Katolski Posoł – 17. meje 2026
„Wjeselće so nad ćerpjenjom!“ Namołwa ze Swjateho Pisma kaž přećiwk čłowjeskeho nazhonjenja skutkuje. Awtor zawodneho nastawka wujasnja, što móža wusměšowani, wuzamknjeni a ćěsnjeni na wobswět wuprudźeć.
Hdyž je ličba šulerjow nabožiny na šulach přesnadna, hrozy strach, zo so předmjet zhubi. W Sakskej kročitej cyrkej a kultusowe ministerstwo nětko po nowych pućach. Nadrobniše informacije dóstanu zajimcy póndźelu, 18. meje, wot 18.00 do 19.00 hodź. we wobłuku widejoweje konferency.
Ralbičanski wosadny farar Šćěpan Delan je nowy swjaty křiž Čórlichec swójby w Konjecach poswjećił. Napis na křižu sposrědkuje při tym widźomne znamjo wěry.
„Njeprajće nihdy haj při telefonje“ – tuta sada płaći dźensa jako škit před wobšudnikami. Tola před wjace hač 2.000 lětami dokładnje jeničke „haj“ swět přeměni. Mjez dwělemi, horjom a nadźiju powěda stawizna wo wosobje, kotraž je so při tym cyle na Boha spušćała.
„Sćěhuj mje!“ Słowje z lońšeho pasionskeho předstajenja w Chrósćicach staštej so za młodeho Serba z wjace hač jenož bibliskim poselstwom. Wón poda so na puć a absolwuje wukubłanje, kiž jeho wukmanja, zo ewangelij hišće bóle mjez ludźimi žiwy je.
Z dwurěčnymi spěwami, symbolemi a gestami je wosom dźěći w Baćońskej cyrkwi swoje prěnje swjate woprawjenje swjećiło. Što pak rekwizita prózdneje šklě na Božej mši woznamjenjowaše, wo tym pisaštej awtorce w swojim přinošku.
W Chrósćicach je 29 dźěći prěni raz k blidu Božemu přistupiło. Z wučbu, modlitwu a prěnjej swjatej spowědźu běchu so na tónle wosebity dźeń přihotowali. Młodej maćeri mjez druhim wo tym rozprawjatej, kotry emocionalny zaćišć swjatočnosć w nich zawostaji.
Mjez jutrownej pychu, marijanskimi kěrlušemi a nadźiju sta so Róžeńčanska swjatnica znowa z městnom tróšta. Putnicy přijimowachu sakrament, kotryž ma jich we wonkownych a nutřkownych ranach skrućeć.
Z chorhojemi a w uniformami su wohnjowi wobornicy w Róžeńčanskej hnadownej cyrkwi Božu mšu swjećili. W prědowanju zwurazni Chróšćanski farar Měrćin Deleńk připóznawace słowa za ludźi, kotřiž su w prawym wokomiku při druhich.
Zhromadny přihot, rozmołwy, modlenje a wuhotowanje cyrkwje: W Radworju je biskop Heinrich Timmerevers 45 młodostnym sakrament firmowanja darił. Kotry wosebity podawk na nyšporje swjatočnosć wudospołni, wo tym pisa młoda wobdźělnica.
Wujednanje jako puć a nic jenož jako wokomik: W swojim prědowanju w hnadownym městnje Hejnicy je pólski swjećacy biskop Piotr Wawrzynek na něšto namołwjał, štož měło so mjez ludźimi a ludami znowa hojić.
Katolske nabožne wusyłanje w Serbskim rozhłosu MDR ma tutu njedźelu, 17. meje, tachantski farar Wito Sćapan z Budyšina.
Kantor Drježdźanskeje cyrkwje Našeje knjenje Matthias Grünert wuhotuje njedźelu,
17. meje, pišćelowy koncert w třoch cyrkwjach w Kamjencu. W 16.00 hodź. w cyrkwi swjateho Justa, w 17.30 hodź. w klóšterskej cyrkwi swjateje Hany a w 19.00 hodź.
we hłownej cyrkwi swjateje Marije. Zastup je darmotny, wo dary proša.
