Katolski Posoł – 10. meje 2026
Njewidźomny kaž powětr, mócny kaž wichor, mjelčo kaž dych: Biblija wopisuje Swjateho Ducha we wobrazach. W času krizow a njewěstosćow praša so duchowny w zawodnym nastawku: Kak rěči Duch Boži dźensa k nam a kak móžemy jeho rěč nawuknyć?
Sakscy zastupjerjo cyrkwje a politiki wopytachu město, kiž płaći jako centrum europskeje politiki. W srjedźišću ekumeniskeje delegacije stejachu rozmołwy wo demokratiji, towaršnostnej stabiliće a zhromadnych hódnotach Europy. Wobdźěliłoj běštaj so tež Serbaj.
Na přednoškomaj w Kulowje a Worklecach rozprawještej wobdźělnicy wo putnikowanju, na kotrejž wobdźělištej so lětsa w februaru z družkami. Připosłucharjo mjez druhim zhonichu, kotry wokomik bě wjeršk jězby do Wěčneho města.
W klóštrje Marijinej hwězdźe woswjeći emeritowana abatisa rědki jubilej. Mjeztym 88lětna Serbowka rozłoži, na čo twari, a ma zdobom poručenje.
Modlitwa, zhromadnosć a nazhonjenja wo wěrje postajowachu putnisku jězbu serbskeje skupiny do Medźugorja. Mjez wokomikami na Křižnej horje a zetkanjom z ludźimi, kotřiž přińdu z ćežkich žiwjenskich wobstejnosćow, pytachu wobdźělnicy za nadźiju, měrom a nowej bliskosću k Bohu.
Wuměłc Georg Baselitz njeje swój pochad z Łužicy ženje zaprěwał, štož so tež w jeho mjenu špiheluje. Spisowaćel Benedikt Dyrlich dopomina na zetkanja wuměłca ze serbskej kulturu.
Porodna stacija w Kamjencu je za wjele ludźi je wjele wjace hač prosće jedna ze stacijow chorownje. Nětko ma so wona zawrěć. Mać třoch dźěći so praša: Što so zhubi, hdyž tele městno hižo njebudźe?
Pod hesłom „Jězus – chlěb žiwjenja“ swjećeše šěsć holcow a sydom hólcow w Njebjelčanskej cyrkwi swoje prěnje swjate woprawjenje. Jedna z maćerjow wo tym rozprawja, z kotrymi symbolemi a gestami swjedźenske kemše wuhotowachu.
Kulowska kolpingowa swójba přeprošuje na rozmołwny koncert do tamnišeje Křižneje cyrkwje. Tón budźe tutu njedźelu, 10. meje, w 19.30 hodź. Pod titulom „Hudźba a stwórba – Wo potajnstwach hudźby“ přednjese zwukowy wuměłc Joachim Karl Schäfer solowe twórby na korneće a na trompeće melodije, znate z cyrkwje, opery a koncertneje žurle. Zastup je darmotny, wo dary proša.
Kantor Drježdźanskeje cyrkwje Našeje knjenje Matthias Grünert wuhotuje srjedu, 13. meje, pišćelowy koncert w cyrkwi klóštra Marijineje hwězdy w Pančicach-Kukowje. Započatk je we 18.00 hodź. Zastup je darmotny, wo dary proša.
Towarstwo Cyrila a Metoda z.t. (TCM) přeprošuje na mejski nyšpor, kotryž budźe njedźelu, 17. meje, w 17.00 hodź. w Róžeńčanskej swjatnicy. Chór Bratrowstwa jón wobrubi. Wšitcy su wutrobnje witani.
Chór Lipa přeprošuje zhromadnje ze Sakskim Křesćansko-socialnym kubłanskim skutkom wšitkich zajimcow na nalětni koncert, kotryž wuhotuje njedźelu, 31. meje, w 15.30 hodź. na zahrodźe Zežiwjenskeho a zeloweho centruma w klóštrje Marijinej hwězdźe w Pančicach-Kukowje. Program wuhotuja Lipjenjo zhromadnje z Błótowskim žónskim chórom z Lubina w błótowskej serbskej drasće kaž tež Lipjanskej dźěćinu Lipki. Wot 15.00 hodź. poskića tam swačinu.
