Katolski Posoł – 28. junija 2026
Drježdźansko-Mišnjanske biskopstwo swjeći lětsa 275. róčnicu wobstaća Dwórskeje cyrkwje. Kotre wuwiće Boži dom po reformaciji nazhoni, wo tym pisa duchowny w zawodnym nastawku.
We Wutołčicach je serbski duchowny ponowjeny swjaty křiž poswjećił. K toho postajenju wjedźeše wosebity dóńt.
We Wilnje bydlacy duchowny, kiž je někotre lěta tež we Łužicy skutkował, woswjeći njedawno swoje 80. narodniny. Poprawom wšak chcyše wón hinaše powołanje nawuknyć, a tež puć do Litawskej njeběše zwoprědka planowany.
Najebać horcoty je tójšto swójbow klóšterski a swójbny swjedźeń Budyskeho wokrjesa w klóštrje Marijinej hwězdźe wopytało. Na wšelakich stacijach móžachu so młodźi a stari cyły dźeń zabawjeć.
Pjeć nowych ministrantow buchu w Njebjelčicach za słužbu při wołtarju přiwzaći. Za financowanje ministrantskeho wulěta su po dopołdnišich kemšach něšto wuhotowali.
Wo ćežkich njewjedrach, škodach błyskow a zahubnych powodźenjach rozprawješe Katolski Posoł před sto lětami, kaž awtorka rubriki zwěsći. Zdobom skedźbnichu na konflikt mjez katolskej cyrkwju a serbskim narodnym hibanjom, wosebje w zwisku ze zarjadowanjemi čěsko-słowakskeho ćěłozwučowanskeho towarstwa „Sokoł“.
W Kulowje bu Maximilian Mattner njedawno na diakona wuswjećeny. Na swojim puću je so z konkretnym prašenjom rozestajał.
W Ralbicach je farar Šćěpan Delan nowy nabožny kamjeń poswjećił. Wosebite elementy w kamjenju zjednoćeja modlitwu, dźakownosć a dowěru.
Nošenje postawy swjateje Marije w Radworju před wjace hač sto lětami bě dokładnje rjadowane. Kotre žadanja dyrbjachu družki spjelnić, to cituje awtor z historiskeho žórła.
Towarstwo Cyrila a Metoda z.t. chce ze swojej akciju „Łužica pomha“ towarstwo Domus w Rumunskej podpěrać. Awtorka přinoška pěstuje wuske styki k towarstwu, kotrež twari w Rumunskej bydlenja za syroty.
Ewangelske nabožne wusyłanje w Serbskim rozhłosu MDR ma tutu njedźelu, 28. junija, Serbski superintendent Krystof Rummel z Hodźija.
Chór Lipa pod nawodom Jadwigi Kaulfürstoweje je proby za nowy serbski duchowny oratorij z titulom „Znamjenja a dźiwy Jězusa“ zahajił. Hudźbu za chór a orchester je Feliks Brojer skomponował, tekst napisa Fabian Kaulfürst. Planowanej stej dwě předstajeni w Chróšćanskej wosadnej cyrkwi, a to sobotu a njedźelu, 17. a 18. apryla 2027. Nadrobniše informacije so hišće wozjewja.
Składnostnje 275. róčnicy wobstaća něhdyšeje Dwórskeje cyrkwje budźe tam pontifikalna Boža mša z biskopom Heinrichom Timmereversom njedźelu, 28. junija, w 10.00 hodź. Kemše přez livestream přenjesu a tež sćelak MDR ju w rozhłosu originalnje wusyła.
Na swjedźensku Božu mšu składnostnje patronata tamnišeje putniskeje cyrkwje Marije wopytanja su wěriwi do čěskich Hejnic přeprošeni. Hłowny celebrant Božeje mšě tutu njedźelu, 28. junija, w 10.00 hodź. je benediktinski abt Patrick Schöder z awstriskeho klóštra Göttweig.
