Katolski Posoł – 22. decembra 2024
Přichodne čisło Katolskeho Posoła wuńdźe 12. januara 2025.
W aktualnym wudaću nańdźeće mjez druhim tole:
Postrowej, kotryž wobswědčeše Bože skutkowanje, wěnuje so serbski duchowny w swojim zawodnym nastawku. Wón rozmysluje wo zetkanju žónskeju, kotrež steji w srjedźišću ewangelija štwórteje adwentneje njedźele.
Bamž Franciskus zahaji patoržicu wulke cyrkwinske swjedźenske lěto. Tež w Drježdźansko-Mišnjanskim biskopstwje a w katolskich Serbach su zarjadowanja planowane.
Wobraz, kotryž njepředstaja jeničce swójbnu, ale tež swětowu stawiznu, předstaja serbski duchowny w swojim hodownym rozmyslowanju. Mólba wisa dźensa w Berlinskej galeriji mólbow a je jedna ze štyrjoch wuchowanych, małoformatnych wobrazow Colmarskeho mištra.
Přikład swjateho Mikławša su sej šulerjo Radworskeje zakładneje šule k wutrobje brali. Woni zhromadźichu so w tamnišej cyrkwi k ekumeniskemu nyšporej a znosychu po tym něšto do wulkeho awta, z čimž chcedźa chowancow doma w Bołharskej zawjeselić.
Adwentny koncert 1. serbskeje kulturneje brigady běše za awtorku přinoška połny nadźije a k rozmyslowanju pohnuwacy. Nimo młodostnych wuhotowa jón tež dorostowy chór.
Z Kulowa pochadźacy jezuit rozprawja w zwisku z hodownej akciju Adveniat wo połoženju w Kolumbiskej. Mjez druhim wopisuje wón tradiciju, kotruž wěriwi w hinašej formje tež we Łužicy pěstuja.
Ze srědkom, kotryž zamóže woheń wěry a lubosće we wutrobach čłowjekow znowa zapalić, zaběra so serbski duchowny w swojim přinošku. Zdobom mjenuje wón najwjetši dar za cyłe čłowjestwo.
Wěriwi Baćońskeje wosady zeńdźechu so třeću adwentnu njedźelu k swojej adwentničce. Na tutym popołdnju překwapi jich mjez druhim kwartet hudźbnikow.
W swojim hodownym lisće pisataj Hańžka a Feliks wo tym, što ma ewangelski teologa z Božim dźěćom a hodownymi darami činić. Dale dźěći mjez druhim zhonja, hdźe prózdninsku zaběru z nabožnymi temami nańdu a što dary woznamjenjeja, kotrež běchu Třo kralojo Jězusej přinjesli. W hodownym hódančku móža wone tež něšto dobyć.
Wučeny mnich z bliskosće Čorneho morja je před 1.500 lětami wažne křesćanske ličenje wunamakał. Jeho wobličenja pak stejachu na čumpatymaj nohomaj.
Před sto lětami zemrě ludowy herc, kotryž běše mišter na serbskich huslach. Portret wo nim je znaty čěski moler zhotowił.
Katolski Posoł před sto lětami je mjez druhim wo podawku rozprawjał, kotryž zahaji bamž Franciskus tež lětsa patoržicu. Zdobom zestajerka rubriki zwěsći, zo pytachu hižo tehdy na dušepastyrskim polu za nowymi formami.
Worklečanske dekanatne dušepastyrstwo za młodźinu je z jednotliwymi młodostnymi wšelake impulsy spřihotowało, kotrež zaběraja so z prašenjemi wěry. K štwórtej adwentnej njedźeli předstaja mjez druhim powěsćowy a roznjasnjowacy portal katolskeje cyrkwje w Němskej a hodowny special filma „The Chosen“.
Chceće swojich swójbnych abo přećelow k hodam abo w běhu
lěta k narodninam z małym darom zawjeselić, ale njewěsće z čim? Darujće abonement Katolskeho Posoła! Předłohu za dobropis nańdźeće na internetowej stronje www.posol.de. Móžeće ju sami wupjelnić a wućišćeć. Štóž pomoc trjeba, njech zazwoni na redakciju, telefonowe čisło (0 35 91) 55 02 10.
Skazanku pósćelće prošu z mejlku na Katolski@Posol.de abo z póstom
na Redakciju Katolskeho Posoła,
Póstowe naměsto 2, 02625 Budyšin.
Z pišćelowym koncertom bu wjacelětne saněrowanje Božeho domu w serbskej wosadźe zakónčene. Organist pokaza mjez druhim na mnohostronskosć wulkeho instrumenta.
Diplomowa zawodna hospodarka je nowa jednaćelka Smochčanskeho kubłanišća swjateho Bena. Rodźena Budyšanka ma mnoho mjezynarodnych nazhonjenjow.