Towarstwo Cyrila a Metoda z.t. (TCM) přeprošuje na mejski nyšpor, kotryž budźe njedźelu, 17. meje, w 17.00 hodź. w Róžeńčanskej swjatnicy. Chór Bratrowstwa jón wobrubi. Wšitcy su wutrobnje witani.
Na mjezynarodnym dnju muzejow njedźelu, 17. meje, móža zajimcy tež Budyski Serbski muzej darmotnje wopytać. W 17.00 hodź. poskićuja mjez druhim wodźenje k temje „Nowa Doba“ – Serbja w powójnskim času a zažnej NDR z muzeologom Alexandrom Pólkom. Wšitcy zajimcy su wutrobnje přeprošeni.
Při serbskim wodźenju srjedu, 20. meje, we 18.00 hodź. móža sej zajimcy Mały Wjelkow bliže wotkryć. Historikarka Serbskeho instituta dr. Lubina Malinkowa budźe so při tym wuwiću wsy a jeho wuznamje za serbske kulturne stawizny wěnować. Městnosć njebě jeno wažne nabožne srjedźišćo ewangelskich Serbow, ale w 18. lětstotku tež centrum serbskeho pismowstwa. Wodźenje zahaji so na Zinzendorfowym naměsće a wotměwa so w rjedźe Serbskeho instituta „Sorabistika po puću“.
W Lubiju wotměje so wot pjatka do njedźele, 29. do 31. meje, wjacednjowska konferenca AUGEN:BLICK wšelakich křesćanskich wosadow a skutkow Hornjeje Łužicy. Mjez referentami budźe sobotu, 30. meje, w 19.30 hodź. tež znaty filozof, teologa a referent dr. Johannes Hartl. Wječor steji pod hesłom „Unter dem Blick Jesu“. Worklečanske dekanatne dušepastyrstwo za młodźinu přeprošuje serbskich młodostnych, sej na přednošk dojěć a po tym w tak mjenowanej lounge wječor z přikuskom, dušepastyrstwom kaž tež poskitkami k modlenju wuklinčeć dać. Wotjězd z awtami je w 17.00 hodź., mjez druhim z Chrósćic, planowany. Wróćo pojědu něhdźe w 22.30 hodź. Zastup je darmotny. Přizjewjenje přijimuje dekanatne dušepastyrstwo za młodźinu online hač do pjatka, 22. meje. Štóž ma zajim, móže so tež samostatnje na dalšich dźělach konferency wobdźělić.
Pod hesłom „Miły wětřik nas nosy“ přeprošuje Budyski Serbski ludowy ansambl (SLA) na wjesoły koncert operetow ze Serbskej komornej filharmoniju, kotryž budźe sobotu, 23. meje, w 19.30 hodź. na žurli SLA. Mjez druhim zaklinča twórby Johannesa Brahmsa kaž tež wobdźěłanja serbskich a rumunskich ludowych spěwow. Zastupne lisćiki su w interneće a online na předań. Link je pod www.posol.de podaty.
Budyski tachantski organist Kamil Maksymilian Kulawik hraje njedźelu, 31. meje,
na pišćelach klóšterskeje cyrkwje w Marijinym Dole we Wostrowcu. Spočatk je
w 16.00 hodź. Zastup je darmotny, wo dary proša.
Chór Lipa přeprošuje zhromadnje ze Sakskim Křesćansko-socialnym kubłanskim skutkom wšitkich zajimcow na nalětni koncert, kotryž wuhotuje njedźelu, 31. meje, w 15.30 hodź. na zahrodźe Zežiwjenskeho a zeloweho centruma w klóštrje Marijinej hwězdźe w Pančicach-Kukowje. Program wuhotuja Lipjenjo zhromadnje z Błótowskim žónskim chórom z Lubina w błótowskej serbskej drasće kaž tež Lipjanskej dźěćinu Lipki. Wot 15.00 hodź. poskića tam swačinu.
