Katolski Posoł – 21. junija 2026
Křesćenjo měli swoju wěru w přiběrajcy sekularnej towaršnosći widźomnje wuznawać. Na kotre wašnja móhli to činić, wo tym rozmysluje duchowny w swojim zawodnym nastawku.
Dźesać dźěći bě sej přirodu a zwěrinu we Łuhowskim lěsu wotkryło. Što su mjez druhim wuhladali a što bě cyłkowny zaměr wuprawy, wo tym młoda wobdźělnica rozprawja.
W Sulšecach su nowy křiž poswjećili, kiž ma dwurěčny napis. W swojim přinošku awtorka wopisuje, što swójba z tym zwjazuje.
Seniorojo Njebjelčanskeje wosady swjećachu swój lětni swjedźeń. Na nim předstaji jim serbska awtorka powědančko swojeje maćerje, kotraž běše tohorunja spisowaćelka.
W klóštrje Marijinej hwězdźe zeńdźechu so młodostni cyłeho Drježdźansko-Mišnjanskeho biskopstwa. Kak su tam dóšli a z kotrymi nazhonjenjemi so domoj nawróća, wo tym młodostnaj rozprawjataj.
We Wojerecach woswjećichu ewangelscy Serbja cyrkwinski a domizniski dźeń. Na swjedźenskej Božej słužbje bu fararka Jadwiga Malinkowa do noweho zastojnstwa zapokazana. Zdobom běše na swjedźenju bohatosć ewangelskeje narodneje drasty widźomna.
Z Pólskeje pochadźacy bywši ceremoniar bamža Jana Pawoła II. so na wšelake podawizny ze swojeje słužbje we Vatikanje dopomina. Zdobom tež wšelake zajimawostki wo swjatym wótcu přeradźi.
Katolske nabožne wusyłanje w Serbskim rozhłosu MDR ma tutu njedźelu, 21. junija, farar Měrćin Deleńk z Chrósćic.
Serbskich digitalnych poskitkow je mjeztym wjele. Kotre pak scyła wužiwamy? A kotre poskitki a funkcije hač do dźensnišeho pobrachuja?
K tomu je Beno Brězan w nadawku Załožby za serbski lud krótke naprašowanje přihotował. Zaměr je, zo mnozy swoje mysle za přichod serbskich digitalnych poskitkow zapletu. Prěnja składnosć za to je, na prašenja w naprašniku wotmołwić. Mjez wšitkimi wobdźělnikami wulosuja so tři dobropisy po 50, 30 a 20 eurach za Sundownerowu baru w Budyšinje.
Drježdźansko-Mišnjanske biskopstwo swjeći lětsa 275. róčnicu wobstaća něhdyšeje Dwórskeje cyrkwje. Wjeršk swjatočnosćow budźe pontifikalna Boža mša z biskopom Heinrichom Timmereversom njedźelu, 28. junija, w 10.00 hodź., kotrež chce sćelak MDR w rozhłosu originalnje wusyłać. Kemše tohorunja přez livestream přenjesu.
Kedźbu! Serbske kemše w Drježdźanach njedźelu, 28. junija, w 15.00 hodź. njebudu.
Chór Meja přeprošuje na swój lětni koncert, kotryž budźe njedźelu, 28. junija, w 16.00 hodź. na farskej zahrodźe w Radworju. Wot 15.30 hodź. poskića swačinu. Jako hosći su sej lětsa dźěći rejwarskeje skupiny Łužičanka přeprosyli.
Drježdźanscy kapałnicy wuhotuja njedźelu, 28. junija, na předwječoru patronatneho dnja Budyskeje tachantskeje cyrkwje swjateho Pětra, we 18.00 hodź. w Božim domje nyšpor duchowneje hudźby. Tež póndźelu, 29. junija, na swjedźenju swjateju Pětra a Pawoła, budźe na samsnym městnje pontifikalna Boža mša w 9.00 hodź., kotruž Drježdźanscy kapałnicy wobrubja. Pod nawodom katedralneho kapałneho mištra Christiana J. Bonatha zaklinča wjacehłósne twórby wšelakich epochow. Wšitcy zajimcy su wutrobnje přeprošeni.
Na modlenje róžowca a před Najswjećišim su wěriwi sobotu, 4. julija, we 18.00 hodź. do Róžeńčanskeje hnadowneje cyrkwje přeprošeni. Paćerje budu w serbskej a němskej rěči spěwane.
Worklečanske dekanatne dušepastyrstwo za dźěći a młodźinu poskićuje kubłanje k prewenciji přećiwo seksualizowanej namocy. Wone wotměje so póndźelu, 29. junija, wot 16.30 do 19.45 hodź. we Worklečanskim Don Boskowym domje. Zarjadowanje, kiž budźe w němskej rěči, je za wšitkich pomocnikow nabožnych prózdninskich dnjow we wosadach winowatostne, ale tež za dalšich čestnohamtsce skutkowacych, kotřiž maja tam zwisk z dźěćimi a młodostnymi, na přikład w sakristiji abo ze šolu. Zajimcy měli so online přizjewić. Ličba městnow je wobmjezowana.
Drježdźansko-Mišnjanske biskopstwo startuje nazymu nowe wukubłanje, kotrež ludźi za to kwalifikuje, spirituelny poskitk „Eksercicijow we wšědnym žiwjenju“ samostatnje přewodźeć. Wukubłanje wupřestrěwa so wot septembra 2026 hač do nowembra 2027 w Drježdźanskim Domje Wysoke duby a prawidłownje tež digitalnje. Zajimcy měli so hač do srjedy, 1. julija, pak na mailku petramaria.brugger@bddmei.de abo g.giele@gmx.de přizjewić.
W cistercienskim prioraće w Nowej Cali wotměje so wot pjatka do njedźele, 3. do 5. julija, kongres „Adoratio“. Zajimcy měli so online abo z mailku na kontakt@mariafriedenshort.de přizjewić.
Dnjowa hladarnja Carity Carity „Při Krabatowym puću“ we Worklecach woswjeći sobotu, 4. julija, swoje pjećlětne wobstaće. To chce z hosćimi před domom hladarnje Při zelenišćach 5 činić, hdźež zahudźi wot 16.00 hodź. dujerska kapała Horjany. Wot 19.00 hodź. přewjedźe spěwny kwartet „PoŠtyrjoch“ zjawnu probu. Ćělne derjeměće budźe zaručene.
Lětuše putnikowanje młodźiny do Krupki je wot njedźele do pjatka, 26. do 31. julija. Putniske kemše w Krupce budu srjedu, 29. julija, w 10.00 hodź. Štóž chcył kemši z busom sobu jěć, měł so w Radworskim Šmitec-Schwarzec wozydłownistwje přizjewić, telefonowe čisło (03 59 35) 28 60.
W sewjeročěskim Vilémovje (Wölmsdorf) spominaja lětsa na 300. róčnicu poswjećenja tamnišeje cyrkwje Marije donjebjeswzaća. Tole kaž tež 200lětne wobstaće putnikowanja k swjatnicy, kiž měješe sčasami wobšěrny serbski podźěl, chcedźa na swjedźenju Marije donjebjeswzaća, sobotu, 15. awgusta, wopominać. Wosebje Łužiscy Serbja su na to wutrobnje přeprošeni.
Serbska protyka
