Katolski Posoł – 5. apryla 2026
„Je přišoł dźeń najzbóžniši, hdyž Jězus z rowa wustupi.“
Přiroda w nalěću zaso wotuća a so wožiwja, wšitko rjenje zakćěwa. W tajkim wožiwjacym počasu spominamy na ćerpjenje a křižowanje našeho zbóžnika Jězusa Chrystusa a swjećimy jeho zrowastanjenje a dobyće nad smjerću. Kaž přiroda ze zymskeho spara wotuća a wšitko nas w najrjeńšej pyše zawjesela, tak je Jězus přez swoje ćerpjenje a zrowastanjenje naše žiwjenje z putow smjerće wumóžił. A my móžemy radostnje spěwać: „Je přišoł dźeń najzbóžniši, hdyž Jězus z rowa wustupi.“
Přejemoj wšitkim čłonam, dobroćelam a podpěraćelam našeho Towarstwa Cyrila a Metoda z.t. (TCM) kaž tež wšitkim čitarjam, dopisowarjam a roznošowarjam Katolskeho Posoła wožiwjace a radostne jutry, žohnowany jutrowny čas a wotewrjenu wutrobu za wjesołe poselstwo zrowastanjenja.
Wšitkim, kotřiž nam přez swoju słužbu rjany swjedźeń jutrow zmóžnjeja, wuprajamoj zapłać Bóh.
Njech křižerjo z cyłej wutrobu wozbožace poselstwo zrowastanjenja Jězus Chrystusa wozjewjeja a so zaso strowi nawróća.
Cyril Hančik a farar Michał Anders
předsyda Towarstwa Cyrila a Metoda z.t. a
šefredaktor Katolskeho Posoła
předsyda Towarstwa Cyrila a Metoda z.t. a
šefredaktor Katolskeho Posoła
Runje w ćežkich wokomikach móža małke znamješka sobučłowjekow pomhać, situaciju znjesć abo něšto w swójskim žiwjenju změnić. Duchowny pisa w swojim zawodnym nastawku wo tym, na koho a što měli tež w bjezwuhladnych situacijach słuchać.
Ewangelscy Serbja jutry tójšto nałožkow haja a stare wašnja pěstuja. Awtorka je wšelake kónčiny wopytała a wo nazhonjenjach, kaž tež rozmołwach z wobdźělnikami jutrownych nałožkow rozprawja.
W Ralbičanskim křižerskim procesionje změja lětsa jubilara. Po wšěm zdaću njeje hišće žadyn Ralbičanski křižer tak často jěchał. Jubilar powěda wo tym, z čeho swoju móc čerpa a apeluje na wšěch křižerjow.
Na dotalnej jězbje po wjacorych krajach Afriki a Rańšeho kraja njeje młoda Serbowka ženje sama po puću była. Přeco měješe přećelku abo přećela poboku. Nětko dale jězbu cyle sama nastupi a spjelni sej zdobom són z młodźinskeho časa.
We Łazku dožiwichu młodostni křižowy puć, kiž měješe jich pohnuwać za něčim pohladać, štož drje kóždy čłowjek hdys a hdys zakrywa. Zdobom tež něšto sobu dóstachu, štož ma jich na zetkanje dopominać.
W swětle swěčkow móžachu wěriwi w Njebjelčanskej cyrkwi wšědny dźeń za sobu wostajić a so cyle hudźbnym a słownym přinoškam wěnować. Duchowny poda mysle k woblubowanemu serbskemu młodźinskemu kěrlušej.
Hdy začuwaš Ducha Swjateho najintensiwnišo? Za tym praša so młody awtor a zwěsća: Hdyž něšto přewinješ, móžeš něšto rjane začuwać.
Swójske zmylki přiznać je ćežko, ale hustodosć to čłowjek wot tamnych wočakuje. Kak so zadźeržiš, zo by mjezsobne wodaće móžne było? Młody Serb něšto naspomni, kiž móže z přikładom być.
Jutry swjeća křesćenjo nowe žiwjenje. Kotre symbole to předstajeja, zhonja dźěći na stronje za młódšich čitarjow. Zdobom móža w hódančku ćeknjeneho konja zaso namakać.
Miłočanski Křesćansko-socialny skutk z.t. zarjaduje w Zežiwjenskim a zelowym centrumje klóštra Marijina hwězda w Pančicach-Kukowje swójbne popołdnjo. Wone budźe srjedu, 8. apryla, wot 14.00 do 18.00 hodź.
Serbske dekanatne młodźinske dušepastyrstwo přeprošuje wšitkich młodostnych na Emmauske pućowanje. Wone budźe štwórtk, 9. apryla, w Sulšecach. Započatk je we 18.00 hodź.
W Budyskim Serbskim muzeju předstaja sobotu, 11. apryla, wot 13.00 do 18.00 hodź. wosebite techniki stareho rjemjesła a ručneho dźěła kaž reparowanje plećenych stólcow, ćišć z modlemi, předźenje, wušiwanje abo wužrawanje jutrownych jejkow. W 16.00 a 17.00 hodź. poskićuja zdobom wodźenje k nałožkam a rjemjesłu.