Kedźbu! Lětni koncert chóra Meja
njedźelu, 28. junija,
w 16.00 hodź. na farskej zahrodźe
njebudźe.
Słowjanske styki steja w srjedźišću wosebiteho wodźenja w Budyskim Serbskim muzeju. Wone je tutu njedźelu, 28. junija, w 16.00 hodź. w němskej a w 17.00 hodź. w serbskej rěči. Dr. Jędrzej Soliński, pokazuje a rozłožuje wubrane dokumenty kulturneje a wědomostneje wuměny.
Drježdźanscy kapałnicy wuhotuja njedźelu, 28. junija, na předwječoru patronatneho dnja Budyskeje tachantskeje cyrkwje swjateho Pětra, we 18.00 hodź. w Božim domje nyšpor duchowneje hudźby. Tež póndźelu, 29. junija, na swjedźenju swjateju japoštołow Pětra a Pawoła, budźe na samsnym městnje pontifikalna Boža mša w 9.00 hodź., kotruž Drježdźanscy kapałnicy wobrubja. Pod nawodom katedralneho kapałneho mištra Christiana J. Bonatha zaklinča wjacehłósne twórby wšelakich epochow. Wšitcy zajimcy su wutrobnje přeprošeni.
Dnjowa hladarnja Carity „Při Krabatowym puću“ we Worklecach woswjeći sobotu, 4. julija, swoje pjećlětne wobstaće. To chce z hosćimi před domom hladarnje Při zelenišćach 5 činić, hdźež zahudźi wot 16.00 hodź. dujerska kapała Horjany. Wot 19.00 hodź. přewjedźe spěwny kwartet „PoŠtyrjoch“ zjawnu probu. Ćělne derjeměće budźe zaručene.
Na modlenje róžowca a před Najswjećišim su wěriwi sobotu, 4. julija, we 18.00 hodź. do Róžeńčanskeje hnadowneje cyrkwje přeprošeni. Paćerje budu w serbskej a němskej rěči spěwane.
Serbska dekanatna młodźina je tež lětsa na zhromadny wulět přeprošena, kotryž budźe njedźelu, 13. septembra. Přeprošeni su tohorunja młodostni wot přichodneho 9. lětnika. Planowane je z busom do Sprjowjow (Sprey) pola Hamora jěć, hdźež budźe zhromadny nyšpor w tamnišej cyrkwi. Přizamknje so čołmikowanje z Čelna do Noweho města/Sprjewja. Tam wulět z grilowanjom wuklinči. Wotjězd busow budźe w 12.00 hodź., mjez druhim z Kulowa kaž tež Chrósćic a potom wotpowědnje přizjewjenjow po wsach. Młodostni nawróća so wokoło 19.30 hodź. Přinošk wučinja na wobdźělnika 25,00 eurow, čłonojo serbskeho dekanatneho kružka kaž tež wobsedźerjo karty JULEICA płaća pjeć eurow. Zajimcy měli so hač do póndźele, 10. awgusta, online přizjewić.
Za koho abo što sym poprawom w žiwjenju po puću? Z tutym prašenjom, ale tež ze swójskim pytanjom za žiwjenskimi slědami móža so zajimče na zhromadnych dnjach za žony zaběrać, na kotrež přeprošuje DrježdźanskoMišnjanske biskopstwo. Wone budu wot pjatka do njedźele, 4. do 6. septembra, w swójbnym a dowolowym domje swjateje Wórše w Struppenje w Sakskej Šwicy.
W sewjeročěskim Vilémovje (Wölmsdorf) spominaja lětsa na 300. róčnicu poswjećenja tamnišeje cyrkwje Marije donjebjeswzaća. Tole kaž tež 200lětne wobstaće putnikowanja k swjatnicy, kiž měješe sčasami wobšěrny serbski podźěl, chcedźa na swjedźenju Marije donjebjeswzaća, sobotu, 15. awgusta, wopominać. Wosebje Łužiscy Serbja su na to wutrobnje přeprošeni.
Serbska protyka
