Katolski Posoł – 26. julija 2026
Dźeń wote dnja ludźo rozsudy tworja, kotrež na jich priority pokazuja. Awtor zawodneho nastawka pisa wo ewangeliju tuteje njedźele wo schowanym pokładźe, kiž měł pomhać, sej swójske rozsudy a priority znowa wotkryć.
Prěnje serbske křižerske putnikowanje do Roma wotměje so wot soboty do soboty, 1. do 8. meje 2027. Wobdźělnicy wobhladaja sej nimo hłownych cyrkwjow tež katakombu Domitilla. Hłowny programowy dypk budźe wobdźělenje na generalnej awdiency bamža Leja XIV. we Vatikanje, dožiwja pak tež spřisahanje nowych Šwicarskich gardistow.
W Ralbicach woswjeći kanonik Šćěpan Delan swoje 70. narodniny. Předsydka wosadneje rady hódnoći jeho skutkowanje, při čimž wuzběhny projekt, kotryž ma bórze dokónčeny być.
Hesło lětušeho swětoweho dnja dźědow, wowkow a seniorow je runočasnje tróštowace přilubjenje Jězusa za kóždeho jednotliwca. Awtor přinoška rozłožuje, w čim móža starši ludźo młódšim z přikładom być.
Dźesaćitysacy su so po wopyće małeho wobchoda we Wojerecach do druheje wosoby změnić móhli. Nětko pyta serbski wobsedźer naslědnika.
Jan Rjelka z Chrósćic wobsedźi talenty, kotrež na wšelake wašnje we wosadźe zasadźuje. Zdobom haji kontakty k słowjanskim přećelam. Tele dny woswjeći swoje 80. narodniny.
Ewangelske nabožne wusyłanje w Serbskim rozhłosu MDR ma tutu njedźelu, 26. julija, serbski superintendent Krystof Rummel z Hodźija.
W Róžeńčanskej hnadownej cyrkwi budźe sobotu, 1. awgusta, wot 17.00 do 18.00 hodź. přiležnosć, sakrament wujednanja přijeć. Spowědnicy budu kanonik Šćěpan Delan kaž tež fararjo Michał Anders, Gerat Wornar a Gabriš Nawka.
Kóžde lěto 2. awgusta je po cyłym swěće přiležnosć porciunkulski wotpusk zdobyć. K tomu słuži checkowa lisćina za wutrobu.
W sewjeročěskim Vilémovje (Wölmsdorf) spominaja lětsa na 300. róčnicu poswjećenja tamnišeje cyrkwje Marije donjebjeswzaća. Tole kaž tež 200lětne wobstaće putnikowanja k swjatnicy, kiž měješe sčasami wobšěrny serbski podźěl, chcedźa na swjedźenju Marije donjebjeswzaća, sobotu, 15. awgusta, wopominać. Wosebje Łužiscy Serbja su na to wutrobnje přeprošeni.Wjeršk swjatočnosćow twori putniska Boža mša w 17.00 hodź. Hłowny celebrant budźe arcybiskop Stanislav Přibyl z Prahi. Cyrkwinski chór Vilémova za tutu składnosć tež serbske kěrluše přihotuje.
Serbske ewangelske towarstwo a Maćijec swójba přeprošujetej wšitkich Serbow na lětnje pućowanje a serbski swjedźeń sobotu, 22. awgusta. Započatk je w 14.00 hodź. na Jaworkec/Maćijec dworje w Hrubjelčicach, Ćěchorječanska 16. Wottam podadźa so na pućowanje do wokoliny. Po tym budźe na Jaworkec/Maćijec dworje kofej spřihotowany. Přizamknje so w 17.00 hodź. serbska ekumeniska nutrnosć z dekanom Witom Sćapanom a superintendentom Krystofom Rummelom. Wot 18.00 hodź. hač do nocy sćěhuje hudźba Drježdźanskeje kapały Podka pod nawodom Jurja Čornaka.
Zajimcy wot 15 lět móža so za dobrowólne socialne lěto pola Zwjazka Carity w Drježdźansko-Mišnjanskim biskopstwje z.t. přizjewić, kotrež so wutoru, 1. septembra, zahaji. Započeć móža pak tež pozdźišo. Městnosće dźěła su mjez druhim w biskopskej šuli Marije Montessori w Budyšinje, w Marije-Marćinym domje w Pančicach-Kukowje, w Chróšćanskim Domje swjateje Ludmile, w Kamjenskej Dźěłarni swjateho Mikławša abo w Smječkečanskim Domje swjateho Jana kaž tež w cyrkwinskich zarjadnišćach w Lipsku a Drježdźanach. Kóždu wutoru w 15.00 hodź. poskićuje Zwjazk Carity onlinowe informaciske popołdnjo. Za nje měli so zajimcy z mailku pod adresu fd@caritas-dicvdresden.de přizjewić.
Serbska protyka
