Katolski Posoł – 14. junija 2026
Wo powołanju dwanaće wučomnikow, kotrež steji w srjedźišću ewangelija tuteje njedźele, rozmysluje awtor w swojim zawodnym nastawku. Mjez druhim wón wuwjedźe, što to za talenty ludźi dźensa woznamjenja.
Z wosebitym projektom je 275 wosobow w Drježdźanskej katedrali zmóžniło, zo je Bože słowo wjacore dny tam słyšeć było. Mjez sobuskutkowacymi běchu někotři Serbja.
Katolscy Serbja su Berlinsku kuchnju za potrěbnych w franciskanskim klóštrje podpěrali. Přez dlěši čas nahromadźene dary su nětko přepodali.
Sakski ministerski prezident Michael Kretschmer je Chróšćanske pasionske zjednoćenstwo w statnej kencliji přijał. Z rukow předsydy zjednoćenstwa dósta wón dopomnjenku na lońše hry.
Blisko Münstera je serbska rjadniska sotra Aleksija Bermichec z rjadu sotrow Božeje předwidźiwosće na prawdu Božu wotešła. Wjace hač dźesać lět je wona tež we Worklecach skutkowała.
Impresije ze swjedźenja Božeho ćěła w Njebjelčicach
Ewangelske nabožne wusyłanje w Serbskim rozhłosu MDR tutu njedźelu, 14. junija, budźe we wobłuku Serbskeho ewangelskeho cyrkwinskeho dnja we Wojerecach. Kemše wusyłaja wot 10.00 hodź. live. Nabožne wusyłanje w 12.00 hodź. tohodla njebudźe.
Na lětušim putnikowanju dźěći ze wšeho biskopstwa do Róžanta, srjedu, 8. julija, wobrubitej zhromadny dźěćacy chór Drježdźansko-Mišnjanskeho a Zhorjelskeho biskopstwa kaž tež projektowy chór serbskich dźěći Božu mšu a nyšpor. Dźěći, kotrež chcedźa tón dźeń w serbskim chórje sobu spěwać, su lubje witane. Spěwy nazwučuja sobotu, 20. junija, wot 9.00 do 11.00 hodź. a sobotu, 4. julija, wot 10.00 do 11.30 hodź. we Worklečanskim Don Boskowym domje. Wobě probje stej wuměnjenje za spěwanje w projektnym chórje. Přizjewjenja přijimuja hač do póndźele, 15. junija, online.
Budyski Serbski muzej přeprošuje znowa na „Kofej w třoch“. Srjedu, 17. junija, w 15.00 hodź. budźe tam dr. Lubina Malinkowa, wědomostna sobudźěłaćerka Serbskeho instituta, na temu „Z Łužicy do swěta. Serbscy misionarojo“ přednošować.
Na modlenje před Najswjećišim su wěriwi sobotu, 20. junija, we 18.00 hodź. do Róžeńčanskeje hnadowneje cyrkwje přeprošeni. Paćerje budu w serbskej a němskej rěči spěwane.
Miłočanski Křesćansko-socialny kubłanski skutk z.t. přeprošuje zhromadnje z klóštrom Marijinej hwězdu w Pančicach-Kukowje na klóšterski a swójbny swjedźeń, Budyskeho wokresa. Po Božej mši njedźelu, 21. junija, w 10.30 hodź. z generalnym wikarom Andreasom Kutschku pokročuja z pisanym programom na klóšterskim dworje. W 17.30 hodź. budźe ekumeniski nyšpor.
Telefonowe dušepastyrstwo kaž tež ambulantna hospicna a paliatiwna poradźowanska słužba w Budyšinje wobstejitej 30 lět. Swjatočnosće ke kulowatej róčnicy zahaja so njedźelu, 21. junija, w 14.00 hodź. z ekumeniskej Božej słužbu w Budyskej tachantskej cyrkwi swjateho Pětra. Po zhromadnej swačinje na zahrodźe katolskeje fary sćěhuje w 16.30 hodź. znowa w cyrkwi přednošk Samuela Kocha. Zastup je darmotny, proša pak wo dary.
