Katolski Posoł – 13. septembra 2026

W aktualnym wudaću nańdźeće mjez druhim tole:

Što přeradźa značka z přešmórnjenym lodom wo Bohu? Na prěnje pohladnjenje drje jeničce praji, što njesměš činić. W swojim zawodnym nastawku pisa duchowny wo Božich kaznjach a zakazach, kiž hišće wjele wjace powědaja a wosebite poselstwo sposrědkuja.

Kemše, kotrež běchu prěnjotnje k slěbornemu biskopskemu jubilejej Heinricha Timmereversa planowane, přeměnichu so na rozžohnowansku swjatočnosć. Na kóncu Božeje mšě ze serbskim podźělom biskop z wosebitej gestu wěriwych k něčemu namołwi.

Što ma moderne słowo rezilienca ze swjatej Mariju zhromadnje? Na putniskej Božej mši na swjedźenju Marije naroda w Róžeńće biskop Heinrich Timmerevers wěriwym tole rozjasni. Pastoralni sobudźěłaćerjo Drježdźansko-Mišnjanskeho biskopstwa wobdźělichu so na putnikowanju a so k tomu wuprajeja.

Na Budyskim židowskim kěrchowje je so kantor Praskeje židowskeje wosady Michal Foršt z dźesatkami dalšich kadiš modlił. Zahajił bě wón swjatočnosć z wosebitym instrumentom.

W kapałce w Kamjenjej móžachu so dźěći na wosebitym wodźenju wobdźělić. Zdobom smědźachu něšto wuspytać, štož so hewak jenož k wěstym časam čini.

Rejza Šěnowa přija w Kamjencu statne myto. A někomu so wona cyle wuraznje dźakowaše.

Serbscy křižerjo, kotřiž chcedźa so klětu na putnikowanju wot soboty do soboty, 1. do 8. meje, wobdźělić, móža so hač do srjedy, 30. septembra, online přizjewić.

Katolske nabožne wusyłanje w Serbskim rozhłosu MDR ma tutu njedźelu, 13. septembra, Ralbičanski wosadny farar, kanonik Šćěpan Delan.

Za běh wo pokal zbóžneho Alojsa sobotu, 3. oktobra, w Radworju móža so zajimcy wotnětka online přizjewić. Započatk je we 8.30 hodź. při sportnišću. Wobdźělić móža so běharjo wšěch starobnych skupin wot šěsć lět za čary rozdźělneje dołhosće.

Sekcija wěda a skutk Towarstwa Cyrila a Metoda z.t. přeprošuje wšitkich wěriwych zaso na wosebity nyšpor domchowanki z požohnowanjom konjacych zapřahow. Tón budźe njedźelu, 27. septembra, w 14.00 hodź. na łuce při Hatkach w Chrósćicach.

Swój program „Serbskej nocy“ lětušeho Smochčanskeho hudźbneho swjedźenja předstaji Budyski Serbski ludowy ansambl (SLA) hišće raz, a to sobotu, 19. septembra, w 19.30 hodź. kaž tež njedźelu, 20. septembra, w 17.00 hodź. na žurli SLA. Zastupny lisćik móža sej zajimcy online kupić

Koncert pod titulom „Pod hwězdnišćom“ wuhotuje chór ewangelskeje wosady Emmaus z Willicha nad Delnim Rynom sobotu, 26. septembra, we 18.00 hodź. w klóštrje Marijinej hwězdźe w Pančicach-Kukowje. Zaklinča twórby Albrechta Haafa z „Kantate Camiono de Santiago“ a Bobbija Fischera z „Missa Latina, Magnificat“.

Serbski dom wobdźěli so na Dnju wotewrjeneho pomnika njedźelu, 13. septembra, w kotrymž je tež redakcija Katolskeho Posoła zaměstnjena. Wšitcy zajimcy móža sej wot 10.00 do 17.00 hodź. dom bliže wobhladać a mjez druhim rumnosći Katolskeho Posoła wopytać. Wšitcy su wutrobnje witani.

Nowy oratorij z titulom „Wulkotna woda“ předstaja chór a rejowanska skupina 1. serbskeje kulturneje brigady, Serbska komorna filharmonija a dalši njedźelu, 13. septembra, w 17.00 hodź. w Budyskej měšćanskej hali „Króna“. Cyłkowny hudźbny nawod změje Judith Kubicec. Zastupne lisćiki za Budyšin móža so online knihować. Dalše předstajenje budźe njedźelu, 27. septembra, w 17.00 hodź. w awli Liberecskeje uniwersity w sewjernej Čěskej. Za tute móža sej zajimcy zastupny lisćik jeničce telefonisce w Budyskim Serbskim ludowym ansamblu skazać, telefoniske čisło (0 35 91) 35 81 11.

Sekcija Swójba Towarstwa Cyrila a Metoda z.t. přeprošuje swójby na zabawne popołdnjo, kotrež wotměje so njedźelu, 13. septembra, we Wotrowje. Spočatk budźe w 15.00 hodź. při Starej šuli. Po wsy powjedźe Měrko Pohonč. Po wodźenju su wšitcy na swačinu na farje prošeni.

Worklečanske dekanatne dušepastyrstwo za dźěći přeprošuje wšitkich šulerjow wot 1. do 6. lětnika ze serbskich wosadow na zhromadny dźeń pod hesłom „Stark-Mach-Tag“. Zaměr je, dźěći přez zhromadnosć z druhimi, wjeselo při hraću a zaběru w jich sebjewědomju skrućić. Zarjadowanje ze stajnje samsnym wobsahom za dźěći budźe na sćěhowacych terminach: sobotu, 10. oktobra, w Njebjelčicach, wutoru, 13. oktobra, w Ralbicach a srjedu, 14. oktobra, w Radworju. Ličba městnow je wobmjezowana. Přizjewjenja přijimuja hač do pjatka, 18. septembra, online.

Wšitke dźěći, kotrež so na prěnje swjate woprawjenje přihotuja, su na zhromadny dźeń do Njebjelčic přeprošene. Tón budźe srjedu, 18. nowembra, wot 9.00 do 15.00 hodź. Započatk je z Božej mšu w cyrkwi, na kotruž su tež starši wutrobnje witani. Zajimcy njech so hač do soboty, 24. oktobra, pod www.posol.de přizjewja. Swójski přinošk na wobdźělnika wučinja sydom eurow.

Hornjołužiski zwjazk Carity z.t. pyta za Dnjowu hladarnju „Při Krabatowym puću“ we Worklecach tak spěšnje kaž móžno wosobu, kotraž by tam rjedźiła. Zajimowani měli swoje požadanske podłožki nawodnicy Jěwje Mari Šnajderowej z mailku na adresu e.schneider@caritas-oberlausitz.de pósłać. Telefonisce ju pod čisłom (03 57 96) 94 24 70 docpěja.