Katolski Posoł – 2. awgusta 2026
Njewidźomnej spince, kotraž čitani tuteje njedźele zwjazuje, wěnuje so awtor zawodneho nastawka. Z tym zo tekstaj bliže předstaji, chce wón k tomu přinošować, zo bychu wěriwi z njeju tutu njedźelu posylnjeni byli.
Drježdźansko-Mišnjanske biskopstwo woteda Smochčanske kubłanišćo swjateho Bena. Hač do julija 2027 chce je drje dale wjesć. Pyta pak hižo za nowym nošerjom, kiž chcył je po tym přewzać.
Zhromadnje z mnohimi wěriwymi z Łužicy su serbscy putnicy w sewjeročěskej bazilice Božu mšu swjećili. Młodźinski chór kaž tež młodźi hudźbnicy ju wobrubichu.
Za awtora přinoška je wón hladajo na swoje mnohostronske skutkowanje za cyrkej a domiznu kaž tajka institucija: serbski superintendet na wuměnku Jan Malink. Tele dny dokónči wón swoje 70. žiwjenske lěto.
Před 125 lětami je so w Pólskej zbóžny kardinal Stefan Wyszyński narodźił. Wjacore lětdźesatki běše wón w swojej domiznje ikona. W portreće su diferency z dalšim kardinalom w Pólskej – pozdźišom bamžom – naspomnjene, ale tež kak staj z tym wobchadźałoj.
Serbska dekanatna młodźina je tež lětsa na zhromadny wulět prošena, kotryž budźe njedźelu, 13. septembra. Přeprošeni su tohorunja młodostni wot přichodneho 9. lětnika. Planowane je z busom do Sprjowjow (Sprey) pola Hamora jěć, hdźež budźe zhromadny nyšpor. Přizamknje so čołmikowanje z Čelna do Noweho Města nad Sprjewju. Tam wulět z grilowanjom wuklinči. Zajimcy měli so hač do póndźele, 10. awgusta, online přizjewić.
Prěnje serbske křižerske putnikowanje do Roma wotměje so wot soboty do soboty, 1. do 8. meje 2027. Wobdźělnicy wobhladaja sej nimo hłownych cyrkwjow tež katakombu Domitilla. Hłowny programowy dypk budźe wobdźělenje na generalnej awdiency bamža Leja XIV. we Vatikanje, dožiwja pak tež spřisahanje nowych Šwicarskich gardistow.
Katolske nabožne wusyłanje w Serbskim rozhłosu MDR ma tutu njedźelu, 2. awgusta, Radworski farar Beno Jakubaš.
W klóšterskej cyrkwi w Nowej Cali budźe farar Beno Jakubaš srjedu, 12. awgusta, w 10.30 hodź. z Radworskimi firmujomnymi Božu mšu w serbskej rěči swjećić. Na nju su tež wšitcy dalši přeprošeni. Organist mjez nimi njech so na fararja Jakubaša wobroći.
Křesćansko-socialny kubłanski skutk z.t. přeprošuje zhromadnje z klóštrom Marijinej hwězdu na zelowu njedźelu do Zežiwjenskeje a zeloweje zahrody w Pančicach-Kukowje. Na hosći čaka njedźelu, 16. awgusta, wot 13.00 hodź. pisany program, mjez druhim z Wudworskim folklornym ansamblom, tež zelowe a regionalne wiki so wotměja. Zakónčacy ekumeniski nyšpor budźe w 17.00 hodź.
Budyski Serbski ludowy ansambl (SLA) a Smochčanske kubłanišćo swjateho Bena přeprošujetej tež lětsa na hudźbny swjedźeń na dworje kubłanišća. Pjatk a sobotu, 21. a 22. awgusta, wotmějetej so tam prěni raz „Serbskej nocy“. Započatk je stajnje w 20.00 hodź. W programje předstajeja znate, ale tež na pozabyte twórby z nimale 75 lět stawiznow SLA. Nimo hudźbneho programa změje Smochčanski dom tež kulinariski poskitk regionalneje kuchnje. Zastupny lisćik za hudźbny swjedźeń móža sej zajimcy mjez druhim online kupić.
Pod hesłom „One minute Homily“ (Jednomjeńšinske prědowanje) přednjesu jezuića w krótkich widejach poselstwo ewangelija njedźelu a cyrkwinske swjate dny do wšědneho žiwjenskeho wobswěta a dawaja impuls za nowy tydźeń. Mjez wjacorymi prědarjemi je z Kulowa pochadźacy pater Fabian Rječka.
W sewjeročěskim Vilémovje (Wölmsdorf) spominaja lětsa na 300. róčnicu poswjećenja tamnišeje cyrkwje Marije donjebjeswzaća. Tole kaž tež 200lětne wobstaće putnikowanja k swjatnicy, kiž měješe sčasami wobšěrny serbski podźěl, chcedźa na swjedźenju Marije donjebjeswzaća, sobotu, 15. awgusta, wopominać. Wosebje Łužiscy Serbja su na to wutrobnje přeprošeni.Wjeršk swjatočnosćow twori putniska Boža mša w 17.00 hodź. Hłowny celebrant budźe arcybiskop Stanislav Přibyl z Prahi. Cyrkwinski chór Vilémova za tutu składnosć tež serbske kěrluše přihotuje.
Serbske ewangelske towarstwo a Maćijec swójba přeprošujetej wšitkich Serbow na lětnje pućowanje a serbski swjedźeń sobotu, 22. awgusta. Započatk je w 14.00 hodź. na Jaworkec/Maćijec dworje w Hrubjelčicach, Ćěchorječanska 16. Wottam podadźa so na pućowanje do wokoliny. Po tym budźe na Jaworkec/Maćijec dworje kofej spřihotowany. Přizamknje so w 17.00 hodź. serbska ekumeniska nutrnosć z dekanom Witom Sćapanom a superintendentom Krystofom Rummelom. Wot 18.00 hodź. hač do nocy sćěhuje hudźba Drježdźanskeje kapały Podka pod nawodom Jurja Čornaka.
Zajimcy wot 15 lět móža so za dobrowólne socialne lěto pola Zwjazka Carity w Drježdźansko-Mišnjanskim biskopstwje z.t. přizjewić, kotrež so wutoru, 1. septembra, zahaji. Započeć móža pak tež pozdźišo. Městnosće dźěła su mjez druhim w biskopskej šuli Marije Montessori w Budyšinje, w Marije-Marćinym domje w Pančicach-Kukowje, wChróšćanskim Domje swjateje Ludmile, w Kamjenskej Dźěłarni swjateho Mikławša abo w Smječkečanskim Domje swjateho Jana kaž tež w cyrkwinskich zarjadnišćach w Lipsku a Drježdźanach. Kóždu wutoru w 15.00 hodź. poskićuje Zwjazk Carity onlinowe informaciske popołdnjo. Za nje měli so zajimcy z mailku pod adresu fd@caritas-dicvdresden.de přizjewić.
Serbska protyka
