Katolski Posoł – 22. septembra 2024
Wo Jězusowym poselstwje w ewangeliju tuteje njedźele pisa serbski duchowny w swojim zawodnym nastawku. Mjez druhim wón zwuraznja, kotre wuhlady křesćan hladajo na nje ma.
Pastoralny koncept Serbskeho pastoralneho ruma předleži nětko jako ćišćany zešiwk. Zdobom je wón online přistupny.
W Chrósćicach su přihoty za klětušu pasionsku hru oficielnje zahajili. Na informaciskim wječorku zhonichu přitomni mjez druhim, štó přewozmje hłowne róle a štó wuměłske nawodnistwo. Nimo toho słyšachu něštožkuli k stawiznam pasionskich hrow w tamnišej wosadźe, kotrež sahaja hač do prěnjeje połojcy 20. lětstotka.
Statice cyrkwje wěnuje so serbski duchowny w swojim rozmyslowanju. Wón zaběra so z paralelemi mjez zjawami mandźelskich porow a tym, štož w zwisku z wěru napadnje.
Hakle loni nazymu je něhdyša fararjowa hospoza Kata Młynkec rědke narodniny woswjećiła. Nětko je wona w tutej žohnowanej starobje na prawdu Božu wotešła.
Chrósćicy a Kamjenc stejitej w srjedźišću Serbskeje protyki za lěto 2025, kotraž je tele dny w Budyskim Ludowym nakładnistwje Domowina wušła. Premjernje předstaja ju srjedu, 23. oktobra, w 19.00 hodź. w domje Röhrmeisterhaus na Lessingowym naměsće w Kamjencu.
Nowela ze šulskeho časa w dobje nacionalsocializma rysuje, kak ćežko móže być, pozdatnje njepowalne přećelstwo wobchować, a kak lochko je, w swěće bjez tradicionalnych wěstosćow jednorym ideologijam podležeć. Serbskorěčne wudaće je nětko w Lipšćanskim nakładnistwje Veles wušło. Knižna premjera budźe štwórtk, 26. septembra, w 19.00 hodź. w Budyskej Smolerjec kniharni.
W Radworju přihotuja znowazałoženje zhromadnosće, kotraž chce posylnjenju k modlenju skićić. Jako dalši krok su nětko směrnicy sformulowali.
Na próstwu Towarstwa Cyrila a Metoda z.t. (TCM) poskićuje Norman Reitner z Drježdźanskeho biskopskeho ordinariata kurs k tomu, kak móžeš projekty derje planować a k tomu pjenjezy na wšelakore wašnje požadać. Dalekubłanje na polu sponsoring a foundraising wotměje so sobotu, 9. nowembra, wot 9.00 do 16.00 hodź. na „Radlubinje“ w Ralbicach. Zajimcy – nimo čłonow TCM su tež dalši přeprošeni – měli so online přizjewić.
Wěriwi ze wšitkich serbskich wosadow su přeprošene, njedźelu, 6. oktobra, składnostnje róžowcoweje njedźele do Radworja přińć. Dwurěčna swjedźenska Boža mša, na kotrejž chcedźa Radworske Bratstwo swjateho róžowca wozrodźić, zahaji so w 9.30 hodź. Swjedźenski nyšpor a procesion z postawu swjateje Marije budźe w 14.00 hodź. Wěriwi, kotřiž chcedźa do Radworskeho Bratstwa swjateho róžowca zastupić, měli so na tamnišej farje abo pola fararja Bena Jakubaša přizjewić.
Chór 1. serbskeje kulturneje
brigady wuhotuje tutu njedźelu,
22. septembra,
w 17.00 hodź. w Baćońskej
cyrkwi nyšpor w formje
duchowneho koncerta.
Wšitcy zajimcy su wutrobnje
přeprošeni.
Dekanatne dušepastyrstwo za dźěći přeprošuje šulerki a šulerjow 1. a 2. lětnika na zhromadny dźeń pod hesłom „Jězus mój přećel“, kotryž wotměje so w nazymskich prózdninach w Don Boskowym domje we Worklecach. Wupytać móža sej, hač so štwórtk, 10. oktobra abo 17. oktobra, wot 9.00 do 15.00 hodź. wobdźěla. Přizjewić měli so zajimcy hač do pjatka, 4. oktobra, online.
Towarstwo Cyrila a Metoda z.t. (TCM), Sportowa jednotka 1922 Radwor kaž tež tamniši młodźinski klub přeprošuja sportowcow wšěch starobnych skupin wot šěsć lět na běh wo pokal zbóžneho Alojsa do Radworja. Tutón wotměje so štwórtk, 3. oktobra. Zajimcy měli so online přizjewić.
Orchester Budyskeho Serbskeho ludoweho ansambla (SLA) wuhotuje tutu njedźelu, 22. septembra, w 16.00 hodź. w Kulowskej cyrkwi Marije donjebjeswzaća zhromadnje ze spěwnymi solistami a organistom Tomašom Žurom portretowy koncert na česć Ulricha Pogody a Tomaša Žura składnostnje jeju 70. narodnin. Zastup je darmotny. Na kóncu budźe kolekta.
Drježdźansko-Mišnjanske biskopstwo přeprošuje wěriwych we wobłuku Swjateho lěta na diecezanske putnikowanje z biskopom Heinrichom Timmereversom do Roma. Wone wotměje so wot soboty do soboty, 11. do 18. oktobra 2025.
Serbska protyka
