Katolski Posoł – 8. februara 2026
Wo znamjenjomaj, kotrejž stejitej w srjedźišću ewangelija tuteje njedźele, rozmysluje awtor w swojim zawodnym nastawku. Mjez druhim wón wuwjedźe, kak zamóže jej čłowjek na cyle praktiske wašnje zeskutkownić.
Za wuhotowanje lońšeho kongresa Europasion bu Towarstwo Cyrila a Metoda z.t. z wosebitej medalju wuznamjenjene. Z tym bu wone jako wuznamny nošer europskich hódnotow počesćene.
Zakładnemu prašenju žiwjenja wěnowaše so Zhorjelski biskop Wolfgang Ipolt na Božej mši w Radworju. Wón swjećeše ju zhromadnje z dźewjeć koncelebrantami na wopomnjenskim dnju zbóžneho serbskeho martrarja.
Wo jednorych wšědnych zetkanjach, ale tež wutrobnych dopóznaćach rozprawja Alena Bětnarjec w dalšim dźělu swojeje serije. Mjez druhim pisa wona wo lekciji dźakownosće, kotruž dósta při přebytku w Keniji.
Přewažnje z lětušimi zarjadowanjemi za serbskich młodostnych je so dekanatny kružk na swojim schadźowanju we Worklecach zaběrał. Po tym požohnowa serbski duchowny rumnosće Don Boskoweho domu. Dźeń wuklinča z dźěłarničku, na kotrejž zeznachu wobdźělnicy wosebitu techniku sukanja a ju tež wuspytachu.
Bamž Leo XIV. je noweho Praskeho arcybiskopa a zdobom primasa Čěskeje pomjenował. Tón njeje Serbam njeznaty.
Wothorjeka a wotdeleka su sej družki a chorhojnicy farskeje wikarije w Pančicach-Kukowje hornjołužiske město wotkryli. Při tym zbližichu sej tu abo tamnu njenapadnu zajimawostku a słyšachu někotryžkuli powědku.
W Smochčanskim kubłanišću swjateho Bena wotměje so tež lětsa ekumeniski póstny seminar. Po štyrjoch póndźelach wěnuja so referenća tónraz temje „Najebać wšeho … za cyrkej rady skutkować“.
Předsydstwo Towarstwa Cyrila a Metoda z.t. (TCM) přeprošuje wšitkich čłonow towarstwa, čłonow sekcijow a korporacijow na swoju hłownu zhromadźiznu, kotraž budźe wutoru, 24. februara, w Baćonju. Započatk je z Božej mšu we 18.00 hodź. we wosadnej cyrkwi.
„Zaškleńčna mólba“ je hesło prózdninskeho poskitka za zajimcow wot sydom lět, kotryž wotměje so wutoru, 10. februara, wot 10.00 do 12.30 hodź. w Budyskim Serbskim muzeju. Krok po kroku nałožuja wosebitu wuměłsku techniku, tak zo nastanje na škleńcy a nic na łopjenu hotowa molowanka. Za wudawki zběraja přinošk we wysokosći 6,50 eurow. Štóž chcył so wobdźělić, měł so za to zwjazowace přizjewić, telefonowe čisło (0 35 91) 2 70 87 00.
Tradicije Serbow a jich dźensniše žiwjenje steja w srjedźišću dalšeho zarjadowanja w rjedźe „Přijomnosć & kultura“ w klóšterskej kofejowni swjateho Michała w Pančicach-Kukowje. Wone wotměje so sobotu, 21. februara. Započatk je w 17.00 hodź. Referent budźe předsyda Domowiny Dawid Statnik. Zastupne lisćiki za płaćiznu 30 eurow dóstanu zajimcy jeničce w předpředani w klóšterskej pjekarni kaž tež kofejowni swjateho Michała, telefonowe čisło (03 57 96) 9 94 43.
Na tři jězby do Erfurta, sewjerneje Němskeje a Awstriskeje přeprošuje Radworske Šmitec-Schwarzec wozydłownistwo lětsa w běhu lěta. Nadrobniše informacije nańdu zajimcy w Powšitkownych wozjewjenjach.