Ludowi wuměłcy wustajeja a předawaja wot wulkeho pjatka do jutrowneje póndźele, 3. do 6. apryla, stajnje wot 10.00 do 18.00 hodź. w Budyskim Serbskim muzeju jutrowne jejka. Wone su we wšelakich serbskich debjenskich technikach zhotowjene.
Pod temu „Hišće zakryte klóšterske pokłady: nowše slědźenja k bibliotece kaž tež archiwej klóštra Marijineje Hwězdy“, přednošuja a diskutuja wědomostnicy z Drježdźan a Lipska. Zarjadowanje wotměje so wutoru, 14. apryla w 19.00 hodź. w Čerwjenej žurli klóštra.
Z wulkim orchestrom a chórom Budyskeho Serbskeho ludoweho ansambla, z chórami Budyšin, Lipa, Meja a Łužica, kaž tež ze solistami Danielu Hazec, Stefanie Hauptfleisch, Patrikom Hornákom a Clemensom Heidrichom zaklinči w tutej jónkrótnej konstelaciji předstajenje oratorija „Nalěća“ Korla Awgusta Kocora a Handrija Zejlerja. Předstajenja su planowane pjatk, 24. apryla, w 19.30 hodź. w Budyšinje kaž tež sobotu, 25. apryla w Drježdźanach a njedźelu, 26. apryla w Choćebuzu, stajnje w 17.00 hodź. Kartki předawaja mjez druhim online na internetowej stronje ansambla. Link je pod www.posol.de wozjewjeny.
Młodostni z cyłeho Drježdźansko-Mišnjanskeho biskopstwa su přeprošeni, pěši abo
z kolesom zhromadnje do klóštra Marijineje hwězdy w Pančicach-Kukowje putnikować.
Tam wotměje so sobotu a njedźelu, 13. a 14. junija, zjězd biskopstwoweje młodźiny. Na nim čaka na putnikow pisany program ze wšelakimi dźěłarničkami, modlenjom, spěwanjom a zhromadnej Božej mšu.
Młodostni wot 14 lět kaž tež młodźi dorosćeni Drježdźansko-Mišnjanskeho biskopstwa su na zhromadny kónc tydźenja k demokratiji do Winfriedoweho domu w Schmiedebergu přeprošeni, a to wot pjatka do njedźele, 24. do 26. apryla. Tak zeznajomja so mjez druhim ze wšelakimi móžnosćemi, kak móža na politiskim polu sobu rěčeć a kak wopačne informacije wotkrywaja. Štóž chcył so na zarjadowanju wobdźělić, měł so hač do njedźele, 12. apryla, online přizjewić.
Dekanatne dušepastyrstwo za dźěći a młodźinu we Worklecach přeprošuje šulerki a šulerjow nětčišeho 4. do 8. lětnika w lětnich prózdninach na jězbu do Zhorjelca. Wona wotměje so wot póndźele do pjatka, 3. do 7. awgusta. Přizjewjenja přijimuja hač do pjatka, 1. meje, online.
Drježdźansko-Mišnjanske biskopstwo poskićuje tež lětsa zaso zawod do tematiki nabožnych prózdninskich dnjow. Prěnje tajke zarjadowanje budźe póndźelu, 11. meje, wot 18.00 do 21.00 hodź. na Budyskej farje. Dalše je mjez druhim srjedu, 27. meje, w Drježdźanach planowane. Zdobom poskića zamołwići zawod tež online přez platformu Zoom, a to štwórtk, 28. meje, wot 18.00 do 21.00 hodź. Přizjewjenja přijimuja online.
Drježdźanska katedrala Najswjećišeje Trojicy bu před 275 lětami poswjećena. K tomu su w diecezy wobšěrny program z hudźbnymi předstajenjemi a čitanjemi zestajeli. Wjeršk ma swjatočna Boža mša w juniju z biskopom Heinrichom Timmereversom być.
Mužojo, kotřiž chcedźa teologiju studować a so z měšnikom stać, móža so wot nazymy we wobłuku studija na to přihotować. Tež mužojo bjez matury, ale z wotzamknjenym powołanskim wukubłanjom móža so na puć měšnistwa podać. Do požadanja wotměja so w biskopskim ordinariaće w Drježdźanach orientaciske rozmołwy, za kotrež měli so zajimowani mužojo w personalnym wotrjedźe přizjewić.
Lětsa nazymu zahaja na Fachowej akademiji za wosadnu pastoralku w Magdeburgu nowy wukubłanski kurs za muži, kotřiž chcyli so ze stajnym diakonom w ciwilnym powołanju stać. Zajimcy měli při zahajenju wukubłanja znajmjeńša 35 lět być a nic starši hač 50 lět.
Zajimcy, kotřiž chcyli pastoralnu słužbu we wosadźe wukonjeć, móža lětsa nazymu wukubłanje na wosadneho referenta zahajić. Žony a mužojo, kiž tak mnohostronske słužby a charismy wěriwych podpěraja a spěchuja, móža so ze studijom nabožneje pedagogiki respektiwnje teologije a nawjazowaceho třilětneho wukubłanja za tajku słužbu kwalifikować.
Serbska protyka
