Katolski Posoł – 20. septembra 2026

W aktualnym wudaću nańdźeće mjez druhim tole:

Z čłowječim nastajenjom a jeho sćěhami zaběra so duchowny w swojim zawodnym nastawku. Wón wěnuje so napjatosći mjez čłowječim wukonowym myslenjom a Božej smilnosću, kotraž njewotliči so po hodźinach abo zasłužbje.

W myslach su samostejacy ze serbskich wosadow po Vietnamje a Kambodźi pućowali. Woni zetkachu so w Smochčanskim kubłanišću swjateho Bena k swojemu lětušemu třećemu zetkanju.

Z najjužnišej serbskej wosadnej wsu su so wobdźělnicy swójbneho popołdnja Towarstwa Cyrila a Metoda zeznajomili. Mjez druhim zhonichu wo zjawnje schowanym mjenje a krimiju.

Hród wjerchowskeje dynastije, benediktinski klóšter kaž tež někotre města wopytachu wobdźělnicy putniskeje wuprawy, kotruž je sekcija Wěda a skutk Towarstwa Cyrila a Metoda z.t. organizowała. Tež na „swjatu horu Delnjeje Bayerskeje“ běchu so podali.

Lětuši wulět dekanatneje młodźiny wjedźeše wobdźělnikow do srjedźneje Łužicy. Po tym zo wobhladachu sej wosebity mały Boži dom, podachu so na blisku rěku.

Na dnju wotewrjeneho pomnika móžachu sej zajimcy Serbski dom a w nim zaměstnjene institucije wobhladać. Tež redakcija Katolskeho Posoła je so na tym wobdźěliła.

W Hodźiju je tomu lětsa 950 lět, zo maja tam kamjentnu cyrkej a wosadu. To su mjez druhim ze swjedźenskimi kemšemi woswjećili.

Mjeztym 125 lět je ewangelska cyrkej wosrjedź katolskich Serbow duchowny centrum za ewangelsko-luthersku diaspornu wosadu. Składnostnje tuteje róčnicy ju awtor přinoška bliže předstaja.

Serbscy křižerjo, kotřiž chcedźa so klětu na putnikowanju wot soboty do soboty, 1. do 8. meje, wobdźělić, móža so hač do srjedy, 30. septembra, online přizjewić.

Ewangelske nabožne wusyłanje w Serbskim rozhłosu MDR ma tutu njedźelu, 20. septembra, serbski superintendent Krystof Rummel z Hodźija.

Za běh wo pokal zbóžneho Alojsa sobotu, 3. oktobra, w Radworju móža so zajimcy wotnětka online přizjewić. Započatk je we 8.30 hodź. při sportnišću. Wobdźělić móža so běharjo wšěch starobnych skupin wot šěsć lět za čary rozdźělneje dołhosće.

Sekcija wěda a skutk Towarstwa Cyrila a Metoda z.t. přeprošuje wšitkich wěriwych zaso na wosebity nyšpor domchowanki z požohnowanjom konjacych zapřahow. Tón budźe njedźelu, 27. septembra, w 14.00 hodź. na łuce při Hatkach w Chrósćicach.

Wšitcy młodostni a młodźi dorosćeni w starobje 18 do 35 lět – tež serbscy – su přeprošeni, so zhromadnje na europske zetkanje Taizéskeje zhromadnosće podać. Wone wotměje so wot póndźele, 28. decembra, do pjatka, 1. januara, we Łódźi.

Wšitke dźěći, kotrež so na prěnje swjate woprawjenje přihotuja, su na zhromadny dźeń do Njebjelčic přeprošene. Tón budźe srjedu, 18. nowembra, wot 9.00 do 15.00 hodź. Započatk je z Božej mšu w cyrkwi, na kotruž su tež starši wutrobnje witani. Zajimcy njech so hač do soboty, 24. oktobra, přizjewja.

We wobłuku přednoškow Maćičneje akademije předstajitaj Měrko Šołta a dr. Franc Šěn srjedu, 23. septembra, w 19.30 hodź. w Budyskim Serbskim domje, Póstowe naměsto 2, Handrija Zejlerja jako komponista. Referentaj wěnujetaj so prašenju, hač je jich samo hišće wjace. Maćica Serbska wšitkich zajimcow přeprošuje

Hornjołužiski zwjazk Carity z.t. přeprošuje pod hesłom „Caritas zwjazuje generacije“ na dźeń wotewrjenych duri sobotu, 10. oktobra, wot 14.00 do 18.00 hodź. na Zapadnu dróhu 22 w Kamjencu. Hosćom poskića wotměnjawy popołdniši program.

Hornjołužiski zwjazk Carity z.t. pyta za Dnjowu hladarnju „Při Krabatowym puću“ we Worklecach tak spěšnje kaž móžno wosobu, kotraž by tam rjedźiła. Zajimowani měli swoje požadanske podłožki nawodnicy Jěwje Mari Šnajderowej z mailku na adresu e.schneider@caritas-oberlausitz.de pósłać. Telefonisce ju pod čisłom (03 57 96) 94 24 70 docpěja.