Katolski Posoł – 19. julija 2026
Prózdninski a dowolowy čas je čas zazběha. Předwjeselo rosće, kófry so pakuja a nowe puće čakaja, přewodźane wot wćipnosće, ale tež wot někotreježkuli njewěstosće. Čehodla njeměł Bóh w žanym pućowanskim wačoku pobrachować, duchowny w zawodnym nastawku hłubšo rozmysluje.
Wot. 1. do 8. meje 2027 wotměje so Serbske křižerske putnikowanje do Roma. Wobdźělnicy wobhladaja sej nimo hłownych cyrkwjow tež katakombu Domitilla. Hłowny programowy dypk budźe wobdźělenje na generalnej awdiency bamža Leja XIV. we Vatikanje, dožiwja pak tež spřisahanje nowych Šwicarskich gardistow.
We Łusču so Barčec mandźelskaj a jeju swójby hnydom dweju podawkow dla wjeselachu. Awtor přinoška wopisuje mjez druhim, kotre lětoličby při tym wěstu rólu hraja.
„Mójzeso, pój – hibaj so!“ bě hesło lětušich nabožnych prózdninskich dnjow. Z Božimi słužbami, katechezami a kreatiwnymi poskitkami su zamołwići stawizny Mójzesa do srjedźišća stajili. Awtorka přinoška bě nawodnica jedneje ze skupinow a rozprawja mjez druhim wo tym, što bě za Chróšćanske dźěći highlight tydźenja.
Katolska akademija Drježdźansko-Mišnjanskeho biskopstwa je w swojej podcastowej seriji „Mit Herz und Haltung“ epizodu k temje lětušeho nabožneho tydźenja wozjewiła. Pod titulom „Štó bě poprawom Mójzes? Bibliske pozadki k nabožnemu tydźenjej 2026“ Lipšćanski radijowy žurnalist Daniel Heinze a bibliski wědomostnik dr. Christian Schramm, temu rozjimujetaj.
W Pančicach-Kukowje su nabožny tydźeń z něčim zakónčili, štož běchu w druhich wosadach hižo před tydźenjemi přewjedli. Zdobom přebywachu Budyske dźěći cyły tydźeń blisko nich w Božej stwórbje.
Katolski žurnalist z Mnichowa dósta na přinošk w swětnej nowinje wo swojich dožiwjenjach jako wěriwy čłowjek wjace hač 500 reakcijow. Tohodla spisa k tomu knihu, kotruž serbski wučer jara doporuča.
Dźěći wot staroby sydom lět móža wutoru, 11. awgusta, wot 10.00 do 12.30 hodź. w Budyskim Serbskim muzeju zaškleńčne molowanje zeznać a nałožować. Krok po kroku nawuknu wosebitu wuměłsku techniku, tak zo nastanje na škleńcy hotowa molowanka. Přizjewjenja přijimuje Serbski muzej pod mailowej adresu ticket@sorbisches-museum.de abo telefonisce pod čisłom (0 35 91) 2 70 87 00.
Ewangelske nabožne wusyłanje w Serbskim rozhłosu MDR ma tutu njedźelu, 12. julija, serbska fararka Jadwiga Malinkowa ze Slepoho.
Serbske ewangelske towarstwo a Maćijec swójba přeprošujetej wšitkich Serbow na lětnje pućowanje a serbski swjedźeń sobotu, 22. awgusta. Započatk je w 14.00 hodź. na Jaworkec/Maćijec dworje w Hrubjelčicach, Ćěchorječanska 16. Wottam podadźa so na pućowanje do wokoliny. Po tym budźe na Jaworkec/Maćijec dworje kofej spřihotowany. Přizamknje so w 17.00 hodź. serbska ekumeniska nutrnosć z dekanom Witom Sćapanom a superintendentom Krystofom Rummelom. Wot 18.00 hodź. hač do nocy sćěhuje hudźba Drježdźanskeje kapały Podka pod nawodom Jurja Čornaka.
