Katolski Posoł – 11. meje 2025
Habemus papam!
Mamy noweho bamža.
Leo XIV. je po swojim wuzwolenju pokoj wuzběhnył.
Wo elementach, z kotrymiž je křesćan hišće dźensa z Jězusom zwjazany, pisa awtor w swojim zawodnym nastawku. Při tym poćahuje so na druhe čitanje tuteje njedźele a wuwjedźe, kak móhli je zrozumić.
W Nowoslicach swjećachu 1. meje na nawsy nyšpor. Na nim spominachu na podawk, kotryž je wjes před 80 lětami dožiwiła.
Towarstwo Cyrila a Metoda z.t. běše za prěnju mejsku njedźelu na nyšpor do Róžanta přeprosyło. Wuhotował je jón team serbskeje swójby.
Z požohnowanjom serbskeho duchowneho su bikerojo do swojeje lětušeje sezony startowali. Na nyšporje w Ralbicach wón jich mjez druhim pozbudźi, kak měli po puću jednać.
W Radworju běchu zajimcy na informaciske zarjadowanje k ponowjenju tamnišeje Křižneje cyrkwje přeprošeni. Na nim mjez druhim zhonichu, kotre dźěła su planowane a wot hdy Boži dom nachwilnje wužiwać njemóža.
Wyši wučer a docent Jurij Nuk je na prawdu Božu wotešoł. Wěra a narodnosć běštaj wažnej stołpaj jeho žiwjenja.
Wo jónkrótnym wokomiku z dołhim přihotowanjom pisa młodostna Kulowskeje wosady. Zhromadnje z dalšimi je wona sakrament přijała, kotryž jich jako křesćanow skrući.
W Smochćicach wotmě so tež lětsa zaso za młodostnych kurs JuLeiCa. W dwěmaj modulomaj w aprylu zeznajomichu so woni mjez druhim z nadawkami nawjedowanja skupin.
Bohu k česći a Serbam k wužitku je ze Sulšec pola Kulowa pochadźacy dr. Pětr Brězan móhłrjec cyłe swoje žiwjenje skutkował. Nětko bu wón po wupjelnjenym žiwjenju do wěčnosće wotwołany.
Nowu mólbu molerja Michaela Triegela je Drježdźansko-Mišnjanski biskop Heinrich Timmerevers we Wechselburgu požohnował. Do nyšpora zwurazni wuměłc tohorunja ambiciju, kiž ma w zwisku ze Serbom.
W Radworju swjećachu prěnju mejsku njedźelu Božu mšu, kotraž běše wosebje za swójby z dźěćimi wuhotowana. W njej přitomni mjez druhim zhonichu, pod kotry płašć smědźa so stajnje schować. Na nyšporje ćehnjechu wěriwi w procesionje, w kotrymž družki postawu swjateje Marije njesechu, na kěrchow.
Drježdźanski hólči chór kapałnikow wuhotuje njedźelu, 11. meje, w 14.00 hodź. nyšpor w Ralbičanskej cyrkwi. Wšitcy su k tomu wutrobnje přeprošeni. Po nyšporje budźe zběrka za kapałnikow.
Pod hesłom „Swětła nadźije“ wotměje so pjatk, 16. meje, w 19.30 hodź. w Rakečanskej ewangelskej cyrkwi koncert z hudźbu a inspiraciju. Křesćanski spěwytwórc a hudźbny producent modernych duchownych pěsnjow Albert Frey jón zhromadnje z dalšimaj hudźbnikomaj kaž tež direktorom dźěćaceho pomocneho skutka Compassion Steve Volke wuhotuje. Wón budźe wšelake teksty čitać. Zastup je wot 19.00 hodź. a darmotny. Wšitcy zajimcy su přeprošeni.
Sekcija Swójba Towarstwa
Cyrila a Metoda z.t. je za njedźelu,
18. meje, planowane
swójbne popołdnjo přestorčiła.
Přičina je, zo wotměja so
tu njedźelu paralelnje wjacore
zarjadowanja móhłrjec za
samsnych ludźi.
Podobnje swětowemu zetkanju młodźiny wotměje so w lěću Tydźeń młodźiny w Romje. Na njón je njeboh bamž Franciskus přeprosył. Młodostni su přeprošeni so na putnikowanju z biskopom Heinrichom Timmereversom wot wutory, 29. julija, do póndźele, 4. awgusta, wobdźělić. Nimo Roma wopytaja tež Assisi. Zajimcy měli so hač do pjatka, 31. meje, online přizjewić.
Dekanatne dušepastyrstwo za dźěći a młodźinu we Worklecach přeprošuje šulerki a šulerjow nětčišeho 4. do 8. lětnika w lětnich prózdninach na jězbu do Zehrena blisko Mišna. Jězba wotměje so wot póndźele do pjatka, 21. do 25. julija. Swójski přinošk na wobdźělnika wučinja 115 eurow. Přizjewjenja přijimuja hač do njedźele, 18. meje, online.
Wotwobarać seksualizowanu namóc je wažny wobstatk dźěła z
dźěćimi a młodźinu we wosadach. Zaměr je, nowu kulturu wzajomneje zhromadnosće wuwiwać. K tomu su prewentiwne struktury a procesy trěbne. Worklečanske dekanatne dušepastyrstwo za dźěći a młodźinu poskićuje k tutej temje kubłani na póndźelomaj, 19. meje, na Ralbičanskim „Radlubinje“ a 2. junija we Worklečanskim Don Boskowym domje, stajnje wot 18.00 do 21.00 hodź. Wšitcy pomocnicy na nabožnych prózdninskich dnjach we wosadach, ale tež dalši čestnohamtscy, kotřiž maja tam zwisk z dźěćimi a młodostnymi, na přikład w sakristiji abo ze šolu, su na jedne ze zarjadowanjow wutrobnje přeprošeni. Městna su wobmjezowane.
Chór Lipa přeprošuje zhromadnje z Křesćansko-socialnym kubłanskim skutkom wšitkich zajimcow na nalětni koncert, kotryž wuhotuje njedźelu, 18. meje, w 15.30 hodź. na zahrodźe Zežiwjenskeho a zeloweho centruma w klóštrje Marijinej hwězdźe w Pančicach-Kukowje. Program wuhotuja Lipjenjo zhromadnje z Ralbičanskim chórom Lilija kaž tež Lipjanskej dźěćinu Lipki. Wot 15.00 hodź. poskića tam kofej a tykanc
Serbska protyka
