Katolski Posoł – 3. meje 2026
Štó ma dźensa zamołwitosć za wučbu wěry – měšnicy abo lajkojo? Awtor zawodneho nastawka rozmysluje wo róli katechezy a pokazuje, čehodla móhło jeje znowawotkryće šansa za wosady być.
W Praze su noweho arcybiskopa zapokazali, kotryž je hakle loni za Serbami Božu mšu swjećił. Wón chce so wo dialog starać a mosty twarić. Mjez oficialnymi hosćimi běchu tež Serbja.
Zhromadnje so modlić najebać konfesionelneho rozdźěla: W Chrósćicach swjećachu ekumeniski nyšpor. Na nim so něšto pokaza, štož móže runje w časach powšitkowneje njewěstosće jako pomocliwe skutkować.
Pjeć lětdźesatkow w słužbje cyrkwje a tola zwjetša w zakrytym. Radworčanka swjeći swój złoty jubilej jako wosadna referentka.
Rědki jubilej w Drježdźanskim konwenće Hilžbjetow: Hnydom štyri rjadniske sotry so lětdźesatki za wěru a zhromadnosć angažuja – nětko su to na wosebite wašnje woswjećili.
W Baćonju přija jědnaće młodostnych sakrament firmowanja. Na kóncu zdźěla samostatneje wuhotowaneje liturgije darichu młodostni wosadnemu fararjej Geratej Wornarjej něšto, štož přihot a wučbu firmowanja symbolizuje.
Mjez dopomnjenjom a napominanjom: We Łužicy wožiwjeja na městnje z mjenom „Dolina smjerće“ dopomnjeće na stawizny. Štož so tu lětnje stawa, zwjazuje wopominanje z poselstwom, kotrež daloko přez region saha.
W Sri Lance njepytaše młoda Serbowka jenož nowy dyrdomdej, ale storči na zetkanje, kotrež jeje přeswědčenja do prašenja staji. Mjez ritualemi, dalšimi nabožinami a wosobinskimi prašenjemi započa so rozestajenje, kotrež pućowanje přesahuje.
Lětdźesatki dołho formuje jubilar rozprawnistwo katolskich Serbow a wostanje při tym sam zwjetša w pozadku. Žurnalistiska rozpalitosć, wěra a hajenje zhromadnosće jeho žiwjenski puć charakterizuja.
Městnosć wuknjenja stanje so z městnom dopominanja: W Smochčanskim kubłanišću swjateho Bena su seminarnu rumnosć po serbsko-němskej spjećowarce pomjenowali – jako znamjo přećiwo zabyću.
Krok po kroku přewjedu na putniskim městnje w sewjernej Čěskej restawraciske dźěła. Wone nimaja jeničce twarsku substancu zawěsćić, ale tež přichod městnosće formować.
Dźakna Boža mša wohnjowych wobornikow ze Zarjadniskeho zwjazka „Při Klóšterskej wodźe“ kaž tež susodnych woborow na česć swjateho Floriana budźe pjatk, 8. meje, w 19.00 hodź. w hnadownej cyrkwi w Róžeńće. Wšitcy wobornicy kaž tež hosćo su přeprošeni.
Putnikowanje staršich a chorych ludźi ze serbskich wosadow do Róžanta budźe sobotu, 9. meje. Boža mša zahaji so w 14.00 hodź. Na njej wudźěla tym, kotřiž sej to přeja, žałbowanje chorych. Wot 13.30 hodź. modla so tam swjaty róžowc.
Na zhromadny dźeń z krosnowanjom přeprošuje Swójbny zwjazk katolikow w Drježdźansko-Mišnjanskim biskopstwje pory do dožiwjenskeho parka w Moritzburgu přeprošeni. Tón wotměje so sobotu, 6. junija, wot 10.00 do 16.00 hodź. a hodźi so zdobom za pory, kotryž so na sakrament mandźelstwa přihotuja. Swójski přinošk kóždeho porika wučinja 80,00 eurow a wobsahuje wuhotowanje za krosnowanje, zastup do dožiwjenskeho parka kaž tež napoj. Wo ćělne derjeměće měł so kóždy sam starać.
W Lubiju wotměje so wot pjatka do njedźele, 29. do 31. meje, wjacednjowska konferenca AUGEN:BLICK wšelakich křesćanskich wosadow a skutkow Hornjeje Łužicy. Mjez referentami budźe sobotu, 30. meje, w 19.30 hodź. tež znaty filozof, teologa a referent dr. Johannes Hartl. Wječor steji pod hesłom „Unter dem Blick Jesu“. Worklečanske dekanatne dušepastyrstwo za młodźinu přeprošuje serbskich młodostnych, sej na přednošk dojěć a po tym w tak mjenowanej lounge wječor z přikuskom, dušepastyrstwom kaž tež poskitkami k modlenju wuklinčeć dać. Wotjězd z awtami je w 17.00 hodź., mjez druhim z Chrósćic, planowany. Wróćo pojědu něhdźe w 22.30 hodź. Zastup je darmotny. Přizjewjenje přijimuje dekanatne dušepastyrstwo za młodźinu online hač do pjatka, 22. meje. Link je pod www.posol.de wozjewjeny. Štóž ma zajim, móže so tež samostatnje na dalšich dźělach konferency wobdźělić.