Dekanatne dušepastyrstwo za dźěći a młodźinu we Worklecach přeprošuje šulerki a šulerjow nětčišeho 4. do 8. lětnika w lětnich prózdninach na jězbu do Zhorjelca. Wona wotměje so wot póndźele do pjatka, 3. do 7. awgusta. Přizjewjenja přijimuja hač do póndźele, 1. junija, online.
Sekcija swójby Towarstwa Cyrila a Metoda z.t. (TCM) přeprošuje dźěći 4. a 5. lětnika, so sobotu, 13. junija, zhromadnje z klóšterskim hajnikom Guidom Budarjom z Božej stwórbu bliže zeznajomić. Wone zetkaja so w 10.00 hodź. w Smječkecach při hajnkowni, Winicowa 13 (Weinbergstraße), hdźež so zarjadowanje w 14.00 hodź. tež skónči. Wottam podadźa so pěši na puć po lěsu, zo bychu Božu stwórbu widźeli, słyšeli a čuli. Za to trjebaja krute črije a wotpowědnu drastu. Pućowanje wotměje so tež při špatnym wjedrje. Mjez druhim móža wobdźělnicy štomiki a druhe rostliny sadźeć. Přinošk wučinja tři eura na dźěćo. Wobdźělić móže so jeničce 20 dźěći.
Młodostni z cyłeho Drježdźansko-Mišnjanskeho biskopstwa su přeprošeni, pěši abo
z kolesom zhromadnje do klóštra Marijineje hwězdy w Pančicach-Kukowje putnikować.
Tam wotměje so sobotu a njedźelu, 13. a 14. junija, zjězd biskopstwoweje młodźiny. Na nim čaka na putnikow pisany program ze wšelakimi dźěłarničkami, modlenjom, spěwanjom a zhromadnej Božej mšu.
Koparski turněr ministrantow ze serbskich wosadow budźe sobotu, 27. junija, w Pěskecach. Započatk je w 9.00 hodź. z Božej mšu we wjesnej kapałce.
Kedźbu! Putniske kemše w Krupce budu srjedu, 29.7. w 10 hodź. W newsletteru je wopačny termin (22.7.) podaty. Młodostni podadźa so wot njedźele, 26.7. do pjatka 31.7. na swoje putnikowanje.
Štóž chce kemši z busom sobu jěć, měł so w Radworskim Šmitec wozydłownistwje přizjewić, telefonowe čisło (03 59 35) 28 60.
Dalšu jězbu Radworskeho Šmitec-Schwarzec busoweho předewzaća pod hesłom „Wěra zetka hudźbu“ budźe wot póndźele do štwórtka, 10. do 13. awgusta, do Erfurta. Wobdźělnicy wopytaja mjez druhim klóšter awgustinow a tamniši měšniski seminar. Dale wobdźěla so na Erfurtskich domowych swjedźenskich hrach, hdźež předstaja musical „Jesus Christus Superstar“. Přizjewjenja přijimuje Šmitec-Schwarzec wozydłownistwa w Radworju, telefonowe čisło (03 59 35) 28 60. Městna su hišće swobodne.
Drježdźanska katedrala Najswjećišeje Trojicy bu před 275 lětami poswjećena. K tomu su w diecezy wobšěrny program z hudźbnymi předstajenjemi a čitanjemi zestajeli. Wjeršk ma swjatočna Boža mša w juniju z biskopom Heinrichom Timmereversom być.
Mužojo, kotřiž chcedźa teologiju studować a so z měšnikom stać, móža so wot přichodneho lěta 2027 we wobłuku studija na to přihotować. Tež mužojo bjez matury, ale z wotzamknjenym powołanskim wukubłanjom móža so na puć měšnistwa podać. Do požadanja wotměja so w biskopskim ordinariaće w Drježdźanach orientaciske rozmołwy. Dokładne přizjewjenske terminy so hišće wozjewja.
Serbska protyka
