Katolski Posoł – 19. apryla 2026
Štož so w jutrownym swjatym sćenju rysuje, njeje jenož dopomnjenka na něšto zašłe, pisa duchowny w swojim zawodnym nastawku. Wón tež praji, kotre zetkanje do přichoda woła.
Zastańće z wójnu! Je čas za měra pokoj, přiwoła bamž Leo XIV. statnym a knježerstwowym šefam. Wón pokaza na miliardy ludźi, kotřiž dźensa do pokoja a měra wěrja a pozbudźi wšěch, tohorunja do lubosće, poměrnosće a do dobreho wěrić.
Bamž Leo XIV. žadaše sej na swojej jězbje w Africe globalnu sprawnosć. Na zetkanju ze zastupjerjemi islama rjekny swjaty wótc: „Smy bratřa a sotry.“ Zdobom rozłoži, čehodla je to takle zwuraznił.
W Nepalu nazhoni młoda Serbowka něšto, štož ju hnuješe, dokelž to cyle hłuboko ze staršiskim domom zwjazuje. Zdobom móžeše zwěrjo wobkedźbować, kiž słuša k „big five“ Afriki.
Baćońscy křižerjo su lětušu jutrońčku bilancowali. Zwěsćichu, zo dyrbjeli so wšitke procesiony ze zawěsćenjom zaběrać. A mějachu čestneho hosća, kotryž ma wažny podźěl na wozrodźenju jich procesiona.
„By-li bamž jutry jako křižer sobu jěchać chcył, zwotkel by konja dóstał?“ Tole bě jedne z prašenjow w kwisu na křižerskim zetkanju w Chrósćicach. Nimo toho mějachu hódać, wo kotre jutrowne kěrluše so jedna, kotrež wšak buchu jim wotzady předhrate.
Biblioteka Marijineje hwězdy je wuwzaćne městno, zwěsćichu wědomostnicy w swojim slědźerskim projekće. Prěnje wuslědki nětko zjawnosći prezentowachu. –
Štó dari ći přećelow, prašeše duchowny na prěnim swjatym woprawjenju w Radworju. Dźěćom so při tym něšto wuwědomi.
Na ekumeniskim kóncu tydźenja w Hainewaldźe pod hesłom „Jutrowna nadźija“ zetkachu so lětsa předewšěm ewangelscy Serbja. Mjez druhim zeznachu metodu bibliologa.
Z mjenami dźěći wuhotowanej swěčce přewodźeštej je w Ralbičanskej wosadźe na jich prěnje swjate woprawjenje. Krok po kroku je někotre maćerje na to přihotowachu. Nětko su wosebity dźeń dožiwili.
Bosćij Ješka hori so hižo lětdźesatki na mnohe wašnje za cyrkej a narod. Přewšo aktiwny křesćan je nětko kulowate narodniny woswjećił.
Dźěći 1. a 2. šulskeho lětnika zhonichu we Worklečanskim Don Boskowym domje wo jutrownych symbolach. Nimo toho dožiwichu wone dźiwadło kamishibai a so tež w hrě po Worklecach pohibowachu.
Prědowanje w MDR serbskim rozhłosu ma tutu njedźelu, 19. apryla, Radworski farar Beno Jakubaš. Wotkaz na nabožne wusyłanje w mediatece MDR je tule podaty.
Wěriwi z Němskeje, Pólskeje a Čěskeje su sobotu, 9. meje, na putnikowanje wujednanja do čěskich Hejnic přeprošeni, wuraznje tež Serbja. Boža mša w hnadownej cyrkwi Marije wopytanja zahaji so w 10.30 hodź. Hłowny celebrant budźe swjećacy biskop Piotr Wawrzynek z Legnicy. Hejnicy přisłušeja Litoměřicskej diecezy, kotraž swjeći lěto wujednanja. Z tym chcedźa tež na wuhnaće Němcow z Čěskeje před 80 lětami spominać a dialog mjez krajomaj spěchować.
Miłočanski Křesćansko-socialny kubłanski skutk z.t. přeprošuje zhromadnje z klóštrom Marijinej hwězdu na wotewrjenje sezony do Zežiwjenskeho a zeloweho centruma w Pančicach-Kukowje, kotrež budźe njedźelu, 26. apryla, w 14.00 hodź. Mjez druhim chcedźa wosycu (Zitterpappel) – „štom lěta“ – sadźić. Tež za dźěći změja pisany program. Na nalětnich wikach budu regionalne produkty poskićeć. Runočasnje wotewrja wustajeńcu „Klóšterska zahroda w změnje (po)časow“.
