powšitkowne POSKITKI
W aktualnym wudaću nańdźeće mjez druhim tole:
Wo „Złotej sekwency“ pisa awtor zawodneho nastawka. Wón poruča někomu skutkować dać, štož k tomu wjedźe, zo móhło žiwjenje snano trochu mjenje přijomne, za to pak napjelnjeniše być.
W Krupce swjećachu serbscy młodostni z jich duchownym přewodnikom a dalšimi měšnikami Božu mšu. Mnozy druzy putnicy běchu so tohorunja tam podali.
Ekonom Drježdźansko-Mišnjanskeho biskopstwa, ordinariatny rada Kyrill swobodny knjez von Twickel, je njejapcy 58lětny zemrěł. Chowanje je w jeho Münsterskej domiznje. W Drježdźanskej katedrali budźe emeritowany biskop Joachim Reinelt srjedu, 10. awgusta, we 18 hodź. rekwiem za njeho swjećić.
Mladifest je za bamža Franciskusa přeprošenje, „z Bohom lětni dowol činić na najbóle wosebitym městnje, kotrež maće – we wašej swójskej wutrobje“. Na mjezynarodnym zetkanju w Medźugorju so tež wosom serbskich młodych ludźi wobdźěli. –
Njebjeskeho kralestwa dla so měšnicy a rjadnicy njezmandźela. Před tysac lětami bu zakład za winowatostny celibat połoženy.
Dwě diecezy je biskop Christian Schreiber na jeju spočatku nawjedował: Mišnjansku a Berlinsku. Mjez Serbami je dopomnjeće na njeho zaćěmnjene. Wón je so 3. awgusta před 150 lětami w Hessenskej narodźił.
Wo pućowanju jeansowych cholowow ze značku „Made in Germany“ po wjacorych krajach su dźěći na nabožnym tydźenju w Njebjelčicach zhonili. Nimo toho móžachu tójšto wuspytać a dožiwić.
Kubłanske dny serbskeje młodźiny wotměja so wot pjatka do njedźele, 23. do 25. septembra. w Schmiedebergskim Winfriedowym domje. Zajimcy měli so hač do póndźele, 5. septembra, online přizjewić.
Dekanatne dušepastyrstwo młodźiny přeprošuje młodostnych ze wšěch serbskich wosadow na zhromadny wulět do Błótow, a to njedźelu, 11. septembra. Přizjewjenja přijimuja so hač do póndźele, 29. awgusta.
Smochčanske kubłanišćo swjateho Bena přeprošuje wot pjatka do njedźele, 14. do 16. oktobra, na tworjacy kurs „Bibliske powědace figury“. Při tym dźe wo bibliske powědace figury, kotrež mnohostronske gesty zwuraznjeja a so lochce do druheje postawy přetworić móža. Přeprošeni su ludźo kóždeježkuli staroby.
Serbske ewangelske towarstwo a Maćijec swójba z Hrubjelčic přeprošujetej wšitkich Serbow a dalšich zajimcow na lětnje pućowanje a serbski swjedźeń. Wonej wotmějetej so sobotu, 3. septembra, wot 14.00 hodź.
W Kulowje zhladuje tamniše Arcybratstwo swjateho róžowca lětsa na 350. róčnicu swojeho załoženja. Składnostnje tutoho jubileja ma wustajeńca nastać, za kotruž móža wěriwi wosebite róžowcy abo napisane wosobinske nazhonjenja z modlenjom róžowca na tamnišej farje wotedać.
Serbska protyka