Za jězbu z Radworskim Šmitec-Schwarzec wozydłownistwom pod hesłom „Wěra zetka hudźbu“ wot póndźele do štwórtka, 10. do 13. awgusta, do Erfurta su hišće městna swobodne. Mjez druhim wopytaja wobdźělnicy klóšter awgustinow a tamniši měšniski seminar. Dale wobdźěla so na Erfurtskich Domowych swjedźenskich hrach z předstajenjom musicala „Jesus Christ Superstar“. Přizjewjenja přijimuja pod telefonowym čisłom (03 59 35) 28 60.
Zajimcy wot 15 lět móža so za dobrowólne socialne lěto pola Zwjazka Carity w Drježdźansko-Mišnjanskim biskopstwje z.t. přizjewić, kotrež so wutoru, 1. septembra, zahaji. Započeć móža pak tež pozdźišo. Městnosće dźěła su mjez druhim w biskopskej šuli Marije Montessori w Budyšinje, w Marije-Marćinym domje w Pančicach-Kukowje, w Chróšćanskim Domje swjateje Ludmile, w Kamjenskej Dźěłarni swjateho Mikławša abo w Smječkečanskim Domje swjateho Jana kaž tež w cyrkwinskich zarjadnišćach w Lipsku a Drježdźanach. Kóždu wutoru w 15.00 hodź. poskićuje Zwjazk Carity onlinowe informaciske popołdnjo. Za nje měli so zajimcy z mailku pod adresu fd@caritas-dicvdresden.de přizjewić.
Hospicna słužba Hornjołužiskeho zwjazka Carity z.t. přeprošuje na žarowanskej kruhaj, kotrejž zahajitej so štwórtk, 18. septembra. Jedyn je za dźěći, druhi paralelnje za dorosćenych mysleny. Wobaj trajetej stajnje wot 16.00 do 18.00 hodź. Prěnje zetkanje budźe w rumnosćach zwjazka Carity w Kamjencu na Zapadnej 22. Zajimcy měli so za kurs, kotryž přewjedźe so z dźesać zetkanjemi něhdźe do srjedź lěta 2027, do toho telefonisce pod čisłom (0 35 78) 37 43 12 abo z mailku: Hospiz@Caritas-Oberlausitz.de přizjewić.
Towarstwo Cyrila a Metoda z.t. chce ze swojej akciju „Łužica pomha“ towarstwo Domus w Rumunskej podpěrać, kotrež twari tam bydlenja za syroty.
Štóž chcył akciju z pjenježnym darom podpěrać, njech přepokaza swój dar na konto Towarstwa Cyrila a Metoda z.t. (TCM): Cyrill-Methodius-Verein e.V., IBAN DE65 7509 0300 0008 2823 66, hesło: Rumunska. Za dary hač do 300 eurow dosaha za financny zarjad mjeztym jako dopokaz kontowy wućah. Za wyše sumy wustaji TCM darowansku kwitowanku, trjeba pak dospołnu adresu, kotruž měli z mailku na
TCM@Posol.de abo telefonisce pod (0 35 91) 55 02 10 zdźělić.
W Budyskej Michałskej cyrkwi je wotnětka fotowa wustajeńca přistupna. Na 18 fotach su wšelake warianty drasty ewangelskich Serbow Budyskeho kraja widźeć. Fotograf Tilo Aé z Brandisa pola Lipska je projekt hromadźe z holcami a žonami Bukečanskeje wosady zwoprawdźił. W Bukecach běchu hišće hač dosrjedż 19. lětstotka wšědnje w narodnej drasće chodźili.
Za koho abo što sym poprawom w žiwjenju po puću? Z tutym prašenjom, ale tež ze swójskim pytanjom za žiwjenskimi slědami móža so zajimče na zhromadnych dnjach za žony zaběrać, na kotrež přeprošuje DrježdźanskoMišnjanske biskopstwo. Wone budu wot pjatka do njedźele, 4. do 6. septembra, w swójbnym a dowolowym domje swjateje Wórše w Struppenje w Sakskej Šwicy.
Serbska protyka
