Katolski Posoł – 5. julija 2026
Selfieje słušeja dźensa k wšědnemu žiwjenju. Tola što by było, hdy by Bóh selfie činił? Eksistuje scyła wobraz wo nim? Biblija dawa na to překwapjacu wotmołwu, wo kotrejž serbski duchowny w swojim přinošku rozmysluje.
Biskop Heinrich Timmerevers bu z najwyšim rjadniskim wuznamjenjenjom maltezow počesćowany. Z nim počesćeja woni wosobiny, kotrež su sej na wosebite wašnje w zwisku z česću, nahladnosću a naležnosćemi suwereneho ryćerskeho rjadu maltezow zasłužby zdobyli.
Z Drježdźan pochadźacy Clemens Ulbricht bu w Drježdźanskej katedrali na diakona wuswjećeny. Za swój nowy nadawk je jemu biskop Timmerevers wosebitu sadu sobu na puć dał.
W žiwjenju móža hižo małke podawki kaž dźiw skutkować. Na patronatnej Božej mši Smječkečanskeho Domu swjateho Jana zhonichu kemšerjo wo podawiznach, kotrež so wobydlerjam kaž dźiwy zdachu.
Skupina Serbow je sej w awstriskim St. Margarethenje pasionske hry wobhladała. Tam su pasion prěni króć z wida žony předstajili, kotraž bě Jězusej bliska.
Farar dr. Michael Kleiner woswjeći spočatk julija swoje 80. narodniny. Što bě jemu wjace hač hobby a kotre seminary wón w kubłanišću swjateho Bena załoži, duchowny a sobubratr w swojim přinošku bliže wopisuje.
W Ralbicach je farar Šćěpan Delan sydom nowych ministrantow přiwzał. W swojim prědowanju duchowny něšto wuzběhny, štož bě sam před 40 lětami prajił.
W Jaworniku wotmě so konferenca nawodow dušepastyrstwow wšitkich němskorěčnych diecezow. Nimo seminarow dožiwichu wobdźělnicy tež program ze serbskim podźělom.
W Chrósćicach je wosadny farar Měrćin Deleńk nowych ministrantow do słužby při wołtarju přiwzał. Młody ministrant rozprawja, na kotre wašnje su so na tónle nowy nadawk přihotowali.
Wočerstwjenje njeje žadyn luksus, ale je dar. Tež Bóh je po stworjenju swěta jedyn dźeń wotpočnył. Čehodla trjeba čłowjek přestawki a čehodla je njedźela dar Boži, wo tym awtor hłubšo rozmysluje.
Hana Dejowa bě poslednja nošerka serbskeje drasty w Radworskej wosadźe. Po Druhej swětowej wójnje dźěłaše wona pola Radworskeho wojnarja, jako tajku je ju tež Maćij Bulank za knihu „Prjedy hač woteńdźeš“ fotografował, kotraž je 2011 w Budyskim Ludowym nakładnistwje Domowina wušła.
Towarstwo Cyrila a Metoda z.t. chce ze swojej akciju „Łužica pomha“ towarstwo Domus w Rumunskej podpěrać, kotrež twari tam bydlenja za syroty.
Štóž chcył akciju z pjenježnym darom podpěrać, njech přepokaza swój dar na konto Towarstwa Cyrila a Metoda z.t. (TCM): Cyrill-Methodius-Verein e.V., IBAN DE65 7509 0300 0008 2823 66, hesło: Rumunska. Za dary hač do 300 eurow dosaha za financny zarjad mjeztym jako dopokaz kontowy wućah. Za wyše sumy wustaji TCM darowansku kwitowanku, trjeba pak dospołnu adresu, kotruž měli z mailku na
TCM@Posol.de abo telefonisce pod (0 35 91) 55 02 10 zdźělić.
Katolske nabožne wusyłanje w Serbskim rozhłosu MDR ma tutu njedźelu, 5. julija, farar Gerat Wornar z Baćonja. Wotkaz na nabožne wusyłanje w mediatece MDR je pod www.posol.de podaty.
W rjedźe publikacijow dźěćaceho časopisa „Płomjo-edicija“ je kniha wo 34 zelach a rostlinach wušła, kotruž je Marija Koklina napisała. Kniha zbliži fascinowacy swět domjacych zelow a rostlinow. Zajimcy móža sej 72 stronow wopřijacu publikaciju we wšěch znatych předawarnišćach serbskich knihow za 9,90 eurow kupić.
Křesćansko-socialny kubłanski skutk Sakska z.t. (CSB) přeprosy wšitkich na „Nóc tysac swěčkow“, kiž wotměje so sobotu 18. julija, wot 19.00 hodź. na zelowej zahrodźe klóštra Marijineje hwězdy w Pančicach-Kukowje. Hač do zaswěćenja swěčkow poskića jědź a napoje, kaž tež pisany program na jewišću. Mjez druhim wustupitej „Duo Helena & Jan“ a rejowanska skupina „Łužičanska rapsodija“. Zastupne lisćiki su online na předań.
Wječor za wšitke zmysły wočakuje wobdźělnikow dalšeho zarjadowanja w rjedźe „Přijomnosć & kultura“ srjedu, 8. julija, w 19.00 hodź. Wone budźe w klóšterskej zahrodźe Marijineje hwězdy, hdźež wěnuja so kulinariskim sezonowym specialitam. Skupina „da & da“ Acoustic-Duo and friends z Danielu Hazec, Darekom Kirilovom a Maxom Schneiderom z Worklec wječor hudźbnje wobrubi. Zastupne lisćiki płaća w předpředani 25,00 eurow a při wječornej kasy 29,00 eurow. Zajimcy dóstanu je w klóšterskej zahrodźe a w klóšterskim wobchodźe. Zdobom móža sej je pola Sonje Hejdušcyneje skazać, telefonowe čisło (03 57 96) 9 71 30, abo z mejlku na sonja.heiduschka@csb-miltitz.de.
Serbska dekanatna młodźina je tež lětsa na zhromadny wulět přeprošena, kotryž budźe njedźelu, 13. septembra. Přeprošeni su tohorunja młodostni wot přichodneho 9. lětnika. Planowane je z busom do Sprjowjow (Sprey) pola Hamora jěć, hdźež budźe zhromadny nyšpor w tamnišej cyrkwi. Přizamknje so čołmikowanje z Čelna do Noweho města/Sprjewja. Tam wulět z grilowanjom wuklinči. Wotjězd busow budźe w 12.00 hodź., mjez druhim z Kulowa kaž tež Chrósćic a potom wotpowědnje přizjewjenjow po wsach. Młodostni nawróća so wokoło 19.30 hodź. Přinošk wučinja na wobdźělnika 25,00 eurow, čłonojo serbskeho dekanatneho kružka kaž tež wobsedźerjo karty JULEICA płaća pjeć eurow. Zajimcy měli so hač do póndźele, 10. awgusta, online přizjewić.
Za koho abo što sym poprawom w žiwjenju po puću? Z tutym prašenjom, ale tež ze swójskim pytanjom za žiwjenskimi slědami móža so zajimče na zhromadnych dnjach za žony zaběrać, na kotrež přeprošuje DrježdźanskoMišnjanske biskopstwo. Wone budu wot pjatka do njedźele, 4. do 6. septembra, w swójbnym a dowolowym domje swjateje Wórše w Struppenje w Sakskej Šwicy.
Serbska protyka