Pod hudźbnym nawodom Kathariny Dickopf wuhotuje orchester Budyskeho Serbskeho ludoweho ansambla tutu njedźelu, 22. decembra, w 17.00 hodź. adwentny koncert w Radworskim hosćencu „Meja“. Zaklinča mjez druhim orchestrowe twórby serbskeju komponistow Helmuta Fryče a Jana Rawpa.
Na koncert k wuklinčenju lěta přeprošuje Baćońska wosada wutoru, 31. decembra, do swojeje cyrkwje. Kaž hižo loni zahaji so koncert hižo w 17.00 hodź. Lětsa wuhotujetej jón spěwajo a hudźo indiwiDUAL – kuzinje Hanka Wowčerjowa a Weronika Kalinučcyna. Nimo toho přednjese Jana Markowa tři meditacije.
Chór Lipa wuhotuje sobotu, 28. hodownika, w 17.00 hodź. swój tradicionelny nyšpor w swětle swěčkow w Róžeńčanskej swjatnicy. Zastup je darmotny. Zběrka po koncerće je lětsa za dźěćacu hospicnu słužbu, kotruž Zhorjelska Křesćanska hospicna słužba organizuje, postajena. Wšitcy su wutrobnje přeprošeni.
Chór Meja přeprošuje wšitkich zajimcow wutrobnje na swój nowolětny koncert, kotryž budźe sobotu, 4. januara, we 18.00 hodź. w Radworskim hosćencu „Meja“. Składnostnje 130. wobstaća chóra předstaja zabawny program Jurja Winarja „Pilnje dźěłaj – wjes’le spěwaj“. Přizamknu so reje.
Tradicionalny hodowny koncert Chróšćanskeho cyrkwinskeho chóra budźe njedźelu, 5. januara, w 14.00 hodź. Mjez druhim jón dźěćacej šoli a dujerjo sobu wuhotuja. Wšitcy su přeprošeni.
Na putnisku jězbu do Lourdesa
a La Salette wot pjatka do njedźele, 16. do 25. meje, přeprošuje Šěrachowski pućowanski běrow
A-Teams. Wobdźělnicy wopytaja mjez druhim tež Monaco a Avignon. Dalše informacije a přizjewjenja dóstanu zajimcy pola Matthiasa Hadanka w Hórkach pod telefonowym čisłom (01 63) 7 33 82 05 abo w interneće pod www.ateams.de.
Drježdźansko-Mišnjanske biskopstwo pyta ručež móžno wosobu, kotraž by zarjadnistwo w Kamjenskej wosadźe swjateje Marje Madleny a zdobom Šěrachowskeje wosady swjateje Marije donjebjeswzaća nawjedowała. Při tym jedna so wo połne dźěłowe městno, kotrež njeje časowje wobmjezowane. Zajimcy měli hač do póndźele, 27. januara, swoje podłožki biskopskemu ordinariatej w Drježdźanach sposrědkować.
Žiwjenju swjateho Franca Assisiskeho, předstajenemu na sćěnach křižneje chódby něhdyšeho klóštra a nětčišeho kubłanskeho, konferencneho a putniskeho centruma w sewjernej Čěskej, wěnujetaj so awtoraj w nowej publikaciji „SANCTE FRANCISCE ORA PRO NOBIS – Život světce na lunetách hejnického kláštera / Das Leben des Heiligen in den Lünetten des Haindorfer Klosters“. W redakciji Katolskeho Posoła někotre eksemplary předleža, hdźež móža sej zajimcy knihu za 16,00 eurow kupić.
W putniskej hospodźe w Hirschfeldźe su hač do swjedźenja Předstajenja Knjeza, pjatk, 2. februara, zaso Bože narodki wustajene. Mjez tajkimi, kiž słušeja hižo ke krutemu inwentarej, maja tam tež lětsa zaso nowe.
Comic wo influenceru Božim, kotryž ma so bórze swjatoprajić, předleži wotnětka tež w serbskej rěči. Kniha z krutej wjazbu je na wšitkich katolskich farach na předań a płaći 15,00 eurow.
Klětu přeprošuje dušepastyrstwo młodźiny we Worklecach wospjet na seminaraj k přihotej na sakrament mandźelstwa. Wonej wotmějetej so stajnje pjatk a sobotu, 7. a 8. februara kaž tež 28. a 29. nowembra, w Smochčanskim kubłanišću swjateho Bena. Přizjewjenja přijimuje dekanatne dušepastyrstwo hač do srjedy, 8. januara, online.
Worklečanske młodźinske dušepastyrstwo přewjedźe klětu zaso kurs JULEICA. Wukubłanje wobsteji z dweju dźělow a wotměje so stajnje wot pjatka do njedźele, 4. do 6. apryla, kaž tež wot 25. do 27. apryla, w Smochčanskim kubłanišću swjateho Bena, tam z přenocowanjom. Kompletne wukubłanje je darmotne.
Serbska protyka