Prědowanje w MDR serbskim rozhłosu ma tutu njedźelu, 3. meje, kapłan Pětr Mróz z Budyšina. Wotkaz na nabožne wusyłanje w mediatece MDR je tule podaty.
Wěriwi z Němskeje, Pólskeje a Čěskeje su sobotu, 9. meje, na putnikowanje wujednanja do čěskich Hejnic přeprošeni, wuraznje tež Serbja. Boža mša w hnadownej cyrkwi Marije wopytanja zahaji so w 10.30 hodź. Hłowny celebrant budźe swjećacy biskop Piotr Wawrzynek z Legnicy. Hejnicy přisłušeja Litoměřicskej diecezy, kotraž swjeći lěto wujednanja. Z tym chcedźa tež na wuhnaće Němcow z Čěskeje před 80 lětami spominać a dialog mjez krajomaj spěchować.
Radworske Šmitec-Schwarzec busowe předewzaće přeprošuje na putnisku jězbu k pasionskim hram do awstriskeho St. Margarethena, kotraž so wot pjatka do wutory, 26. do 30. junija, wotměje. Předstajenje budźe tam pod hołym njebjom před kulisu skały. Jězbu přewodźeć budźe farar Gabriš Nawka. Nimo toho poskićuja kołojězby. Zajimcy móža so pola Šmitec-Schwarzec wozydłownistwa w Radworju přizjewić, telefonowe čisło (03 59 35) 28 60. Městna su hišće swobodne.
Dalšu jězbu Radworskeho Šmitec-Schwarzec busoweho předewzaća pod hesłom „Wěra zetka hudźbu“ budźe wot póndźele do štwórtka, 10. do 13. awgusta, do Erfurta. Wobdźělnicy wopytaja mjez druhim klóšter awgustinow a tamniši měšniski seminar. Dale wobdźěla so na Erfurtskich domowych swjedźenskich hrach, hdźež předstaja musical „Jesus Christus Superstar“. Přizjewjenja přijimuje Šmitec-Schwarzec wozydłownistwa w Radworju, telefonowe čisło (03 59 35) 28 60. Městna su hišće swobodne.
Młodostni z cyłeho Drježdźansko-Mišnjanskeho biskopstwa su přeprošeni, pěši abo
z kolesom zhromadnje do klóštra Marijineje hwězdy w Pančicach-Kukowje putnikować.
Tam wotměje so sobotu a njedźelu, 13. a 14. junija, zjězd biskopstwoweje młodźiny. Na nim čaka na putnikow pisany program ze wšelakimi dźěłarničkami, modlenjom, spěwanjom a zhromadnej Božej mšu.
Dekanatne dušepastyrstwo za dźěći a młodźinu we Worklecach přeprošuje šulerki a šulerjow nětčišeho 4. do 8. lětnika w lětnich prózdninach na jězbu do Zhorjelca. Wona wotměje so wot póndźele do pjatka, 3. do 7. awgusta. Přizjewjenja přijimuja hač do póndźele, 1. junija, online.
Drježdźansko-Mišnjanske biskopstwo poskićuje tež lětsa zaso zawod do tematiki nabožnych prózdninskich dnjow. Prěnje tajke zarjadowanje budźe póndźelu, 11. meje, wot 18.00 do 21.00 hodź. na Budyskej farje. Dalše je mjez druhim srjedu, 27. meje, w Drježdźanach planowane. Zdobom poskića zamołwići zawod tež online přez platformu Zoom, a to štwórtk, 28. meje, wot 18.00 do 21.00 hodź. Přizjewjenja přijimuja online.
Drježdźanska katedrala Najswjećišeje Trojicy bu před 275 lětami poswjećena. K tomu su w diecezy wobšěrny program z hudźbnymi předstajenjemi a čitanjemi zestajeli. Wjeršk ma swjatočna Boža mša w juniju z biskopom Heinrichom Timmereversom być.
Mužojo, kotřiž chcedźa teologiju studować a so z měšnikom stać, móža so wot nazymy we wobłuku studija na to přihotować. Tež mužojo bjez matury, ale z wotzamknjenym powołanskim wukubłanjom móža so na puć měšnistwa podać. Do požadanja wotměja so w biskopskim ordinariaće w Drježdźanach orientaciske rozmołwy, za kotrež měli so zajimowani mužojo w personalnym wotrjedźe přizjewić.
Lětsa nazymu zahaja na Fachowej akademiji za wosadnu pastoralku w Magdeburgu nowy wukubłanski kurs za muži, kotřiž chcyli so ze stajnym diakonom w ciwilnym powołanju stać. Zajimcy měli při zahajenju wukubłanja znajmjeńša 35 lět być a nic starši hač 50 lět.
Zajimcy, kotřiž chcyli pastoralnu słužbu we wosadźe wukonjeć, móža lětsa nazymu wukubłanje na wosadneho referenta zahajić. Žony a mužojo, kiž tak mnohostronske słužby a charismy wěriwych podpěraja a spěchuja, móža so ze studijom nabožneje pedagogiki respektiwnje teologije a nawjazowaceho třilětneho wukubłanja za tajku słužbu kwalifikować.
Serbska protyka
