubłanje dorosćenych je wažnu organizatorisku kročel wukonjał. W Hózku bydlacy Serb je sobustawam na zhromadźiznje rozjasnił, kotre towarstwa su čłony a kotre nowe prawniske zakłady wot nětka płaća.
Na stronje za młódšich čitarjo zaběraja so dźěći pjatu póstnu njedźelu z ćežkej a zdobom zrudnej, ale tež zwjeselacej temu. Kotreho přećela móža dźěći w kóždej situaciji swojeho žiwjenja poboku měć, zhonja w přidatym spěwje.
Kotru konkretnu lubosć k blišemu móža młodostni z lětušim póstnym woporom podpěrować, to zhonja w Knotwišću. Wo dźěle němskich rjadnikow na městnje móža so tež online wobhonić.
Budyske Ludowe nakładnistwo Domowina (LND) je Bena Budarjowu zběrku „Dźens sym połsta dubow sadźił“ znowa wudało. K tomu je dalše teksty dodało a knihu hinak hač dotalnu wuhotowało. Knihu poskićeja w Budyskej Smolerjec kniharni a we wšěch znatych předawanišćach serbskich knihow. Skazać móža sej ju zajimcy telefonisce pod čisłom
(0 35 91) 57 72 88 abo z mailku pod adresu buchhandlung@domowina-verlag.de.
Křižowy puć dekanatneje młodźiny budźe bołmončku, 29. měrca, we Łazku. Započatk je w 14.00 hodź. Jednotliwe wosadne młodźiny njech přinjesu swój młodźinski baner sobu. Trěbna digitalna knižka za křižowy puć budźe wot štwórtka, 26. měrca, na internetowej stronje dekanatneho dušepastyrstwa přistupna.
Njebjelčanski chór swjateje Cecilije wuhotuje sobotu, 28. měrca, w 20.00 hodź. pod hesłom „Ja sym puć a prawda a žiwjenje“ (Jan 14,6) w tamnišim Božim domje „Hodźinku před Bohom“. Na pěsnje, psalmy a modlitwy słuchajo, kotrež młodostni přednjesu, su wšitcy přeprošeni před Bohom wutrać a so dušinje na jutry přihotować. Kóždy měł sej swěčku sobu přinjesć a so sam z dźělom swětła stać.
Młodostni z cyłeho Drježdźansko-Mišnjanskeho biskopstwa su přeprošeni, pěši abo
z kolesom zhromadnje do klóštra Marijineje hwězdy w Pančicach-Kukowje putnikować.
Tam wotměje so sobotu a njedźelu, 13. a 14. junija, zjězd biskopstwoweje młodźiny. Na nim čaka na putnikow pisany program ze wšelakimi dźěłarničkami, modlenjom, spěwanjom a zhromadnej Božej mšu.
Časy a čary křižerskich procesionow su na internetowej stronje Katolskeho Posoła wozjewjene. Jeli někomu něšto napadnje, štož by so změnić měło, njech to prošu najručišo redakciji pod telefonowym čisłom (0 35 91) 55 02 10 abo z mailku na Katolski@Posol.de zdźěli.
Šulerki a šulerjo 1. a 2. lětnika su w jutrownych prózdninach na zhromadny dźeń do Don Boskoweho domu we Worklecach přeprošeni. Wón steji pod hesłom „Chryst je z mortwych stanył – haleluja“. Wobdźělić móža so dźěći pak srjedu, 8. apryla, pak štwórtk 9. apryla, stajnje wot 9.00 do 15.00 hodź. Swójski přinošk na wobdźělnika wučinja pjeć eurow. Přizjewjenja přijimuja online hač do póndźele, 23. měrca.
Dekanatne dušepastyrstwo za dźěći a młodźinu we Worklecach přeprošuje šulerki a šulerjow nětčišeho 4. do 8. lětnika w lětnich prózdninach na jězbu do Zhorjelca. Wona wotměje so wot póndźele do pjatka, 3. do 7. awgusta. Přizjewjenja přijimuja hač do pjatka, 1. meje, online.
Drježdźansko-Mišnjanske biskopstwo poskićuje tež lětsa zaso zawod do tematiki nabožnych prózdninskich dnjow. Prěnje tajke zarjadowanje budźe póndźelu, 11. meje, wot 18.00 do 21.00 hodź. na Budyskej farje. Dalše je mjez druhim srjedu, 27. meje, w Drježdźanach planowane. Zdobom poskića zamołwići zawod tež online přez platformu Zoom, a to štwórtk, 28. meje, wot 18.00 do 21.00 hodź. Přizjewjenja přijimuja online.
Dalše zarjadowanje noweho rjadu Worklečanskeho dekanatneho dušepastyrstwa pod hesłom „Swójbne rituale w běhu lěta“ budźe pjatk, 27. měrca, wot 15.30 do 17.00 hodź. w Don Boskowym domje. Wone steji pod temu „Čakamy na jutry“. Přeprošeni su starši (mać abo nan) hromadźe z dźěsćom w
předšulskej starobje. Wobdźělnicy dóstanu w krótkej formje małe impulsy za swójbne, nabožne žiwjenje. Po tym sej hromadźe z dźěsćom něšto napasla. Přizjewjenja přijimuja hač do srjedy, 25. měrca, online.
Mužojo, kotřiž chcedźa teologiju studować a so z měšnikom stać, móža so wot nazymy we wobłuku studija na to přihotować. Tež mužojo bjez matury, ale z wotzamknjenym powołanskim wukubłanjom móža so na puć měšnistwa podać. Do požadanja wotměja so w biskopskim ordinariaće w Drježdźanach orientaciske rozmołwy, za kotrež měli so zajimowani mužojo w personalnym wotrjedźe přizjewić.
Lětsa nazymu zahaja na Fachowej akademiji za wosadnu pastoralku w Magdeburgu nowy wukubłanski kurs za muži, kotřiž chcyli so ze stajnym diakonom w ciwilnym powołanju stać. Zajimcy měli při zahajenju wukubłanja znajmjeńša 35 lět być a nic starši hač 50 lět.
Zajimcy, kotřiž chcyli pastoralnu słužbu we wosadźe wukonjeć, móža lětsa nazymu wukubłanje na wosadneho referenta zahajić. Žony a mužojo, kiž tak mnohostronske słužby a charismy wěriwych podpěraja a spěchuja, móža so ze studijom nabožneje pedagogiki respektiwnje teologije a nawjazowaceho třilětneho wukubłanja za tajku słužbu kwalifikować.
Serbska protyka