Sekcija swójby Towarstwa Cyrila a Metoda z.t. (TCM) přeprošuje dźěći 4. a 5. lětnika, so sobotu, 13. junija, zhromadnje z klóšterskim hajnikom Guidom Budarjom z Božej stwórbu bliže zeznajomić. Wone zetkaja so w 10.00 hodź. w Smječkecach při hajnkowni, Winicowa 13 (Weinbergstraße), hdźež so zarjadowanje w 14.00 hodź. tež skónči. Wottam podadźa so pěši na puć po lěsu, zo bychu Božu stwórbu widźeli, słyšeli a čuli. Za to trjebaja krute črije a wotpowědnu drastu. Pućowanje wotměje so tež při špatnym wjedrje. Mjez druhim móža wobdźělnicy štomiki a druhe rostliny sadźeć. Přinošk wučinja tři eura na dźěćo. Wobdźělić móže so jeničce 20 dźěći. Wotkaz k přizjewjenju je pod www.posol.de podaty.
Koparski turněr ministrantow ze serbskich wosadow budźe sobotu, 27. junija, w Pěskecach. Započatk je w 9.00 hodź. z Božej mšu we wjesnej kapałce.
Na zhromadny dźeń z krosnowanjom přeprošuje Swójbny zwjazk katolikow w Drježdźansko-Mišnjanskim biskopstwje pory do dožiwjenskeho parka w Moritzburgu přeprošeni. Tón wotměje so sobotu, 6. junija, wot 10.00 do 16.00 hodź. a hodźi so zdobom za pory, kotryž so na sakrament mandźelstwa přihotuja. Swójski přinošk kóždeho porika wučinja 80,00 eurow a wobsahuje wuhotowanje za krosnowanje, zastup do dožiwjenskeho parka kaž tež napoj. Wo ćělne derjeměće měł so kóždy sam starać.
W Lubiju wotměje so wot pjatka do njedźele, 29. do 31. meje, wjacednjowska konferenca AUGEN:BLICK wšelakich křesćanskich wosadow a skutkow Hornjeje Łužicy. Mjez referentami budźe sobotu, 30. meje, w 19.30 hodź. tež znaty filozof, teologa a referent dr. Johannes Hartl. Wječor steji pod hesłom „Unter dem Blick Jesu“. Worklečanske dekanatne dušepastyrstwo za młodźinu přeprošuje serbskich młodostnych, sej na přednošk dojěć a po tym w tak mjenowanej lounge wječor z přikuskom, dušepastyrstwom kaž tež poskitkami k modlenju wuklinčeć dać. Wotjězd z awtami je w 17.00 hodź., mjez druhim z Chrósćic, planowany. Wróćo pojědu něhdźe w 22.30 hodź. Zastup je darmotny. Přizjewjenje přijimuje dekanatne dušepastyrstwo za młodźinu online hač do pjatka, 22. meje. Link je pod www.posol.de wozjewjeny. Štóž ma zajim, móže so tež samostatnje na dalšich dźělach konferency wobdźělić.
Prědowanje w MDR serbskim rozhłosu ma tutu njedźelu, 10. meje, serbski ewangelski superintendent Krystof Rummel z Hodźija. Wotkaz na nabožne wusyłanje w mediatece MDR je pod www.posol.de podaty, zdobom chowa so za QR-codom.
Radworske Šmitec-Schwarzec busowe předewzaće přeprošuje na putnisku jězbu k pasionskim hram do awstriskeho St. Margarethena, kotraž so wot pjatka do wutory, 26. do 30. junija, wotměje. Předstajenje budźe tam pod hołym njebjom před kulisu skały. Jězbu přewodźeć budźe farar Gabriš Nawka. Nimo toho poskićuja kołojězby. Zajimcy móža so pola Šmitec-Schwarzec wozydłownistwa w Radworju přizjewić, telefonowe čisło (03 59 35) 28 60. Městna su hišće swobodne.
