Katolski Posoł – 15. nowembra 2026
Na kotre wašnje móžeš Bohu pokazać, zo jemu dowěrješ? Kak móžeš talenty, kotrež sy přez křćeńcu dóstał, prawje zasadźeć? Wotmołwy na prašenja ewangelija tuteje njedźele skića rjadnik w swojim zawodnym nastawku.
Přichod kemšaceho žiwjenja w serbskich wosadach je wohroženy. Na to skedźbnja liturgiski referent Drježdźansko-Mišnjanskeho biskopstwa. Za Serbski pastoralny rum wopisuje wupuć.
Biblija njeje jeničce jedna kniha, ale cyła biblioteka 73 knihow. Druhi dźěl impulsoweje serije wuswětla, zo njeje tale lěttysacy stara zběrka z modlitwow, lubosćinskich basnjow a čłowjeskich bjezdnow sprostnjena wučbnica, ale čiłe swědčenje wěry.
Prěnjowoprawjenske dźěći Njebjelčanskeje wosady předstajichu na swjedźenju swjateho Měrćina stawiznu wo nim. Z laternjemi sej po tym po wsy hač na faru doběžachu, hdźež dóstachu překwapjenku.
Wosebity deal mjez bamžom a ludom dopomha k natwarjej a zdźerženju Pětroweje cyrkwje w Romje, kotruž před 400 lětami poswjećichu. Awtorka přinoška wopisuje dalše dawne a dźensniše formy financowanja bamžowskeje baziliki.
Pomocnicy su swjatolětny pomnik pola Stróžišća wurjedźili. Towarstwo Cyrila a Metoda jako mějićel běše k tomu přeprosył.
Serbscy křižerjo, kotřiž chcedźa so klětu na putnikowanju wot soboty do soboty, 1. do 8. meje, wobdźělić, móža so na internetowej stronje www.posol.de hač do póndźele, 30. nowembra, přizjewić. Tam su nadrobne informacije podate. Kruh móžnych wobdźělnikow je powjetšeny a doba přizjewjenja podlěšena.
Katolske nabožne wusyłanje w Serbskim rozhłosu MDR ma tutu njedźelu, 15. nowembra, farar Beno Jakubaš z Radworja. Ewangelske nabožne wusyłanje pokutny dźeń, srjedu, 18. nowembra, změje fararka Jadwiga Malinkowa z Budyšina.
W Tuchorskim lěsu wotměje so pokutny dźeń, srjedu, 18. nowembra, w 10.00 hodź. dwurěčny ekumeniski nyšpor před jednym z něhdyšich bunkrow. Wšitcy zajimcy su wutrobnje přeprošeni.
Worklečanske dekanatne dušepastyrstwo za dźěći přeprošuje šulerjow nětčišeho 4. do 8. lětnika klětu w lětnich prózdninach na jězbu do Hainewaldy. Wona wotměje so wot póndźele do pjatka, 2. do 6. awgusta. Přizjewjenja přijimuje dekanatne dušepastyrstwo hač do pjatka, 1. meje 2027, online.
Młodźi dorosćeni w starobje 18 do 35 lět su na kubłansku jězbu klětu wot pjatka do njedźele, 15. do, 17. januara, do Winfriedoweho doma w Schmiedebergu přeprošeni. Při rozmołwach, kreatiwnych dźěłarničkach a wšelakich hrach změja woni składnosć nowych ludźi zeznać, nowe nazhonjenja zběrać a při tym sej swójsku wěru znowa wotkryć. Přizjewić móža so zajimcy online. Tam su tež płaćizny podate.
Worklečanske dekanatne dušepastyrstwo za młodźinu poskićuje tež klětu seminaraj k přihotej na sakrament mandźelstwa. Prěni tajki pjatk a sobotu, 5. a 6. měrca, budźe w Smochčanskim kubłanišću swjateho Bena. Za dalši pjatk a sobotu, 26. a 27. nowembra, městnosć hišće wozjewja. Přizjewjenja za wobaj seminaraj su online móžne.
Na zhromadne zarjadowanje je dekanatna młodźina tež lětsa na swjedźenju Chrysta Krala, njedźelu, 22. nowembra, do Chrósćic prošena. Započatk je w 14.00 hodź. z nyšporom w cyrkwi, kotryž wobrubi hudźbna skupina Zynkopa. Po tym budźe Marko Bulank-Paška wo wašnjach chowanja zemrětych přednošować.
Nowy duchowny poskitk je redakciski team Dekanatneho dušepastyrstwa za młodźinu we Worklecach spřihotował. Wotnětka móža so zajimcy krasnosćiwy róžowc w serbskej rěči sobu modlić, kotryž je online wozjewjeny.
Na mjeztym 15. kulturnu zymu přeprošuje Monika Gerdesowa wšitkich zajimcow w přichodnych měsacach do swojeje putniskeje hospody w Chrósćicach. Zarjadowanja w serbskej a němskej rěči wotměja so zaso po sobotach, a to wot 28. nowembra hač do 27. februara, nimale tydźensce. Započatk je, nimo jednoho wječora, stajnje w 19.45 hodź.
Dalše pokiwy su w Powšitkownych wozjewjenjach podate.
Serbska protyka
