Katolski Posoł – 25. oktobra 2026
Lubosć k blišemu ma wšelake wuměnjenja, kotrež rozłožuje awtor zawodneho nastawka. Při tym pokaza tež na swjateho, kiž je so wobšěrnje z prašenjom lubosće zaběrał.
Nowa kniha „Oasen im Osten 2“ Lipšćanskeho nakładnistwa swjateho Bena předstaja městnosće, kiž měli inspirowace skutkować. W nim so tež znaty pomnik w dwurěčnej Łužicy wopisuje.
Ministranća ze wšitkich serbskich wosadow su so na lětušim koparskim turněrje w Pěskecach wobdźělili. Wospjet mějachu při něčim wulke zbožo.
Něhdyši Drježdźansko-Mišnjanski biskop Joachim Reinelt woswjeći tele dny swoje 90. narodniny. Z čim je sej pola Serbow spěšnje wutroby zdobył, wo tym pisa awtor nastawka nadrobnišo.
Dołholětny něhdyši předsyda Towarstwa Cyrila a Metoda z.T. dokónči tele dny swoje 80. žiwjenske lěto. Wuwučeny elektrikar njehori so jenož za lajske dźiwadło, ale běše tež přewšo aktiwny we wosadźe.
„Kóžde žiwjenje, tež najrozłamliwiše, je dźiw“. Tole rysuje nowa wustajeńca wo zbrašenosći w klóštrje Marijinej hwězdźe w Pančicach-Kukowje. Wona chce tež něšto dalše zwuraznić, štož so hustohdy nawopak wobhladuje.
Njewšědny wopyt z Japanskeje běše jedna tema w oktoberskich wudaćach Katolskeho Posoła před 100 lětami. Ale tež wo poswjećenju Radworskeje šule tam wobšěrnje rozprawjachu.
Na přijeću Zhorjelskeho biskopstwa rěčeše awtor a žurnalist wjetšeje němskeje nowiny wo něčim, štož sej wšědnje wuwědomi. Při tym referent něšto zwěsći, štož so křesćanam w modernej towaršnosći dźeń a časćišo ćešo zdawa.
W Kulowskej wosadnej cyrkwi wotměje so na reformaciskim dnju, sobotu, 31. oktobra, w 17.00 hodź. koncert składnostnje 200. posmjertnin komponista Carla Marije von Webera. Hudźbne popołdnjo wuhotuje ewangelske kantorstwo z Ottendorfa-Okrille/Weixdorfa zhromadnje z orchestrom Drježdźanskich hudźbnikow. Cyłkowny nawod změje dr. Klaus Holzweißig. Zaklinči mjez druhim tak mjenowana „Freischützmesse“ Carla Marije von Webera. Zastup je darmotny, wo dary proša.
Składnostnje klětušeje 500. róčnicy historiskeho zakitowanje bamža – Sacco di Roma – wopomina tole Šwicarska garda w lěće 2027. Serbscy křižerjo na putnikowanju do Roma su te stron Šwicarskeje přeprošeni, so na tym wobdźělić. Zajimowani móža so za jězbu hišće hač do kónca oktobra tule přizjewić.
Katolske nabožne wusyłanje w Serbskim rozhłosu MDR ma tutu njedźelu, 25. oktobra, kapłan Pětr Mróz z Budyšina.
Wšitke dźěći, kotrež so na prěnje swjate woprawjenje přihotuja, su na zhromadny dźeń do Njebjelčic přeprošene. Tón budźe srjedu, 18. nowembra, wot 9.00 do 15.00 hodź. Započatk je z Božej mšu w cyrkwi, na kotruž su tež starši wutrobnje witani. Zajimcy njech so hač do wutory, 27. oktobra, přizjewja.
