Katolski Posoł – 25. januara 2026
Wo swětle a sćinje rozmysluje awtor w swojim zawodnym nastawku. Mjez druhim wón wuwjedźe, što čłowjekej orientaciju skića a w kotrym swětle móže swět spóznać a sebje widźeć.
Na aktualnje přesćěhanych křesćanow skedźbni swjedźenski prědar na swjateho Bosćana w Chrósćicach. Ewangelski Němc rozłoži na zhromadźiznje bratstwa swjateho Bosćana swój přistup ke katolskemu hnadownemu městnu w Serbach.
Serbske spěwne ćěleso zhladowaše na swojej hłownej zhromadźiznje na minjene lěto. Zdobom zhonichu čłonojo wo lětušich předewzaćach a wo Serbje, kotryž je so w 19. lětstotku na wjace hač 1.600 kilometrow dołhe pěše putnikowanje podał.
Hdźe bydli Bóh? Tutomu prašenju a knihomaj ameriskeho wědomostnika, kotryž so jako ateist wuznawaše, wěnuje so serbski ewangelski duchowny w swojim rozmyslowanju.
Sewjeročěske putniske městno steješe w Katolskim Posole před sto lětami hnydom we wjacorych přinoškach w srjedźišću, kaž awtorka rubriki zwěsća. Ale tež městnosć dźensnišeho Smochčanskeho kubłanišća swjateho Bena běše jedna z temow.
W Don Boskowym domje we Worklecach wotmě so prěnje zarjadowanje noweho rjadu k swójbnym ritualam w běhu lěta. W druhim dźělu popołdnja móžachu wobdźělnicy tež kreatiwni być.
Wo nowolětnymaj překwapjenkomaj pisataj Hańžka a Feliks na stronje za młodych čitarjow. Nimo toho steji tónraz woznam njedźele w srjedźišću tematiskeje strony.
„7 tydźenjow połni hódnoty“ je tema lětušeje póstneje akcije Dźěłoweho zhromadźenstwa za katolske swójbne kubłanje (AKF) za pory a swójby. Nimo toho předleži tež wersija za swójby z dźěćimi w zakładnošulskej starobje. Tydźenske tekstowe impulsy maja k rozmyslowanju a wzajomnej wuměnje myslow přeprosyć kaž tež k změnje perspektiwy pohnuwać. Tak dóstanu wobdźělnicy ke kóždej temje darmotnje kóždy tydźeń list – z póštu, z mejlku abo z linkom na šmóratko. Za to měli so hač do njedźele, 8. februara, přizjewić.
Sydom bibliskich žonow, kotrež su so Jězusa dótknyli, steja w srjedźišću wosebiteho zešiwka „Jězusa znowa zetkać“ nakładnistwa Stiftung Christliche Medien kaž tež křesćanskeju časopisow LYDIA a JOYCE. Zešiwk je za jednotliwcow, ale tež za swójbne kružki, wosadne skupiny abo modlerske iniciatiwy mysleny a wobsahuje 40 impulsow za póstny čas. W Drježdźansko-Mišnjanskim biskopstwje poskićuja k tomu tež dobrowólnu digitalnu wuměnu přez platformu Zoom po pjeć srjedach w februaru a měrcu. Za to proša zamołwići wo přizjewjenje hač do njedźele, 8. februara. Informaciske zarjadowanje k tomu budźe srjedu, 4. februara, w 20.00 hodź. tohorunja přez Zoom.
Drježdźansko-Mišnjanske biskopstwo přeprošuje wšěch, kotřiž čestnohamtsce w chórach spěwaja, je nawjeduja, w cyrkwi kantorja, abo na instrumentach hraja respektiwnje chcedźa to přichodnje rady činić, na dalekubłanje. Wone budźe wot pjatka, 27. februara, do njedźele, 1. měrca, w Smochčanskim kubłanišću swjateho Bena. Za to měli so do toho přizjewić.
Pod hesłom „Zhromadnje po puću“ steji putniska jězba do Israela, kotraž wotměje so wot póndźele do póndźele, 2. do 9. nowembra. Přewodźeć budu ju cistercienski pater dr. Johannes Müller a Enrico Scholze z Hellendorfa. Jězbu poskića zhromadnje z pućowanskim běrowom Scuba-Reisen ze Stuttgarta. Přizjewjenja su hač do pjatka, 7. awgusta, móžne. Ličba městnow je wobmjezowana.
Projekt Lipšćanskeje uniwersity „Wobydlerjo činja žurnalizm“ přeprošuje wosoby wot 18 lět ze Sakskeje, so z wobydlerskim žurnalistom stać a wo temach ze swojeho regiona rozprawjeć, wo kotrychž hewak nichtó njerěči. Wobdźělenje je darmotne, nježada sej žane předznajomosće a ma so derje z powołanjom a swójbu zjednoćić dać. Zajimcy měli so hač do soboty, 28. februara, z mejlku na buergerjournalismus@uni-leipzig.de přizjewić. Ličba městnow je wobmjezowana. – wjace
Ambulantna hospicna słužba Hornjołužiskeho zwjazka Carity z.t. w Kamjencu poskićuje lětsa zaso kurs k čestnohamtskemu přewodźenju ćežkochorych a mrějacych. Za to trěbnu wědu posrědkuja w zakładnym kursu, kotryž wotměje so wot 4. měrca hač do 18. apryla trójce srjedu wot 17.00 do 20.00 hodź. kaž tež trójce sobotu wot 9.00 do 15.00 hodź. Na to sćěhuje dohromady 20hodźinski praktikum z dalšimi štyrjomi zetkanjemi. Pohłubšacy kurs je w septembru planowany. Štóž chcył wukubłanje absolwować, měł so pola hospicneje słužby Carity w Kamjencu pod telefonowym čisłom (0 35 78) 37 43 12 abo z mejlku na hospiz@caritas-oberlausitz.de přizjewić. Flajer z dalšimi informacijemi a terminami je pod www.posol.de podaty.
Seminar k přihotej na sakrament mandźelstwa wotměje so pjatk a sobotu, 27. a 28. februara, w Smochčanskim kubłanišću swjateho Bena. Přizjewjenja su online móžne.
Serbska protyka
