Katolski Posoł – 29. měrca 2026
Njeznatemu swjatemu je najstarša cyrkej w Mainzu poswjećena, w kotrejž je zdobom křiž z njewšědnym detailom. Duchowny pisa w swojim zawodnym nastawku wo tym, što chce Jězus kóždemu, kiž na njeho hlada, prajić.
Drježdźanska katedrala Najswjećišeje Trojicy bu před 275 lětami poswjećena. K tomu su w diecezy wobšěrny program z hudźbnymi předstajenjemi a čitanjemi zestajeli. Wjeršk ma swjatočna Boža mša w juniju z biskopom Heinrichom Timmereversom być.
Pasionske předstajenje „Sćěhuj mje!“, kiž bu loni w septembru 2025 na farskej łuce w Chrósćicach předstajene, je wot pjatka, 27. měrca, 19.00 hodź. jako film online přistupne. Produkciju je studijo Lucija přewzało, kiž film we wosom rěčach poskićuje.
Radworscy křižerjo su so při swjatolětnym pomniku swjateju Cyrila a Metoda pola Stróžišća zetkali. Tam su někotre dźěła přewzali.
Bubony, trompeće a swěčki hrajachu na putnikowanju serbskich swójbow do Róžanta wěstu rólu. A farar da druhich ewangelij přednjesć.
Młoda Serbowka dožiwi w luksusowym měsće Zjednoćenych arabskich emiratow wótru škałbu mjez bohatymi a chudymi ludźimi. Při swojim wuchodźowanju po měsće rozmyslowaše wona wo kontrowersnosći mjez statusowymi symbolemi a zakorjenjej tradiciju kraja.
Lětsa maja so wospjet wěstotne pokiwy w zwisku z křižerskimi procesionami wobkedźbować. To žadatej sej DEKRA a Drježdźansko-Mišnjanske biskopstwo wot wosadow.
Na stronje za młódšich čitarjow dźěći zhonja, kak móža sej martrowny tydźeń na kreatiwne wašnje zbližić. K tomu móhli sej wosebitu zahrodu spaslić, kaž kubłarka z Prawoćic bliže rozkładuje.
Žony nawuknychu w běhu kursa něšto, štož kóždy křižer trjeba, ale drje lědma něchtó z nich zdokonja. Wone dyrbjachu pak tež tróšku wušikne być.
Před sto lětami sta so w Delanach při dźěle w młynje njezbožo, runočasnje w Janskej kupjeli prěni hosćo tohole lěta zaćahnychu. Padnjenych francoskich wojakow, kiž běchu mjez druhim na Tuchorju pochowani, su do jich domizny přewjezli. A w Radworju wotmě so wosebita šulska wustajeńca. Wo wšěm tym rozprawješe Katolski Posoł před sto lětami.
Časy a čary křižerskich procesionow su na internetowej stronje Katolskeho Posoła wozjewjene. Jeli někomu něšto napadnje, štož by so změnić měło, njech to prošu najručišo redakciji pod telefonowym čisłom (0 35 91) 55 02 10 abo z mailku na Katolski@Posol.de zdźěli.
Křižowy puć dekanatneje młodźiny budźe bołmončku, 29. měrca, we Łazku. Započatk je w 14.00 hodź. Jednotliwe wosadne młodźiny njech přinjesu swój młodźinski baner sobu. Trěbna digitalna knižka za křižowy puć budźe wot štwórtka, 26. měrca, na internetowej stronje dekanatneho dušepastyrstwa přistupna.
Wosebite wodźenje po galeriji tworjaceho wuměłstwa poskićuje Budyski Serbski muzej njedźelu, 29. měrca, w 16.00 hodź. w němskej a w 17.00 hodź. w serbskej rěči. Direktorka Christina Boguszowa njepředstaji jeničce twórby, ale tež wuměłcow a jich stawizny.
