Katolski Posoł – 12. julija 2026
Bože słowo zda so druhdy bjez wuskutka wostać, tola snano čaka jenož na prawy wokomik, zo by płód přinjesło. To pisa duchowny w zawodnym nastawku dopominajo so na swoje dźěćatstwa a nawjazuje zwisk k přirunanju ze swjateho sćenja tuteje njedźele.
Wot. 1. do 8. meje 2027 wotměje so Serbske křižerske putnikowanje do Roma. Wobdźělnicy wobhladaja sej nimo hłownych cyrkwjow tež katakombu Domitilla. Hłowny programowy dypk budźe wobdźělenje na generalnej awdiency bamža Leja XIV. we Vatikanje, dožiwja pak tež spřisahanje nowych Šwicarskich gardistow.
„Na čo móžeš so hišće spušćeć?“ Tole so prašejo poćahowaše so prědar kanonik Šćěpan Delan na putnikowanju na swjedźenju Marije wopytanja w Róžeńće na aktualne swětowe połoženje. W magnifikaće spóznawa wón něšto, štož móže napřećo strachej a mócnarskej politice skutkować.
Dźěći Drježdźansko-Mišnjanskeho biskopstwa putnikowachu w prěnim prózdninskim tydźenju do Róžanta. Biskop Heinrich Timmerevers je někoho sobu přiwjezł, kotryž ma z lětušej temu „Mójzeso, pój, hibaj so!“ něštožkuli činić.
Prěnju prózdninsku njedźelu buchu w Radworju nowi ministranća do swojeje słužby při wołtarju přiwzaći. Na kemšach nawjaza farar Beno Jakubaš na něšto, štož ležeše we wołtarnišću a štož wón z dowolowym časom zwjazowaše.
Dnjowa hladarnja „Při Krabatowym puću“ we Worklecach wobsteji mjeztym pjeć lět. Kotre wužadanja a starosće, ale tež wjesela je nawodnica dožiwiła, wona w interviewje rozłožuje.
Kulowska wosada je fararja Johannesa Magieru ze swjedźenjom za jeho 65 lět trajace měšniske skutkowanje počesćiła. Najebać to, zo je 90lětny hižo wot 2010 na wuměnku, je nadal aktiwny.
Na Radworskej cyrkwinej wěži wuhladachu tele dny překwapjenku. Hačrunje wot lěta 2020 na nju čakachu, ju poprawom njewočakowachu.
Skupina Chróšćanskeho pasionskeho zjednoćenstwa wobdźěli so na kongresu Europasion w awstriskim St. Margarethenje. Wobhladachu sej wšelake městna a pasionsku hru, kotruž hrajachu tam ze žónskeho wida.
Ewangelske nabožne wusyłanje w Serbskim rozhłosu MDR ma tutu njedźelu, 12. julija, serbska fararka Jadwiga Malinkowa ze Slepoho.
Křesćansko-socialny kubłanski skutk Sakska z.t. (CSB) přeprosy wšitkich na „Nóc tysac swěčkow“, kiž wotměje so sobotu 18. julija, wot 19.00 hodź. na zelowej zahrodźe klóštra Marijineje hwězdy w Pančicach-Kukowje. Hač do zaswěćenja swěčkow poskića jědź a napoje, kaž tež pisany program na jewišću. Mjez druhim wustupitej „Duo Helena & Jan“ a rejowanska skupina „Łužičanska rapsodija“. Zastupne lisćiki su online na předań.
Hospicna słužba Hornjołužiskeho zwjazka Carity z.t. přeprošuje na žarowanskej kruhaj, kotrejž zahajitej so štwórtk, 18. septembra. Jedyn je za dźěći, druhi paralelnje za dorosćenych mysleny. Wobaj trajetej stajnje wot 16.00 do 18.00 hodź. Prěnje zetkanje budźe w rumnosćach zwjazka Carity w Kamjencu na Zapadnej 22. Zajimcy měli so za kurs, kotryž přewjedźe so z dźesać zetkanjemi něhdźe do srjedź lěta 2027, do toho telefonisce pod čisłom (0 35 78) 37 43 12 abo z mailku: Hospiz@Caritas-Oberlausitz.de přizjewić.
W Budyskej Michałskej cyrkwi je wotnětka fotowa wustajeńca přistupna. Na 18 fotach su wšelake warianty drasty ewangelskich Serbow Budyskeho kraja widźeć. Fotograf Tilo Aé z Brandisa pola Lipska je projekt hromadźe z holcami a žonami Bukečanskeje wosady zwoprawdźił. W Bukecach běchu hišće hač dosrjedż 19. lětstotka wšědnje w narodnej drasće chodźili.
Serbska dekanatna młodźina je na zhromadny wulět do Sprjowjow, Čelna a Noweho Města nad Sprjewju přeprošeni, kotryž budźe njedźelu, 13. septembra. Zajimcy měli so hač do póndźele, 10. awgusta, online přizjewić.
Za koho abo što sym poprawom w žiwjenju po puću? Z tutym prašenjom, ale tež ze swójskim pytanjom za žiwjenskimi slědami móža so zajimče na zhromadnych dnjach za žony zaběrać, na kotrež přeprošuje DrježdźanskoMišnjanske biskopstwo. Wone budu wot pjatka do njedźele, 4. do 6. septembra, w swójbnym a dowolowym domje swjateje Wórše w Struppenje w Sakskej Šwicy.
Serbska protyka
