Katolski Posoł – 2. junija 2024
Wo cyrobje na puć pisa serbski duchowny w swojim zawodnym nastawku. Mjez druhim wón zwuraznja, što chce Jězus kóždemu křesćanej na kóždej Božej mši rjec.
Towarstwo Cyrila a Metoda bě wěriwych ze serbskich wosadow tež lětsa na nyšpor do Róžeńčanskeje swjatnicy přeprosyło. Wuhotował běše jón serbska spěwna trójka.
Kóždolětny mejski nyšpor pod hołym njebjom swjećachu w Baćońskej wosadźe tónraz w Smochćicach. Tam zhromadźichu so při křižu, kotryž běchu swójbni před wjace hač dwěmaj lětomaj „skradźu“ postajili, pozdźišo pak poswjećić dali.
Mału wjesnu kapałku serbskeje wsy wopyta raz samo cyła biskopska konferenca. Ze swjedźenskimi kemšemi zhladowachu wěriwi nětko na stotu róčnicu jeje poswjećenja.
Na přednošk pod hesłom „Suicid wotwobarać – žiwjenju šansu dać“ přeprošuje Hornjołužiske telefonowe dušepastyrstwo. Tón změje ekspertka štwórtk, 13. junija, w Kamjencu. W rozmołwje z Katolskim Posołom jeho nawodnica rozłoži, čehodla so tutej temje wěnuja.
W Šěrachowje wotmě so dźěłarnička k starym pěsnjam z jasnym zwukom z kyrka. Što so za tym chowa a kotre dopomnjenki spěwanje we njej wubudźi, wo tym pisa awtorka w swojim přinošku.
Tři chóry su poslednju mejsku njedźelu na zahrodźe Zežiwjenskeho a zeloweho centruma w klóštrje Marijinej hwězdźe w Pančicach-Kukowje koncertowali. Mjez druhim zaklinča medlej znateho serbskeho načasneho hudźbnika.
Na młodźinskim putnikowanju Zhorjelskeho biskopstwa do Noweje Cale wobdźělichu so tež serbscy młodostni. W srjedźišću steješe swjata, kotraž je patronka tamnišeje diecezy.
Skupina serbskich młodostnych wobdźěli so w Drježdźanach na Fête de l’Europe. Europski młodźinski swjedźeń wotmě so składnostnje statneho wopyta francoskeho prezidenta Emmanuela Macrona w Sakskej.
Serbski młodostny a ministrant rozmysluje w swojim přinošku wo žiwym wuznaću k wěrje. Zdobom pisa wón wo swjatym, kotryž je najswjećiši sakrament ze swojim žiwjenjom woprował.
Čłonojo bratstwa swjateho Bosćana su w Chrósćicach mejski nyšpor swjećili. Na zhromadźiznje, kotraž so jemu přizamkny, mjez druhim wothłosowachu, komu chcedźa z pjenježnym darom pomhać a tak dobrotu wopokazać.
Składnostnje 500lětneje róčnicy, zo buchu relikwije swjateho Bena w Mišnje k česći wołtarjow pozběhnjene, su wšitcy wěriwi ze serbskich wosadow na zhromadny swjedźenski nyšpor do Radworja přeprošeni. Tón budźe njedźelu, 16. junija, w 14.00 hodź. w tamnišej wosadnej cyrkwi.
Smochčanske kubłanišćo swjateho Bena přeprošuje tež lětsa na swójbnu njedźelu. Wona budźe na swjedźenju swjateho Bena, njedźelu, 16. junija, wot 10.30 do 15.00 hodź. Po swójbnych kemšach wočakuje hosći zaso pisany jewišćowy program, mjez druhim z hudźbu, serbskimi rejemi, klankodźiwadłom kaž tež dźěćacym cirkusom Krabatino.
Drježdźansko-Mišnjanske biskopstwo přeprošuje wěriwych we wobłuku Swjateho lěta na diecezanske putnikowanje z biskopom Heinrichom Timmereversom do Roma. Wone wotměje so wot soboty do soboty, 11. do 18. oktobra 2025.
Chróšćanska wosada so tuchwilu na swoju 800. róčnicu prěnjeho naspomnjenja klětu přihotuje. K jubilejej ma w meji 2025 w Budyskim Ludowym nakładnistwje Domowina (LND) kniha wuńć. LND prosy wšitkich, kotřiž maja dotal njeznate historiske fota ze žiwjenja w Chrósćicach a wokolnych wsach – wosebje fota hač do Druheje swětoweje wójny a z NDRskeho časa –, so přizjewić.
Serbska protyka