Drježdźansko-Mišnjanske biskopstwo swjeći lětsa 275. róčnicu wobstaća něhdyšeje Dwórskeje cyrkwje. Wjeršk swjatočnosćow budźe pontifikalna Boža mša z biskopom Heinrichom Timmereversom njedźelu, 28. junija, w 10.00 hodź., kotrež chce sćelak MDR w rozhłosu originalnje wusyłać. Kemše tohorunja přez livestream přenjesu. – k livestreamej
Drježdźanscy Serbja – wosebje tež młodźi – su na maćernorěčnu Božu mšu njedźelu, 28. junija, hižo w 15.00 hodź. do cyrkwje swjateho Antonija na Bünauskej 10 přeprošeni. Přizamknje so bjesada ze swačinu.
Chór Meja přeprošuje na swój lětni koncert, kotryž budźe njedźelu, 28. junija, w 16.00 hodź. na farskej zahrodźe w Radworju. Wot 15.30 hodź. poskića swačinu. Jako hosći su sej lětsa dźěći rejwarskeje skupiny Łužičanka přeprosyli.
Worklečanske dekanatne dušepastyrstwo za dźěći a młodźinu poskićuje kubłanje k prewenciji přećiwo seksualizowanej namocy. Wone wotměje so póndźelu, 29. junija, wot 16.30 do 19.45 hodź. we Worklečanskim Don Boskowym domje. Zarjadowanje, kiž budźe w němskej rěči, je za wšitkich pomocnikow nabožnych prózdninskich dnjow we wosadach winowatostne, ale tež za dalšich čestnohamtsce skutkowacych, kotřiž maja tam zwisk z dźěćimi a młodostnymi, na přikład w sakristiji abo ze šolu. Zajimcy měli so online přizjewić. Ličba městnow je wobmjezowana.
Drježdźansko-Mišnjanske biskopstwo startuje nazymu nowe wukubłanje, kotrež ludźi za to kwalifikuje, spirituelny poskitk „Eksercicijow we wšědnym žiwjenju“ samostatnje přewodźeć. Wukubłanje wupřestrěwa so wot septembra 2026 hač do nowembra 2027 w Drježdźanskim Domje Wysoke duby a prawidłownje tež digitalnje. Zajimcy měli so hač do srjedy, 1. julija, pak na mailku petramaria.brugger@bddmei.de abo g.giele@gmx.de přizjewić.
W cistercienskim prioraće w Nowej Cali wotměje so wot pjatka do njedźele, 3. do 5. julija, kongres „Adoratio“. Zajimcy měli so online abo z mailku na kontakt@mariafriedenshort.de přizjewić.
Dnjowa hladarnja Carity Carity „Při Krabatowym puću“ we Worklecach woswjeći sobotu, 4. julija, swoje pjećlětne wobstaće. To chce z hosćimi před domom hladarnje Při zelenišćach 5 činić, hdźež zahudźi wot 16.00 hodź. dujerska kapała Horjany. Wot 19.00 hodź. přewjedźe spěwny kwartet „PoŠtyrjoch“ zjawnu probu. Ćělne derjeměće budźe zaručene.
Lětuše putnikowanje młodźiny do Krupki je wot njedźele do pjatka, 26. do 31. julija. Putniske kemše w Krupce budu srjedu, 29. julija, w 10.00 hodź. Štóž chcył kemši z busom sobu jěć, měł so w Radworskim Šmitec-Schwarzec wozydłownistwje přizjewić, telefonowe čisło (03 59 35) 28 60.
W sewjeročěskim Vilémovje (Wölmsdorf) spominaja lětsa na 300. róčnicu poswjećenja tamnišeje cyrkwje Marije donjebjeswzaća. Tole kaž tež 200lětne wobstaće putnikowanja k swjatnicy, kiž měješe sčasami wobšěrny serbski podźěl, chcedźa na swjedźenju Marije donjebjeswzaća, sobotu, 15. awgusta, wopominać. Wosebje Łužiscy Serbja su na to wutrobnje přeprošeni.
Serbska protyka
