Katolski Posoł – 9. junija 2024
Patron Drježdźansko-Mišnjanskeho biskopstwa, kotrehož sej Serbja jako swojeho japoštoła česća, steji w srjedźišću zawodneho nastawka serbskeho duchowneho. Mjez druhim wón zwuraznja, što wony swjaty křesćanam dźensa hišće wozjewja.
Wuchodoněmska dieceza běše hosćićel 103. zjězda katolikow Němskeje. Na nim so drje Serbja ze swójskim stejnišćom njewobdźělichu, běchu pak mjez jeho wopytowarjemi. Zdobom běše Serbowka na prominentnym městnje do zakónčaceje Božeje mšě zapřijata.
Serbski pastoralny koncept je dopisany a bu swjatkowničku Drježdźansko-Mišnjanskemu biskopej přepodaty. Wo jeho wobsahu a wužadanjach do přichoda pisa serbski duchowny a nawoda gremija w swojim přinošku. Koncept so w blišim času tule posłownje serbsce a němsce wozjewi.
Widźomne znamjo wěry je Radworski farar Beno Jakubaš we Wulkej Dubrawje poswjećił. Wone je prěnje tajkeho razu we wsy.
W Janskich kupjelach w Smječkecach zhromadźichu so wobydlerjo tamnišeho Domu swjateho Jana kaž tež wěriwi ze Smječkec a Worklec k mejskemu nyšporej. Swjećił běše jón Chróšćanski farar Měrćin Deleńk.
Gołkojcy w Delnjej Łužicy běchu lětuši hosćićel Serbskeho ewangelskeho cyrkwinskeho dnja. Mjez přitomnymi běchu tež mnozy Serbja z Hornjeje Łužicy.
Na swojim lětušim wulěće podachu so samostejacy ze serbskich wosadow tónraz do srjedźneje Łužicy. Wjetšinje z nich běše kónčina, kotruž sej wobhladachu, njeznata.
We wobłuku swojeje lětnjeje koncertneje jězby k zakónčenju šulskeho lěta budu Drježdźanscy kapałnicy póndźelu, 17. junija, w 19.00 hodź. duchowny koncert w Chróšćanskej cyrkwi swjateju Symana a Judy wuhotować. Wšitcy su wutrobnje přeprošeni.
Drježdźanscy kapałnicy, hudźbnicy Sakskeje statneje kapały a solisća předstaja sobotu, 15. junija, w 19.30 hodź. w Drježdźanskej dwórskej cyrkwi znatu twórbu komponista Georga Friedricha Händela. Hižo w 17.30 hodź. poskićuja zawod do twórby.
Składnostnje 500lětneje róčnicy, zo buchu relikwije swjateho Bena w Mišnje k česći wołtarjow pozběhnjene, su wšitcy wěriwi ze serbskich wosadow na zhromadny swjedźenski nyšpor do Radworja přeprošeni. Tón budźe njedźelu, 16. junija, w 14.00 hodź. w tamnišej wosadnej cyrkwi.
Wulět dekanatneje młodźiny budźe sobotu, 24. awgusta. Přeprošeni su młodostni wot přichodneho 9. lětnika kaž tež młodźi dorosćeni. Přizjewjenja přijimuja hač do srjedy, 7. awgusta, online.
Na přednošk pod hesłom „Suicid wotwobarać – žiwjenju šansu dać“ přeprošuje Hornjołužiske telefonowe dušepastyrstwo. Tón změje ekspertka štwórtk, 13. junija, w Kamjencu. W rozmołwje z Katolskim Posołom jeho nawodnica rozłoži, čehodla so tutej temje wěnuja.
Smochčanske kubłanišćo swjateho Bena přeprošuje tež lětsa na swójbnu njedźelu. Wona budźe na swjedźenju swjateho Bena, njedźelu, 16. junija, wot 10.30 do 15.00 hodź. Po swójbnych kemšach wočakuje hosći zaso pisany jewišćowy program, mjez druhim z hudźbu, serbskimi rejemi, klankodźiwadłom kaž tež dźěćacym cirkusom Krabatino.
Drježdźansko-Mišnjanske biskopstwo přeprošuje wěriwych we wobłuku Swjateho lěta na diecezanske putnikowanje z biskopom Heinrichom Timmereversom do Roma. Wone wotměje so wot soboty do soboty, 11. do 18. oktobra 2025.
Chróšćanska wosada so tuchwilu na swoju 800. róčnicu prěnjeho naspomnjenja klětu přihotuje. K jubilejej ma w meji 2025 w Budyskim Ludowym nakładnistwje Domowina (LND) kniha wuńć. LND prosy wšitkich, kotřiž maja dotal njeznate historiske fota ze žiwjenja w Chrósćicach a wokolnych wsach – wosebje fota hač do Druheje swětoweje wójny a z NDRskeho časa –, so přizjewić.
Serbska protyka