Premjera noweje zběrki z tekstami młodych awtorow „LitMiks ‘26“ budźe wutoru,
27. oktobra, w 19.30 hodź. w internaće Budyskeho Serbskeho gymnazija. Šulerjo gymnazija čitanje hudźbnje wobrubja. Dalšej čitani wotmějetej so pjatk, 30. oktobra, w 19.30 hodź. w Chróšćanskim kaž tež pjatk, 27. nowembra, w 19.30 hodź. w Radworskim młodźinskim klubje a budźetej tohorunja hudźbnje wobrubjenej.
Towarstwo Cyrila a Metoda z.t. (TCM) chce tež lětsa ze swojej nazymskej akciju „Łužica pomha“ diecezanskemu zwjazkej Carity w pólskim Ełku zaso pomhać. Tam wjesela so nade wšěm, štož w swójbje trjebaš, kaž su to drasta, črije, artikle hygieny a kosmetika za žony a wosebje za dźěći, ale tež płokanski próšk, kuchinske graty abo pampersy za dźěći runje tak kaž za dorosćenych. Słódkosće měli separatnje spakować. Wotedać hodźa so dary po móžnosći w měchach – sćěhowace dny pola Špitankec w Zejicach, Kamjenska dróha 10: sobotu, 7. nowembra, wot 9.00 do 12.00 hodź., pjatk, 13. nowembra. wot 15.00 do 18.00 hodź. kaž tež sobotu, 14. nowembra, wot 9.00 do 11.00 hodź.
Na digitalne zarjadowanje pod titulom „Nadźija na žiwjenskich mjezach. Liturgiski přewod w chorosći, mrěću a žarowanju“ přeprošuja Němski liturgiski institut, Katolska akademija Drježdźansko-Mišnjanskeho biskopstwa a partnerojo. Zarjadowanje wotměje so sobotu, 7. nowembra, wot 9.30 do 13.00 hodź. Wobdźělenje je tež jako jednotliwc abo jako skupina móžne. Zajimcy měli so za zarjadowanje online přizjewić.
Młodźi dorosćeni w starobje 18 do 35 lět su na kubłansku jězbu klětu wot pjatka do njedźele, 15. do, 17. januara, do Winfriedoweho doma w Schmiedebergu přeprošeni. Při rozmołwach, kreatiwnych dźěłarničkach a wšelakich hrach změja woni składnosć nowych ludźi zeznać, nowe nazhonjenja zběrać a při tym sej swójsku wěru znowa wotkryć. Přizjewić móža so zajimcy online. Tam su tež płaćizny podate.
Seminar k přihotej na sakrament mandźelstwa wotměje so wot pjatka do soboty, 27. do 28. nowembra, w Smochčanskim kubłanišću swjateho Bena. Přizjewjenja Dekanatne dušepastyrstwo młodźiny we Worklecach online přijimuje.
Nowy duchowny poskitk je redakciski team Dekanatneho dušepastyrstwa za młodźinu we Worklecach spřihotował. Wotnětka móža so zajimcy krasnosćiwy róžowc w serbskej rěči sobu modlić, kotryž je online wozjewjeny.
Pod titulom „Zbrašenosć. Žana hranica! – Tysac lět nazhonjenjow – wot Hermanna Chromeho hač do dźensnišeho“ přeprošuje wustajeńca do klóštra Marijineje hwězdy w Pančicach-Kukowje, so z tutej temu zaběrać. Wustajeńca je w rumnosći mjez klóšterskim dworom a parkowanišćom hač do njedźele, 3. nowembra, přistupna a wšědnje wot 16.00 do 19.00 hodź. kaž tež po telefoniskim přizjewjenju pod čisłom (01 76) 87 85 20 69 wotewrjena.
Wšitcy młodostni a młodźi dorosćeni w starobje 18 do 35 lět – tež serbscy – su přeprošeni, so zhromadnje na europske zetkanje Taizéskeje zhromadnosće podać. Wone wotměje so wot póndźele, 28. decembra, do pjatka, 1. januara, we Łódźi.
Dalše pokiwy su w Powšitkownych wozjewjenjach podate.
Serbska protyka
