Katolski Posoł – 26. januara 2025
Z tym, kak měła cyrkej wupadać, zaběra so duchowny w swojim zawodnym nastawku. Tak wón wuwjedźe, što měło ju a tež wěru wuznamjenjeć a čeho měła so wzdać.
Hižo dlěje hač 600 lět česćuja w serbskej wosadźe swjateho, kotryž běše w 3. lětstotku žiwy. Tak tež lětsa. Po nyšporje z procesionom běchu sobustawojo tamnišeho bratstwa ke kóždolětnej zhromadźiznje přeprošeni.
Z młodym organistom podachu so připosłucharjo pišćeloweho koncerta w Chróšćanskej cyrkwi w duchu do časa Johanna Sebastiana Bacha. Hósć běše nadměru wobdarjeny organist, pochadźacy ze wsy blisko Hornjeho Wujězda.
Němski katolski portal předstaja na swojej internetowej stronje bratstwo, kotrež bu loni w serbskej wosadźe wozrodźene. Za awtora je to kupa, hdźež so najebać spadowaceho modlenja wone dale pěstuje.
Jako ćichi muž je tachant na dobro serbskeho ludu skutkował. Na nyšporje a z modlenjom při jeho rowje na Budyskim Mikławšku běchu wěriwi składnostnje jeho 100. posmjertnin na jeho spominali.
Wo podawkomaj, kotrež jewja so w aktualnych januarskich čisłach Katolskeho Posoła, pisaše serbski časopis tohorunja hižo před sto lětami. Awtorka rubriki pak je tež dalše zajimawe přinoški našła.
Lětsa 27. januara je tomu 80 lět, zo bu němske koncentraciske lěhwo w dźensnišej Pólskej wuswobodźene. Mjez woporami běchu tež měšnicy a knježny. Mjeztym spominaja ludźo po wšěm swěće tón dźeń na wopory holocausta.
Wobsah Katolskeho Posoła lěta 2024 je dozestajany. Wšitcy, kotřiž chcedźa sej lětnik wjazać dać a wobsah sobu zapřijeć, móža sej dataju w formaće pdf z internetoweje strony www.posol.de wućišćeć. Štóž tajku móžnosć nima, njech so na redakciju w Budyskim Serbskim domje pod telefonowym čisłom (0 35 91) 55 02 12 wobroći.
We wobłuku Kulturneje zymy w putniskej hospodźe Moniki Gerdesoweje w Chrósćicach přednošuje hosćićelka sama sobotu, 1. februara, k temje „Na slědach swjateho Franca – Camino di Assisi“. Započatk je w 19.45 hodź. Hižo w 16.00 hodź. poskićuje wona serbske dźěćace kino. Wšitcy zajimcy su wutrobnje přeprošeni.
Na swjedźensku Božu mšu na wopomnjenskim dnju zbóžneho martrarja Alojsa Andrickeho su wěriwi póndźelu, 3. februara, we 18.30 hodź. do Radworja prošeni. Swjedźenski prědar budźe farar Matthias Kocner z Budyšina. Po kemšach je šijeswjećenje.
K temje „Pěši do Roma. Jurja Wawrikowy putniski dźenik z lěta 1842“ přednošuje dr. Lubina Malinkowa z Budyskeho Serbskeho instituta wutoru, 11. februara, w 19.00 hodź. na žurli Budyskeho Zwjazka archiwow na Hrodowej 12. Zastup je darmotny.
Pod hesłom „Pój, wjesel so!“ su dźěći 1. a 2. lětnika w zymskich prózdninach do Don Boskoweho domu we Worklecach přeprošene. Zarjadowani wotmějetej so po wutoromaj, 18. kaž tež 25. februara, wot 9.00 do 15.00 hodź. Přizjewjenje je hač do njedźele, 9. februara móžne. Njech so dźěći póstnisce předrasća.
Na serbsku putnisku jězbu do Weserskich horin wot póndźele do štwórtka, 14. do 17. julija, přeprošuje Radworske Šmitec-Schwarzec busowe wozydłownistwo. Duchowny nawod změje farar Gabriš Nawka. Přizjewjenja přijimuja w Radworju, telefonowe čisło (03 59 35) 28 60.
Dwurěčna putniska jězba do Medźugorja wotměje so wot soboty, 26. apryla, hač do soboty, 3. meje. Zajimcy měli so hač do pjatka, 31. januara, pola Andreje Brandner přizjewić, pak telefonisce pod čisłom (01 71) 7 42 33 81 pak z mailku na adresu medjugorje2025-april@gmx.de.
Na putnisku jězbu do Lourdesa a La Salette wot pjatka do njedźele, 16. do 25. meje, přeprošuje Šěrachowski pućowanski běrow A-Teams. Wobdźělnicy wopytaja mjez druhim tež Monaco a Avignon. Dalše informacije a přizjewjenja dóstanu zajimcy pola Matthiasa Hadanka w Hórkach pod telefonowym čisłom (01 63) 7 33 82 05 abo w interneće pod www.ateams.de.
Ambulantna hospicna słužba Hornjołužiskeho zwjazka Carity
z.t. w Kamjencu poskićuje lětsa zaso kurs k čestnohamtskemu
přewodźenju ćežkochorych a mrějacych. Štóž chcył
wukubłanje absolwować, měł so pola hospicneje słužby
Carity w Kamjencu přizjewić.
Drježdźansko-Mišnjanske biskopstwo přeprošuje wěriwych we wobłuku Swjateho lěta na diecezanske putnikowanje z biskopom Heinrichom Timmereversom do Roma. Wone wotměje so wot soboty do soboty, 11. do 18. oktobra.
Serbska protyka
