Katolski Posoł – 18. januara 2026
Wo wosebitym wupokazu kaž tež dalšej identitiće křesćana pisa prowincial Srjedźoeuropskeje prowincy rjadu oblatow bjezhrěšneje knježny Marije w swojim zawodnym nastawku. Ta ma swoje korjenje w nowozakonskim čitanju tuteje njedźele.
Swój lětny swjedźeń je serbske towarstwo Kulowskeje wosady w Sulšecach wotměło. Nimo rejowanja a spěwanja mějachu tež přičiny so z wutroby smjeć.
Na swoje prěnje lěto jako hotelowa managerka Smochčanskeho kubłanišća swjateho Bena zhladuje Sibylle Richards. W interviewje wona zwuraznja, kak je minjene měsacy dožiwiła a što ma předwidźane.
Hnydom wjacore kulowate róčnicy swjeća lětsa na sewjero-čěskm hnadownym městnje. Najebać zymskeho wjedra je mnoho wěriwych na swjatočnu Božu mšu rano w štyrjoch z Litoměřicskim biskopom Stanislavom Přibylom přišło.
Na wuspěšne předstajenja pasionskeje hry su organizatorojo a sobuskutkowacy w Chrósćicach zhladowali. Woni běchu na dźakny swjedźeń prošeni.
Pod hesłom „Zhromadnje po puću“ steji putniska jězba do Israela, kotraž wotměje so wot póndźele do póndźele, 2. do 9. nowembra. Přewodźeć budu ju cistercienski pater dr. Johannes Müller a Enrico Scholze z Hellendorfa. Jězbu poskića zhromadnje z pućowanskim běrowom Scuba-Reisen ze Stuttgarta. Přizjewjenja su hač do pjatka, 7. awgusta, móžne. Ličba městnow je wobmjezowana.
Projekt Lipšćanskeje uniwersity „Wobydlerjo činja žurnalizm“ přeprošuje wosoby wot 18 lět ze Sakskeje, so z wobydlerskim žurnalistom stać a wo temach ze swojeho regiona rozprawjeć, wo kotrychž hewak nichtó njerěči. Wobdźělenje je darmotne, nježada sej žane předznajomosće a ma so derje z powołanjom a swójbu zjednoćić dać. Zajimcy měli so hač do soboty, 28. februara, z mejlku na buergerjournalismus@uni-leipzig.de přizjewić. Ličba městnow je wobmjezowana. – wjace
Ambulantna hospicna słužba Hornjołužiskeho zwjazka Carity z.t. w Kamjencu poskićuje lětsa zaso kurs k čestnohamtskemu přewodźenju ćežkochorych a mrějacych. Za to trěbnu wědu posrědkuja w zakładnym kursu, kotryž wotměje so wot 4. měrca hač do 18. apryla trójce srjedu wot 17.00 do 20.00 hodź. kaž tež trójce sobotu wot 9.00 do 15.00 hodź. Na to sćěhuje dohromady 20hodźinski praktikum z dalšimi štyrjomi zetkanjemi. Pohłubšacy kurs je w septembru planowany. Štóž chcył wukubłanje absolwować, měł so pola hospicneje słužby Carity w Kamjencu pod telefonowym čisłom (0 35 78) 37 43 12 abo z mejlku na hospiz@caritas-oberlausitz.de přizjewić. Flajer z dalšimi informacijemi a terminami je pod www.posol.de podaty.
Seminar k přihotej na sakrament mandźelstwa wotměje so pjatk a sobotu, 27. a 28. februara, w Smochčanskim kubłanišću swjateho Bena. Přizjewjenja su online móžne.
Dr. Lubina Malinkowa z Rakec přednošuje sobotu, 24. januara, w putniskej hospodźe Moniki Gerdesoweje w Chrósćicach wo serbskim putniku Jurju Wawriku, kotryž poda so w 19. lětstotku z Kanec do Roma. Započatk je w 19.45 hodź. Hižo popołdnju w 16.00 hodź. su dźěći na serbske kino witane.
Serbska protyka
