Katolski Posoł – 14. awgusta 2022
Smy hišće po puću, zwěsća awtor zawodneho nastawka. Tola wid na někoho móže křesćanow pozbudźować, zo měrniwje a zdobom połni zasadźenja, połni dowěry najebać wšitke prašenja a skóržby z cyłeje wutroby wěrja, wón doda.
Bamž Franciskus je dowěrnika Moskowskeho patriarcha, ale ukrainskeho wulkopósłanca přijał. Při tym dźěše mjez druhim wo wopyt swjateho wótca w Ukrainje.
Najstarši kardinal swětoweje cyrkwje je 98lětny zemrěł. Za Vatikan skutkowacy Słowjan njesmědźeše wjele lět swoju domiznu wopytać.
Wjetšina ludnosće w Němskej nima po reprezentatiwnym naprašowanju za dobre, zo bamž a cyrkej přećiwo morjenju dźěći w maćernym žiwoće stejišćo zabjerjetaj. Katolska nowina je zdobom wuslědźiła, kajke nastajenje k tomu mjez katolikami knježi.
Rukopis dweju wuměłcow, jednoho ze 16. lětstotka, druheho z přitomnosće, twori njewšědnu symbiozu Marijineho wołtarja w Naumburgskim domje. K tomu je sej šefredaktor swoje mysle činił.
Karmelitka, kotraž pochadźeše ze židowskeje swójby, je hladajo na swoje konsekwentne pytanje za wěrnosću, na swoju zmužitosć, łži so spřećiwjeć, na swój jasny wid za woprawdźitosć, na swoju wotewrjenosć za druhich po wuprajenju fachowcow z přikładom. Před 80 lětami bu wona wot nacijow morjena.
Swjatnica Bolosćiweje maćerje Božeje pomha, so duchownje wobnowić a w swojich naležnosćach swjatu Mariju wo pomoc prosyć. To rjekny kapłan na putniskich kemšach w Krupce. Tam běchu so nimo młodostnych putnikow tež dorosćeni w pěšej a dalši w kolesowarskej skupinje podali.
Něhdźe 50.000 młodostnych ze 70 krajow dožiwi lětuši Mladifest. Serbowka wopisuje swoje nazhonjenja na nim.
Serbski lud je dr. Pětr Brězan raz jutrowny lud mjenował. Ale to płaći tež na jeho wosobu: Wón je jutrowny čłowjek, dokelž je cyle z wěry do zrowastanjenja žiwy, pisa awtor składnostnje jeho 90. narodnin. Nimo toho přeradźa, kelko tysac kilometrow je jubilar jako pěši putnik hižo přešoł.
W Chrósćicach probuja lajscy dźiwadźelnicy hižo na wonka natwarjenym jewišću za inscenaciju „Mór a lubosć“. Premjera budźe sobotu, 10. septembra, w 19.30 hodź. Dalše předstajenja budu njedźelu, 11. septembra, w 16.00 hodź., wosebje za dźěći a seniorow, a potom pjatk, sobotu a njedźelu, 16., 17. a 18. septembra, w 19.30 hodź.
Kubłanske dny serbskeje młodźiny wotměja so wot pjatka do njedźele, 23. do 25. septembra. w Schmiedebergskim Winfriedowym domje. Zajimcy měli so hač do póndźele, 5. septembra, online přizjewić.
Dekanatne dušepastyrstwo młodźiny přeprošuje młodostnych ze wšěch serbskich wosadow na zhromadny wulět do Błótow, a to njedźelu, 11. septembra. Přizjewjenja přijimuja so hač do póndźele, 29. awgusta.
Dwě diecezy je biskop Christian Schreiber na jeju spočatku nawjedował: Mišnjansku a Berlinsku. Mjez Serbami je dopomnjeće na njeho zaćěmnjene. Wón je so 3. awgusta před 150 lětami w Hessenskej narodźił.
Smochčanske kubłanišćo swjateho Bena přeprošuje wot pjatka do njedźele, 14. do 16. oktobra, na tworjacy kurs „Bibliske powědace figury“. Při tym dźe wo bibliske powědace figury, kotrež mnohostronske gesty zwuraznjeja a kotrež hodźa so lochce do druheje postawy přetworić. Přeprošeni su ludźo kóždeježkuli staroby.
Serbske ewangelske towarstwo a Maćijec swójba z Hrubjelčic přeprošujetej wšitkich Serbow a dalšich zajimcow na lětnje pućowanje a serbski swjedźeń. Wonej wotmějetej so sobotu, 3. septembra, wot 14.00 hodź.
Wšitcy, kotřiž chcedźa swoju wěru pohłubšić a wjace wo třoch bójskich wosobach – Wótcu, Synu a Duchu Swjatym – wuslědźić, su wot pjatka do njedźele, 2. do 4. septembra, do Smochčanskeho kubłanišća swjateho Bena přeprošeni. W zarjadowanju z titlom „BASICS – teologija skónčnje zrozumliwa: Wuznaće wěry – Bóh Wótc, Syn a Duch Swjaty“ budu so krótke impulsowe referaty z dźěłarničkami a modlenjom wotměnjeć.
W Kulowje zhladuje tamniše Arcybratstwo swjateho róžowca lětsa na 350. róčnicu swojeho załoženja. Składnostnje tutoho jubileja ma wustajeńca nastać, za kotruž móža wěriwi wosebite róžowcy abo napisane wosobinske nazhonjenja z modlenjom róžowca na tamnišej farje wotedać.
Serbska protyka