„7 tydźenjow połni hódnoty“ je tema lětušeje póstneje akcije Dźěłoweho zhromadźenstwa za katolske swójbne kubłanje (AKF) za pory a swójby. Nimo toho předleži tež wersija za swójby z dźěćimi w zakładnošulskej starobje. Tydźenske tekstowe impulsy maja k rozmyslowanju a wzajomnej wuměnje myslow přeprosyć kaž tež k změnje perspektiwy pohnuwać. Tak dóstanu wobdźělnicy ke kóždej temje darmotnje kóždy tydźeń list – z póštu, z mejlku abo z linkom na šmóratko. Za to měli so hač do njedźele, 8. februara, přizjewić.
Sydom bibliskich žonow, kotrež su so Jězusa dótknyli, steja w srjedźišću wosebiteho zešiwka „Jězusa znowa zetkać“ nakładnistwa Stiftung Christliche Medien kaž tež křesćanskeju časopisow LYDIA a JOYCE. Zešiwk je za jednotliwcow, ale tež za swójbne kružki, wosadne skupiny abo modlerske iniciatiwy mysleny a wobsahuje 40 impulsow za póstny čas. W Drježdźansko-Mišnjanskim biskopstwje poskićuja k tomu tež dobrowólnu digitalnu wuměnu přez platformu Zoom po pjeć srjedach w februaru a měrcu. Za to proša zamołwići wo přizjewjenje hač do njedźele, 8. februara.
Drježdźansko-Mišnjanske biskopstwo přeprošuje wšěch, kotřiž čestnohamtsce w chórach spěwaja, je nawjeduja, w cyrkwi kantorja, abo na instrumentach hraja respektiwnje chcedźa to přichodnje rady činić, na dalekubłanje. Wone budźe wot pjatka, 27. februara, do njedźele, 1. měrca, w Smochčanskim kubłanišću swjateho Bena. Za to měli so do toho přizjewić.
Pod hesłom „Zhromadnje po puću“ steji putniska jězba do Israela, kotraž wotměje so wot póndźele do póndźele, 2. do 9. nowembra. Přewodźeć budu ju cistercienski pater dr. Johannes Müller a Enrico Scholze z Hellendorfa. Jězbu poskića zhromadnje z pućowanskim běrowom Scuba-Reisen ze Stuttgarta. Přizjewjenja su hač do pjatka, 7. awgusta, móžne. Ličba městnow je wobmjezowana.
Projekt Lipšćanskeje uniwersity „Wobydlerjo činja žurnalizm“ přeprošuje wosoby wot 18 lět ze Sakskeje, so z wobydlerskim žurnalistom stać a wo temach ze swojeho regiona rozprawjeć, wo kotrychž hewak nichtó njerěči. Wobdźělenje je darmotne, nježada sej žane předznajomosće a ma so derje z powołanjom a swójbu zjednoćić dać. Zajimcy měli so hač do soboty, 28. februara, z mejlku na buergerjournalismus@uni-leipzig.de přizjewić. Ličba městnow je wobmjezowana. – wjace
Ambulantna hospicna słužba Hornjołužiskeho zwjazka Carity z.t. w Kamjencu poskićuje lětsa zaso kurs k čestnohamtskemu přewodźenju ćežkochorych a mrějacych. Za to trěbnu wědu posrědkuja w zakładnym kursu, kotryž wotměje so wot 4. měrca hač do 18. apryla trójce srjedu wot 17.00 do 20.00 hodź. kaž tež trójce sobotu wot 9.00 do 15.00 hodź. Na to sćěhuje dohromady 20hodźinski praktikum z dalšimi štyrjomi zetkanjemi. Pohłubšacy kurs je w septembru planowany. Štóž chcył wukubłanje absolwować, měł so pola hospicneje słužby Carity w Kamjencu pod telefonowym čisłom (0 35 78) 37 43 12 abo z mejlku na hospiz@caritas-oberlausitz.de přizjewić. Flajer z dalšimi informacijemi a terminami je pod www.posol.de podaty.
Seminar k přihotej na sakrament mandźelstwa wotměje so pjatk a sobotu, 27. a 28. februara, w Smochčanskim kubłanišću swjateho Bena. Přizjewjenja su online móžne.
Serbska protyka
