Katolski Posoł – 16. awgusta 2026
Kajka ma cyrkej być? Awtor zawodneho nastawka na konkretnym přikładźe praksu cyrkwje wopisuje, kiž měri so na prašenje: Kak by drje Jězus dźensa jednał?
W sewjernej Čěskej su na něhdyšu wjes Fukov spominali, kotrejež cyrkej bu rozbuchnjena. Tajke wopomnjenske zarjadowanja chcedźa tež w přichodźe na dalšich městnach Čěskeje přewjesć.
Serbscy wosadni podachu so na městno we Łužicy, hdźež móža wopytowarjo takrjec na zahrodźe Getsemani přebywać a samo do synagogi hić. Nawoda areala hosći předstaji jim mjez druhim samotwarjenu wolijowu prasu.
Serbowka wobdźěli so prěni raz na putnikowanju dorosćenych do Krupki. Wona pisa wo za nju hnujacych wokomikach, ale tež wo njewěstosćach, kiž dyrbješe přewinyć.
Třeći raz je so młoda Serbowka na młodźinskim swjedźenju w Medźugorju wobdźěliła. Tam dožiwi wšelake swědčenja wěry a dósta nowe impulsy za swójski puć.
Baron Felix von Loë dyrbješe za swoje zasadźenje za katolsku wěru na poł lěta do jastwa. Tehdyši bamž pak jeho za to počesći. Wón je daloki přiwuzny hrabinki Moniki zu Stolberg-Stolberg.
Třeći raz je so młoda Serbowka na młodźinskim swjedźenju w Medźugorju wobdźěliła. Tam dožiwi wšelake swědčenja wěry a dósta nowe impulsy za swójski puć.
Katolske nabožne wusyłanje w Serbskim rozhłosu MDR ma tutu njedźelu, 16. awgusta, Budyski tachantski farar, kanonik Wito Sćapan.
Křesćansko-socialny kubłanski skutk z.t. přeprošuje zhromadnje z klóštrom Marijinej hwězdu na zelowu njedźelu do Zežiwjenskeje a zeloweje zahrody w Pančicach-Kukowje. Na hosći čaka tutu njedźelu, 16. awgusta, wot 13.00 hodź. pisany program, mjez druhim z Wudworskim folklornym ansamblom, tež zelowe a regionalne wiki so wotměja. Zakónčacy ekumeniski nyšpor budźe w 17.00 hodź.
Budyski Serbski ludowy ansambl (SLA) a Smochčanske kubłanišćo swjateho Bena přeprošujetej tež lětsa na hudźbny swjedźeń na dworje kubłanišća. Pjatk a sobotu, 21. a 22. awgusta, wotmějetej so tam prěni raz „Serbskej nocy“. Započatk je stajnje w 20.00 hodź. W programje předstajeja znate, ale tež na pozabyte twórby z nimale 75 lět stawiznow SLA. Nimo hudźbneho programa změje Smochčanski dom tež kulinariski poskitk regionalneje kuchnje. Zastupny lisćik za hudźbny swjedźeń móža sej zajimcy mjez druhim online kupić.
Serbske ewangelske towarstwo a Maćijec swójba přeprošujetej wšitkich Serbow na lětnje pućowanje a serbski swjedźeń sobotu, 22. awgusta. Započatk je w 14.00 hodź. na Jaworkec/Maćijec statoku w Hrubjelčicach, Ćěchorječanska 16. Wottam podadźa so na pućowanje do wokoliny. Po tym budźe na Jaworkec/Maćijec dworje kofej spřihotowany. Přizamknje so w 17.00 hodź. serbska ekumeniska nutrnosć z dekanom Witom Sćapanom a superintendentom Krystofom Rummelom. Wot 18.00 hodź. hač do nocy sćěhuje hudźba Drježdźanskeje kapały Podka pod nawodom Jurja Čornaka.
Chór Meja přeprošuje na swój lětni koncert, kotryž budźe njedźelu, 30. awgusta, w 16.00 hodź. na farskej zahrodźe w Radworju. Swačinu poskića hižo wot 15.30 hodź. Dźěći rejwarskeje skupiny Łužičanka program sobu wobrubja.
Sekcija Swójba Towarstwa Cyrila a Metoda z.t. přeprošuje swójby na zabawne popołdnjo, kotrež wotměje so njedźelu, 13. septembra, we Wotrowje. Spočatk budźe w 15.00 hodź. při Starej šuli. Po wsy powjedźe Měrko Pohonč. Dźěći móža sej při kwisu najwšelakoriše myta zdobyć. Po wodźenju su wšitcy na swačinu na farje prošeni.
Wjacore katolske akademije wuchodnych biskopstwow poskićeja onlinowu diskusiju socialnje wuwaženy přichod renty nastupajo. Diskutować budźetaj wutoru, 25. awgusta, we 18.00 hodź. mjez druhim prezidentka zwjazka Carity Eva Maria Welskop-Deffaa a zapósłanc Europskeho parlamenta Oliver Schenk.
Serbska dekanatna młodźina je tež lětsa na zhromadny wulět prošena, kotryž budźe njedźelu, 13. septembra. Přeprošeni su tohorunja młodostni wot přichodneho 9. lětnika. Planowane je z busom do Sprjowjow (Sprey) pola Hamora jěć, hdźež budźe zhromadny nyšpor. Přizamknje so čołmikowanje z Čelna do Noweho Města nad Sprjewju. Tam wulět z grilowanjom wuklinči. Zajimcy měli so hač do póndźele, 24. awgusta, online přizjewić.
Prěnje serbske křižerske putnikowanje do Roma wotměje so wot soboty do soboty, 1. do 8. meje 2027. Wobdźělnicy wobhladaja sej nimo hłownych cyrkwjow tež katakombu Domitilla. Hłowny programowy dypk budźe wobdźělenje na generalnej awdiency bamža Leja XIV. we Vatikanje, dožiwja pak tež spřisahanje nowych Šwicarskich gardistow.
Drježdźansko-Mišnjanski biskop Heinrich Timmerevers swjeći sobotu, 5. septembra, slěborny jubilej swojeje biskopskeje swjećizny. Swjedźenske kemše su w 10.30 hodź. w Drježdźanskej katedrali. Na nje su wšitcy přeprošeni.
Serbska protyka
