Katolski Posoł – 17. septembra 2023
Wo přikładźe, po kotrymž so čłowjek w žiwjenju orientuje a z kim so přirunuje, pisa awtor w swojim zawodnym nastawku. W tutym zwisku pokaza wón zdobom na moralisku orientaciju, kotraž so w ewangeliju tuteje njedźele na hłowu staja.
Na zakładźe stawizny pokaza serbski duchowny w swojim prědowanju na swjedźenju Marije naroda na nadawki křesćana dźensa. Wěriwi ze serbskich wosadow běchu tón dźeń zaso w bohatej ličbje do Róžanta putnikowali.
W dobrej zhromadnosći woswjećichu wosadni kulowate narodniny swojeho duchowneho. Na swjedźenju po dźaknym nyšporje jeho mnozy překwapichu.
Čłonojo Kulowskeho Bratrowstwa běchu sej na zhromadnym wulěće mnohim hišće njeznaty dźěl Hornjeje Łužicy wotkryli. Při tym spřistupni jim serbski krosnowar tu abo tamnu zajimawostku a měješe za zmužitych tež małe wužadanje přihotowane.
Za čas nacionalsocializma je pólska swójba „hidźe a namocy lubosć ewangelija napřećo stajiła“, a to w tym, zo je na swojim statoku někoho chowała. To je droho zapłaćiła. Za to bu wona nětko zbóžnoprajena.
Pod hesłom „Bjer sej chwile“ putnikowachu zbrašeni ludźo z hornjołužiskich zarjadnišćow do Róžanta. Mjez druhim zaběrachu so z tym, za čo sej něchtó chwile bjerje.
We wobłuku wosebiteje dźěłarnički rozšěrichu a pohłubšichu wobdźělnicy zakładnu wědu w seksualnopedagogiskim wobłuku. Awtorka přinoška zdobom poruča, mjenowany kurs do šulskeje wučby zapřijeć.
Tutu njedźelu je tomu 60 lět, zo zemrě serbski duchowny, kiž běše wěsty čas městopředsyda Domowiny. Jako kapłan a farar skutkowaše tež zwonka dwurěčneje Łužicy.
W Berlinje wotmě so 37. mjezynarodne měrowe zetkanje křesćanskeho zhromadźenstwa Sant’Egidio. Zastupjerjo wšelakich nabožinow, ale tež politiki a towaršnosće wuměnjachu swoje mysle a nazhonjenja wo pućach z wójnow a krizow.
Worklečanske młodźinske dušepastyrstwo přewjedźe tež klětu zaso za zajimcow kurs JULEICA. Wukubłanje wobsteji z dweju dźělow a wotměje so stajnje wot pjatka do njedźele, 2. do 4. februara, kaž tež wot 26. do 28. apryla, w Smochćicach, tam z přenocowanjom. Zajimcy měli so nimo toho na kursu prěnjeje pomocy wobdźělić. Tón budźe sobotu, 2. měrca, we Worklečanskim Don Boskowym domje. Přizjewjenja přijimuja online.
W nowej knize wo dźiwadłowej hrě „Mór a lubosć“, kotruž je Towarstwo Cyrila a Metoda z.t. (TCM) spočatk septembra wudało, je QRcode podaty, kotryž wjedźe na film wo tutej hrě. Něhdźe 280stronsku knižnu dokumentaciju z wjace hač 400 fotami předawa TCM za 30 eurow pola časnikarja Jürgena Njeka kaž tež w Zahrodnikec pjekarni w Chrósćicach, w apotece w Pančicach-Kukowje, w redakciji Katolskeho Posoła w Budyšinje kaž tež pola Rafaela Ledźborja w Ralbicach.
Dekanatne dušepastyrstwo za dźěći zarjaduje za 1. a 2. lětnik dźeń pod hesłom „Dźak Ći, Božo“. Wón wotměje so sobotu, 30. septembra, wot 9.00 do 15.00 hodź. we Worklečanskim Don Boskowym domje. Za wudawki zběraja wot kóždeho wobdźělnika přinošk pjeć eurow. Zajimcy měli so hač do njedźele, 24. septembra, online přizjewić.
Katolska domowa hudźba při Budyskej tachantskej cyrkwi swjateho Pětra zahaji w zymskim semestrje chórowy spěwny kubłanski projekt za dźěći a młodostnych w šulskej starobje. Přizjewjenja přijimuja hač do njedźele, 24. septembra.
Serbska protyka
