Katolski Posoł – 9. nowembra 2025
Wo myslach a dožiwjenjach w Božim domje, kiž je mać wšěch cyrkwjow po wšej zemi, pisa awtorka w swojim zawodnym nastawku. Zdobom wona naspomnja, što je za nju wosebite žórło.
Něhdyši Praski arcybiskop, kardinal Dominik Duka, je w dobje swojeho zastojnstwa tež dwójce Serbow wopytał a mjez druhim Božej mši w Róžeńće swjećił. Nětko bu na sćěhi ćežkeje chorosće do wěčnosći wotwołany.
Cyle wosobinske wokomiki su młodostni w Ralbicach dožiwili. Woni přijachu wot emeritowaneho biskopa Konrada Zdarsy sakrament firmowanja.
Ewangelsko-lutherski sakski krajny biskop Tobias Bilz a Drježdźansko-Mišnjanski biskop Heinrich Timmerevers běštaj z hosćom frakcije CDU Sakskeho krajneho sejma w Drježdźanach. Tajku wuměnu myslow pěstuja we wěstych wotstawkach.
Hańža Młynkowa z Hórkow běše tuchwilu najstarša nošerka serbskeje narodneje drasty. W oktobru je wona w žohnowanej starobje na prawdu Božu wotešła.
Wupisanje dźěłoweho městna
Towarstwo Cyrila a Metoda z.t. pyta wosobu, kotraž by wot 1. januara 2026 redakciski team Katolskeho Posoła zesylniła. Njejedna so wo přidatne dźěłowe městno, ale wosoba sej dźěłowe městno ze sobudźěłaćerku dźěli. Dźěłowy čas wučinja 20 hodźin wob tydźeń.
Towarstwo Cyrila a Metoda z.t. (TCM) chce tež lětsa zaso ze swojej na zymskej akciju „Łužica pomha“ diecezanskemu zwjazkej Carity w pólskim Ełku pomhać. Tam wjesela so nade wšěm, štož w swójbje trjebaš, kaž su to drasta, črije, artikle hygieny a kosmetika za žony a wosebje za dźěći, ale tež płokanski próšk, kuchinske graty abo pampersy za dźěći runje tak kaž za dorosćenych. Słódkosće měli separatnje spakować. Wotedać hodźa so dary – po móžnosći w měchach – hišće sćěhowacej dnjej pola Špitankec w Zejicach, Kamjenska dróha 10: pjatk, 14. nowembra, wot 15.00 do 18.00 hodź kaž tež sobotu, 15. nowembra, wot 9.00 do 11.00 hodź.
Sekcija Swójba Towarstwa Cyrila a Metoda z.t. (TCM) přeprošuje wšitkich zajimcow na škotowy turněr, kotryž wuhotuje wona wutoru, 18. nowembra, na předwječoru pokutneho dnja, we 18.30 hodź. w Jasčanskej „Bjesadźe“. Wuraznje su nimo muži tež žony přeprošene, wšojedne kotreje staroby. Za tych, kotřiž njemóža škot hrać, zarjaduja zdobom turněr z kartowej hru rommé.
Ze swojim projektom „SachsenSofa“ přeprošujetej Katolska Akademija Drježdźansko-Mišnjanskeho biskopstwa a Sakska Ewangelska akademija na wšelakich městnach swobodneho stata na diskusije wo towaršnostnych temach. Srjedu, 12. nowembra, stej z nim z hosćom we Wojerowskim hrodźe, hdźež wěnuja so pod hesłom „Trjebani – ale tež witani?“ migraciji do němskich dźěłowych wikow. Započatk je w 19.30 hodź. Wšitcy zajimcy su wutrobnje přeprošeni. Woni měli so do toho online přizjewić.
Prěnje zarjadowanje noweho rjadu „Genuss & Kultur“ w kofejowni swjateho Michała klóštra Marijineje hwězdy w Pančicach-Kukowje budźe sobotu, 15. nowembra. Z hosćom budźe wuměłstwowa rjemjeslniska firma BLANK z rudnohórskeho Grünhaina. W srjedźišću zabawneho popołdnja steja jandźeljo.
Monika Gerdesowa zarjaduje w swojej putniskej hospodźe w Chrósćicach w přichodnych měsacach zaso tak mjenowanu kulturnu zymu. Zarjadowanja za dźěći a dorosćenych w serbskej a němskej rěči wotměja so wot soboty, 29. nowembra, do soboty, 7. februara, nimale tydźensce.
Na zhromadny nyšpor je dekanatna młodźina tež lětsa na swjedźenju
Chrysta Krala, njedźelu, 23. nowembra, do Chrósćic prošena. Započatk je w 14.00 hodź. z nyšporom w cyrkwi.
Přizamknje so přednošk Wjenkec
Haliny a Chrystofera wo teologiji mandźelstwa z wosobinskim swědčenjom.
Serbska protyka
