Katolski Posoł – 21. julija 2024
Wo dožiwjenju na kěrchowje a dwuzmyslnym symbolu čłowječeho organa pisa serbski duchowny w zawodnym nastawku. Mjez druhim wón kuzłarsku medicinu mjenuje, kotraž móhła při jeho roztorhanosći pomhać.
W třećim prózdninskim tydźenju přebywaše 28 dźěći z jich přewodźerjemi w Lückendorfje w Žitawskich horach. Na jězbu běše Worklečanske dekanatne dušepastyrstwo za dźěći přeprosyło.
Dalšich swjatych, kotrež móža při wšelakich ćežach, tež w dowolu, pomhać, předstaja awtorka w druhim a zdobom poslednim dźělu swojeho přinoška. Tak wěnuje so mjez druhim patronej sportowcow a patronce při swójbnych zwadach.
Čas žiwjenja je sotra Mechthild Donatec jako boromejka Bohu Knjezej swěrnje słužiła. Nětko je wona na prawdu Božu wotešła.
Pod hesłom „Jedna stawizna – jedna wjes – jedna zahoritosć“ předstaji sta lajskich dźiwadźelnikow na zetkanju němskorěčnych skupin mjezynarodneho zjednoćenstwa Europasion w Sömmersdorfje pasionsku hru. Na zarjadowanju wobdźěli so tež delegacija Serbow.
Drježdźansko-Mišnjanske biskopstwo pyta za swoje Smochčanske kubłanišćo swjateho Bena wosobu, kotraž chcyła dom jako wobchodny hotelowy manager nawjedować. Połne dźěłowe městno ma so k přichodnemu móžnemu terminej wobsadźić. Požadanja přijimuja z mejlku w datajowym formaće PDF hač do přichodneje wutory, 23. julija.
„Nožicy, kamjeń, papjera“ rěka kónc tydźenja, na kotryž su nanojo ze swojimi dźěćimi do Smochčanskeho kubłanišća swjateho Bena přeprošeni. Tón wotměje so wot pjatka do njedźele, 23. do 25. awgusta. Přizjewić móža so zajimcy hač do pjatka, 2. awgusta.
Pod hesłom „Što tam spěwa, lěta, šumi?“ přeprošuje sekcija Swójba Towarstwa Cyrila a Metoda z.t. (TCM) w kooperaciji z Dekanatnym dušepastyrstwom za dźěći na zhromadny dźeń za šulerjow wot 4. do 6. lětnika w Njeswačanskim hrodźe. Tón budźe sobotu, 10. awgusta, wot 10.00 do 14.00 hodź.
Kubłanske dny serbskeje młodźiny wotměja so wot pjatka do njedźele, 27. do 29. septembra, w ponowjenym Schmiedebergskim Winfriedowym domje. Wobdźělnicy změja składnosć po přirodźe pućować, so zhromadnje modlić a spěwać kaž tež duchownje so posylnjeć. Zajimcy měli so hač do póndźele, 29. julija, online přizjewić.
Pod hesłom „Kreuz und quer“ su młodostni na diecezanske zetkanje młodźiny do Wechselburga přeprošeni. Wone budźe pjatk a sobotu, 13. a 14. septembra, w tamnišim klóštrje. Serbscy wobdźělnicy móža sej tam zhromadnje dojěć. Přizjewić móža so hač do soboty, 24. awgusta, online.
Wulět dekanatneje młodźiny budźe sobotu, 24. awgusta. Přeprošeni su młodostni wot přichodneho 9. lětnika kaž tež młodźi dorosćeni. Přizjewjenja přijimuja hač do srjedy, 7. awgusta, online.
Drježdźansko-Mišnjanske biskopstwo přeprošuje wěriwych we wobłuku Swjateho lěta na diecezanske putnikowanje z biskopom Heinrichom Timmereversom do Roma. Wone wotměje so wot soboty do soboty, 11. do 18. oktobra 2025.
Chróšćanska wosada so tuchwilu na swoju 800. róčnicu prěnjeho naspomnjenja klětu přihotuje. K jubilejej ma w meji 2025 w Budyskim Ludowym nakładnistwje Domowina (LND) kniha wuńć. LND prosy wšitkich, kotřiž maja dotal njeznate historiske fota ze žiwjenja w Chrósćicach a wokolnych wsach – wosebje fota hač do Druheje swětoweje wójny a z NDRskeho časa –, so přizjewić.
Serbska protyka
