Katolski Posoł – 23. awgusta 2026
Pokazujo na wšelake zhladowanja nastupajo Jězusowu wosobu w běhu lětstotkow, zaběra so młody teologa z prašenjom, kiž Jězus w ewangeliju tuteje njedźele staji. Awtor wuwjedźe, hdźe wěriwi dźensa wotmołwu na tele prašenje nańdu.
Serbska rjadniska sotra woswjeći tele dny wosebity jubilej. Hačrunjež zwonka Łužicy bydlaca, so wšědnje za wšón serbski lud a kraj modli.
Wospjet wotmě so na Zežiwjenskej a zelowej zahrodźe klóštra Marijineje hwězdy w Pančicach-Kukowje ekumeniski nyšpor ze žohnowanjom zelow. Superintendent Tilmann Popp wuzběhny w swojim prědowanju swjateho, kiž měješe recept za žiwjenje, kotryž wón kóždemu doporuča.
Dźesatki serbskich wěriwych dojědźechu sej na swjedźenju Marije donjebjeswzaća na sewjeročěske putniske městno. Tam woswjećichu 300lětne załoženje cyrkwje Marije donjebjeswzaća a 200lětnu tradiciju tamnišeho putnikowanja.
Serbscy křižerjo móža so na ekskluziwnym podawku klětu w Romje wobdźělić. Přewodnikaj na jězbje Cyril Hančik a Tadej Šiman powědataj w interviewje što křižerjo tam wšitko dožiwja. Zdobom je kruh wobdźělnikow nětko rozšěrjeny a přizjewjenska doba podlěšena.
Katolske nabožne wusyłanje w Serbskim rozhłosu MDR ma tutu njedźelu, 23. awgusta, Chróšćanski farar Měrćin Deleńk.
Berlinske arcybiskopstwo kaž tež Zhorjelska, Erfurtska a Drježdźansko-Mišnjanska dieceza poskićuja zhromadnje z pućowanskim běrowom Biblische Reisen ze Stuttgarta zajimowanym młodostnym a młodym dorosćenym wot 18 do 35 lět jězbu na klětuše swětowe zetkanje młodźiny w Južnej Koreji. Wona wotměje so wot srjedy, 28. julija, do póndźele, 9. awgusta 2027, w Seoulu.
Serbska dekanatna młodźina je tež lětsa na zhromadny wulět prošena, kotryž budźe njedźelu, 13. septembra. Přeprošeni su tohorunja młodostni wot přichodneho 9. lětnika. Planowane je z busom do Sprjowjow (Sprey) pola Hamora jěć, hdźež budźe zhromadny nyšpor. Přizamknje so čołmikowanje z Čelna do Noweho Města nad Sprjewju. Tam wulět z grilowanjom wuklinči. Zajimcy měli so hač do póndźele, 24. awgusta, online přizjewić.
Z Kulowa pochadźacy pater Fabian Rječka, referent za politisku komunikaciju Jezuitskeje słužby za ćěkancow w Němskej (JRS), přeprošuje zajimcow na zhromadnu rozmołwu wo nazhonjenjach a prašenjach w zwisku z připućowanjom ćěkancow. Wona wotměje so wutoru, 1. septembra, wot 19.00 do 20.30 hodź. w Budyskim ekumeniskim tachantskim wobchodźe. Wón chce starosće a nadźije chutnje brać, mytosy wujasnić a k mjezyčłowjeskemu angažementej pozbudźować. Zarjadowanje skići zdobom dohlad do wšědneho dźěła JRS z ćěkancami a ma wid za čłowjeskosć w debaće rozšěrić.
Chór Meja přeprošuje na swój lětni koncert, kotryž budźe njedźelu, 30. awgusta, w 16.00 hodź. na farskej zahrodźe w Radworju. Swačinu poskića hižo wot 15.30 hodź. Dźěći rejwarskeje skupiny Łužičanka program sobu wobrubja.
Drježdźansko-Mišnjanski biskop Heinrich Timmerevers swjeći sobotu, 5. septembra, slěborny jubilej swojeje biskopskeje swjećizny. Swjedźenske kemše su w 10.30 hodź. w Drježdźanskej katedrali. Na nje su wšitcy přeprošeni.
W Hodźiju swjeća njedźelu, 13. septembra, w 9.30 hodź. składnostnje 950lětneho jubileja, zo bu pod biskopom Benom prěnja kamjentna cyrkej natwarjena, dwurěčnu Božu słužbu. Swjedźenski prědar budźe sakski krajny biskop Tobias Bilz. Wšitke chóry Hodźijskeje wosady chcedźa kemše wobrubić. Wočakuja katolske a ewangelske Serbowki w narodnej drasće.
Serbski dom wobdźěli so na Dnju wotewrjeneho pomnika njedźelu, 13. septembra, w kotrymž je tež redakcija Katolskeho Posoła zaměstnjena. Wšitcy zajimcy móža sej wot 10.00 do 17.00 hodź. dom bliže wobhladać a mjez druhim rumnosći Katolskeho Posoła wopytać. Wšitcy su wutrobnje witani.
Sekcija Swójba Towarstwa Cyrila a Metoda z.t. přeprošuje swójby na zabawne popołdnjo, kotrež wotměje so njedźelu, 13. septembra, we Wotrowje. Spočatk budźe w 15.00 hodź. při Starej šuli. Po wsy powjedźe Měrko Pohonč. Dźěći móža sej při kwisu najwšelakoriše myta zdobyć. Po wodźenju su wšitcy na swačinu na farje prošeni.
Serbska protyka