Ludowi wuměłcy wustajeja a předawaja wot wulkeho pjatka do jutrowneje póndźele, 3. do 6. apryla, stajnje wot 10.00 do 18.00 hodź. w Budyskim Serbskim muzeju jutrowne jejka. Wone su we wšelakich serbskich debjenskich technikach zhotowjene.
Smochčanske kubłanišćo swjateho Bena přeprošuje wulki pjatk, 3. apryla, w 19.30 hodź. na meditatiwny wječor do tamnišeje cyrkwje. Smyčkowy kwartet Budyskeho Serbskeho ludoweho ansambla interpretuje Wolfganga Amadeusa Mozartowy „Rekwiem“, kiž ma připosłucharjam na hudźbne wašnje žarowanje, tróšt a nadźiju sposrědkować. Krótke čitanja w běhu „Rekwiema“ w serbskej a němskej rěči přednjesu. Słowo a zwuk chcedźa do sensibelneho dialoga stajić a městno skićić, kiž so z ćišinu, rozmyslowanjom a zhromadnym wopominanjom wupjelnjuje. Zastupne lisćiki móža sej zajimcy w interneće kaž tež při wječornej kasy kupić.
Młodostni z cyłeho Drježdźansko-Mišnjanskeho biskopstwa su přeprošeni, pěši abo
z kolesom zhromadnje do klóštra Marijineje hwězdy w Pančicach-Kukowje putnikować.
Tam wotměje so sobotu a njedźelu, 13. a 14. junija, zjězd biskopstwoweje młodźiny. Na nim čaka na putnikow pisany program ze wšelakimi dźěłarničkami, modlenjom, spěwanjom a zhromadnej Božej mšu.
Dekanatne dušepastyrstwo za dźěći a młodźinu we Worklecach přeprošuje šulerki a šulerjow nětčišeho 4. do 8. lětnika w lětnich prózdninach na jězbu do Zhorjelca. Wona wotměje so wot póndźele do pjatka, 3. do 7. awgusta. Přizjewjenja přijimuja hač do pjatka, 1. meje, online.
Drježdźansko-Mišnjanske biskopstwo poskićuje tež lětsa zaso zawod do tematiki nabožnych prózdninskich dnjow. Prěnje tajke zarjadowanje budźe póndźelu, 11. meje, wot 18.00 do 21.00 hodź. na Budyskej farje. Dalše je mjez druhim srjedu, 27. meje, w Drježdźanach planowane. Zdobom poskića zamołwići zawod tež online přez platformu Zoom, a to štwórtk, 28. meje, wot 18.00 do 21.00 hodź. Přizjewjenja přijimuja online.
Mužojo, kotřiž chcedźa teologiju studować a so z měšnikom stać, móža so wot nazymy we wobłuku studija na to přihotować. Tež mužojo bjez matury, ale z wotzamknjenym powołanskim wukubłanjom móža so na puć měšnistwa podać. Do požadanja wotměja so w biskopskim ordinariaće w Drježdźanach orientaciske rozmołwy, za kotrež měli so zajimowani mužojo w personalnym wotrjedźe přizjewić.
Lětsa nazymu zahaja na Fachowej akademiji za wosadnu pastoralku w Magdeburgu nowy wukubłanski kurs za muži, kotřiž chcyli so ze stajnym diakonom w ciwilnym powołanju stać. Zajimcy měli při zahajenju wukubłanja znajmjeńša 35 lět być a nic starši hač 50 lět.
Zajimcy, kotřiž chcyli pastoralnu słužbu we wosadźe wukonjeć, móža lětsa nazymu wukubłanje na wosadneho referenta zahajić. Žony a mužojo, kiž tak mnohostronske słužby a charismy wěriwych podpěraja a spěchuja, móža so ze studijom nabožneje pedagogiki respektiwnje teologije a nawjazowaceho třilětneho wukubłanja za tajku słužbu kwalifikować.
Serbska protyka