Dalšu jězbu Radworskeho Šmitec-Schwarzec busoweho předewzaća pod hesłom „Wěra zetka hudźbu“ budźe wot póndźele do štwórtka, 10. do 13. awgusta, do Erfurta. Wobdźělnicy wopytaja mjez druhim klóšter awgustinow a tamniši měšniski seminar. Dale wobdźěla so na Erfurtskich domowych swjedźenskich hrach, hdźež předstaja musical „Jesus Christus Superstar“. Přizjewjenja přijimuje Šmitec-Schwarzec wozydłownistwa w Radworju, telefonowe čisło (03 59 35) 28 60. Městna su hišće swobodne.
Młodostni z cyłeho Drježdźansko-Mišnjanskeho biskopstwa su přeprošeni, pěši abo
z kolesom zhromadnje do klóštra Marijineje hwězdy w Pančicach-Kukowje putnikować.
Tam wotměje so sobotu a njedźelu, 13. a 14. junija, zjězd biskopstwoweje młodźiny. Na nim čaka na putnikow pisany program ze wšelakimi dźěłarničkami, modlenjom, spěwanjom a zhromadnej Božej mšu.
Dekanatne dušepastyrstwo za dźěći a młodźinu we Worklecach přeprošuje šulerki a šulerjow nětčišeho 4. do 8. lětnika w lětnich prózdninach na jězbu do Zhorjelca. Wona wotměje so wot póndźele do pjatka, 3. do 7. awgusta. Přizjewjenja přijimuja hač do póndźele, 1. junija, online.
Drježdźansko-Mišnjanske biskopstwo poskićuje tež lětsa zaso zawod do tematiki nabožnych prózdninskich dnjow. Prěnje tajke zarjadowanje budźe póndźelu, 11. meje, wot 18.00 do 21.00 hodź. na Budyskej farje. Dalše je mjez druhim srjedu, 27. meje, w Drježdźanach planowane. Zdobom poskića zamołwići zawod tež online přez platformu Zoom, a to štwórtk, 28. meje, wot 18.00 do 21.00 hodź. Přizjewjenja přijimuja online.
Drježdźanska katedrala Najswjećišeje Trojicy bu před 275 lětami poswjećena. K tomu su w diecezy wobšěrny program z hudźbnymi předstajenjemi a čitanjemi zestajeli. Wjeršk ma swjatočna Boža mša w juniju z biskopom Heinrichom Timmereversom być.
Mužojo, kotřiž chcedźa teologiju studować a so z měšnikom stać, móža so wot nazymy we wobłuku studija na to přihotować. Tež mužojo bjez matury, ale z wotzamknjenym powołanskim wukubłanjom móža so na puć měšnistwa podać. Do požadanja wotměja so w biskopskim ordinariaće w Drježdźanach orientaciske rozmołwy, za kotrež měli so zajimowani mužojo w personalnym wotrjedźe přizjewić.
Lětsa nazymu zahaja na Fachowej akademiji za wosadnu pastoralku w Magdeburgu nowy wukubłanski kurs za muži, kotřiž chcyli so ze stajnym diakonom w ciwilnym powołanju stać. Zajimcy měli při zahajenju wukubłanja znajmjeńša 35 lět być a nic starši hač 50 lět.
Zajimcy, kotřiž chcyli pastoralnu słužbu we wosadźe wukonjeć, móža lětsa nazymu wukubłanje na wosadneho referenta zahajić. Žony a mužojo, kiž tak mnohostronske słužby a charismy wěriwych podpěraja a spěchuja, móža so ze studijom nabožneje pedagogiki respektiwnje teologije a nawjazowaceho třilětneho wukubłanja za tajku słužbu kwalifikować.
Serbska protyka