Radworske Šmitec-Schwarzec busowe předewzaće přeprošuje na putnisku jězbu k pasionskim hram do awstriskeho St. Margarethena, kotraž so wot pjatka do wutory, 26. do 30. junija, wotměje. Předstajenje budźe tam pod hołym njebjom před kulisu skały. Jězbu přewodźeć budźe farar Gabriš Nawka. Nimo toho poskićuja kołojězby. Zajimcy móža so pola Šmitec-Schwarzec wozydłownistwa w Radworju přizjewić, telefonowe čisło (03 59 35) 28 60. Městna su hišće swobodne.
Dalšu jězbu Radworskeho Šmitec-Schwarzec busoweho předewzaća pod hesłom „Wěra zetka hudźbu“ budźe wot póndźele do štwórtka, 10. do 13. awgusta, do Erfurta. Wobdźělnicy wopytaja mjez druhim klóšter awgustinow a tamniši měšniski seminar. Dale wobdźěla so na Erfurtskich domowych swjedźenskich hrach, hdźež předstaja musical „Jesus Christus Superstar“. Přizjewjenja přijimuje Šmitec-Schwarzec wozydłownistwa w Radworju, telefonowe čisło (03 59 35) 28 60. Městna su hišće swobodne.
Z wulkim orchestrom a chórom Budyskeho Serbskeho ludoweho ansambla, z chórami Budyšin, Lipa, Meja a Łužica, kaž tež ze solistami Danielu Hazec, Stefanie Hauptfleisch, Patrikom Hornákom a Clemensom Heidrichom zaklinči w tutej jónkrótnej konstelaciji předstajenje oratorija „Nalěća“ Korla Awgusta Kocora a Handrija Zejlerja. Předstajenja su planowane pjatk, 24. apryla, w 19.30 hodź. w Budyšinje kaž tež sobotu, 25. apryla w Drježdźanach a njedźelu, 26. apryla w Choćebuzu, stajnje w 17.00 hodź. Kartki předawaja mjez druhim online na internetowej stronje ansambla.
Młodostni z cyłeho Drježdźansko-Mišnjanskeho biskopstwa su přeprošeni, pěši abo
z kolesom zhromadnje do klóštra Marijineje hwězdy w Pančicach-Kukowje putnikować.
Tam wotměje so sobotu a njedźelu, 13. a 14. junija, zjězd biskopstwoweje młodźiny. Na nim čaka na putnikow pisany program ze wšelakimi dźěłarničkami, modlenjom, spěwanjom a zhromadnej Božej mšu.
Dekanatne dušepastyrstwo za dźěći a młodźinu we Worklecach přeprošuje šulerki a šulerjow nětčišeho 4. do 8. lětnika w lětnich prózdninach na jězbu do Zhorjelca. Wona wotměje so wot póndźele do pjatka, 3. do 7. awgusta. Přizjewjenja přijimuja hač do pjatka, 1. meje, online.
Drježdźansko-Mišnjanske biskopstwo poskićuje tež lětsa zaso zawod do tematiki nabožnych prózdninskich dnjow. Prěnje tajke zarjadowanje budźe póndźelu, 11. meje, wot 18.00 do 21.00 hodź. na Budyskej farje. Dalše je mjez druhim srjedu, 27. meje, w Drježdźanach planowane. Zdobom poskića zamołwići zawod tež online přez platformu Zoom, a to štwórtk, 28. meje, wot 18.00 do 21.00 hodź. Přizjewjenja přijimuja online.
Drježdźanska katedrala Najswjećišeje Trojicy bu před 275 lětami poswjećena. K tomu su w diecezy wobšěrny program z hudźbnymi předstajenjemi a čitanjemi zestajeli. Wjeršk ma swjatočna Boža mša w juniju z biskopom Heinrichom Timmereversom być.
Mužojo, kotřiž chcedźa teologiju studować a so z měšnikom stać, móža so wot nazymy we wobłuku studija na to přihotować. Tež mužojo bjez matury, ale z wotzamknjenym powołanskim wukubłanjom móža so na puć měšnistwa podać. Do požadanja wotměja so w biskopskim ordinariaće w Drježdźanach orientaciske rozmołwy, za kotrež měli so zajimowani mužojo w personalnym wotrjedźe přizjewić.
Lětsa nazymu zahaja na Fachowej akademiji za wosadnu pastoralku w Magdeburgu nowy wukubłanski kurs za muži, kotřiž chcyli so ze stajnym diakonom w ciwilnym powołanju stać. Zajimcy měli při zahajenju wukubłanja znajmjeńša 35 lět być a nic starši hač 50 lět.
Zajimcy, kotřiž chcyli pastoralnu słužbu we wosadźe wukonjeć, móža lětsa nazymu wukubłanje na wosadneho referenta zahajić. Žony a mužojo, kiž tak mnohostronske słužby a charismy wěriwych podpěraja a spěchuja, móža so ze studijom nabožneje pedagogiki respektiwnje teologije a nawjazowaceho třilětneho wukubłanja za tajku słužbu kwalifikować.
Serbska protyka
