Katolski Posoł – 7. januara 2024
Wo swětle, kotrež ludźi wabi, pisa serbski duchowny w swojim zawodnym nastawku. Wěnujo so swjedźenjej, kotryž cyrkej spočatk januara swjeći, so wón mjez druhim praša, što móže kóždy jednotliwc Jězusej Chrystusej darić.
Katolscy biskopja w Němskej kaž tež bamž Franciskus su w swojich hodownych narěčach k měrej a pokojej na swěće namołwjeli. Zdobom stejachu swjatočnosće w Kölnskej katedrali hrožaceho nadpada dla w sćinje zwyšeneho strašneho połoženja.
Móhłrjec swójbny chór wuhotowaše tónraz kónclětny hudźbny nyšpor w Baćonju. Pod nawodom Jadwigi Kaulfürstoweje zanjesechu měšeńcu klasiskich a modernych serbskich kaž tež jendźelskorěčnych spěwow a kěrlušow.
Tysacy młodostni wobdźělichu so wot kónc decembra hač do spočatk januara na europskim młodźinskim zetkanju Taizéskeho zhromadźenstwa w Ljubljanje. Přichodny hosćićel budźe kónc tohole lěta estiska stolica Tallinn.
Chorosć młodeho muža z Ralbičanskeje wosady je syłu młodostnych k modlenju pohnuła. To činja woni na wšelake wašnje. Mjez druhim swjećachu za njeho młodostni Kulowskeje a Ralbičanskeje wosady Božu mšu w swětle swěčkow sobotu do patoržicy w Šunowskej kapałce.
Zabyty jandźel, kotrehož hraještej na woběmaj předstajenjomaj wšelakej wosobje, steješe w srjedźišću hodowneje hry w Ralbicach. Kruch běše mać z wosady napisała a zhromadnje z druhej maćerju z dźěćimi nazwučowała.
Z mnohostronskej podpěru su dźěći farskeje wikarije w Pančicach-Kukowje swoju hodownu hru nazwučowali a přihotowali. Poprawom chcychu ju pod hołym njebjom předstajić, wjedra dla pak činjachu to na hinašim městnje.
Dźěći Njebjelčanskeje wosady předstajichu swoju hodownu hru posledni dźeń lěta, na dopołdnišich kemšach. Z wulkim elanom běchu ju w adwentnym času nazwučowali.
Po dołhej a sćerpnje znjesenej chorosći zemrě w Budyšinje farar dr. Michael Ulrich, kotryž přisłušeše oratorijej swjateho Filipa Nerija. Serbam je wón předewšěm z časa swojeho skutkowanja wot 1999 do 2018 w tehdyšim Smochčanskim Domje biskopa Bena znaty.
W Róžeńće wuhotowaše chór Lipa tež loni zaso swój hodowny beneficny koncert. Tónkróć mějachu zdobom nowosć spřihotowanu.
Na mjeztym 12. kulturnu zymu přeprošuje Monika Gerdesowa do swojeje putniskeje hospody w Chrósćicach. Hač do februara poskićuje wona wšelake zarjadowanja za dźěći a dorosćenych w serbskej a němskej rěči.
W putniskej hospodźe w Hirschfeldźe budu wot prěnjeje adwentneje njedźele, 3. decembra, hač do swjedźenja Předstajenja Knjeza, pjatk,
2. februara, zaso Bože narodki
wustajene. Cyłkownje poskića 27 wodźenjow po wustajeńcy.
Dekanatne dušepastyrstwo za dźěći přeprošuje šulerki a šulerjow 5. do 8. lětnika w lětnich prózdninach na jězbu do Lückendorfa w Žitawskich horach. Wona wotměje so wot póndźele do pjatka, 8. do 12. julija. Přizjewjenja přijimuja hač do njedźele, 31. měrca, online.
Seminary k přihotej na sakrament mandźelstwa wotměja so klětu stajnje pjatk a sobotu, 16. a 17. februara, 26. a 27. apryla kaž tež 29. a 30. nowembra w Smochčanskim kubłanišću swjateho Bena. Přizjewjenja přijimuja hač do srjedy, 17. januara.
Serbska protyka
