Katolski Posoł – 8. septembra 2024
Wo kralestwje, kotryž křesćenjo wočakuja, pisa awtor w swojim zawodnym nastawku. Mjez druhim wón zwuraznja, što je wučinja a bjeze čeho njemóžeš wosobu Jězusa zrozumić.
Na Budyskim židowskim pohrjebnišću su so mnozy prěnju septembersku njedźelu jednu z najwažnišich modlitwow w židowstwje modlili. Přitomny běše tohorunja kantor Praskeje židowskeje wosady.
W maćernym domje šulskich sotrow Našeje lubeje knjenje w Auerbachu w Hornjej Pfalcy buštej kónc awgusta postulantce zadrasćenej. Jedna z njeju je Serbowka.
Nowy swjaty křiž na starodawnym městnje je swójba w Dubrjenku postajić dała. W přitomnosći mnoho wěriwych je jón serbski duchowny nětko poswjećił.
W Radworju ma so w oktobrje zhromadźenstwo wozrodźić, kotrež tam w prěnjej połojcy 20. lětstotka hižo raz mějachu. Čłonojo pak njepochadźachu tehdy jeničce z tamnišeje wosady, kaž serbski duchowny zwěsći.
Wo najstaršim křižerskim nowačku, najkrótšim zastojnstwje a najprominentnišim wobydlerju rozprawješe serbski žurnalist swójbam a dalšim zajimcam w Radworju. Sekcija Swójba Towarstwa Cyrila a Metoda běše na zhromadne popołdnjo přeprosyła.
W Chrósćicach je kruh wosadneje młodźiny rozrostł. Po Božej mši prěnju septembersku njedźelu, na kotrejž buchu nowi młodostni přiwzaći, podachu so wšitcy na zhromadny wulět.
We wsy blisko Radworja zhladowachu tamniši wobydlerjo a hosćo na pjeć lětstotkow jeje wobstaća. Mjez druhim swjećachu ekumenisku Božu słužbu.
Wo lóštnych hrónčkach w zwisku z wjedrom, w kotrychž hdys a hdys tež swjeći rólu hraja, pisataj Hańžka a Feliks. Zdobom zeznaja dźěći někotre wuznamne žony w stawiznach cyrkwje, na kotrež cyrkej w septembru spomina.
Dekanatne dušepastyrstwo za dźěći přeprošuje šulerki a šulerjow 1. a 2. lětnika na zhromadny dźeń pod hesłom „Jězus mój přećel“, kotryž wotměje so w nazymskich prózdninach w Don Boskowym domje we Worklecach. Wupytać móža sej, hač so štwórtk, 10. oktobra abo 17. oktobra, wot 9.00 do 15.00 hodź. wobdźěla. Přizjewić měli so zajimcy hač do pjatka, 4. oktobra, online.
Kapałkowe towarstwo we Worklecach přeprošuje wšitkich zajimcow, sej tamnišu kapałku wobhladać, a to na Dnju wotewrjeneho pomnika njedźelu, 8. septembra, wot 14.00 hodź. Na krótkich wodźenjach zhonja to a tamne wo jeje stawiznach. W 17.00 hodź. budźe w kapałce tohorunja nyšpor.
Samsny dźeń móža sej zajimcy w 14.00 a 15.00 hodź. tež Smochčanske kubłanišćo swjateho Bena we wobłuku wodźenja wotkryć. W tamnišej bróžni budźe zdobom přiležnosć k rozmołwje při kofeju a tykancu.
Chór 1. serbskeje kulturneje brigady wuhotuje njedźelu, 15. septembra, w 17.00 hodź. nyšpor w formje duchowneho koncerta w Budyskej cyrkwi Našeje lubeje knjenje. Samsny koncert poskići chór njedźelu, 22. septembra, w 17.00 hodź. w Baćońskej cyrkwi.
Towarstwo Cyrila a Metoda z.t. (TCM), Sportowa jednotka 1922 Radwor kaž tež tamniši młodźinski klub přeprošuja sportowcow wšěch starobnych skupin wot šěsć lět na běh wo pokal zbóžneho Alojsa do Radworja. Tutón wotměje so štwórtk, 3. oktobra. Zajimcy měli so online přizjewić.
Ralbičanska wosadna rada so wo to stara, zo by móhł na zapokazanje kanonika Šćěpana Delana sobotu, 28. septembra, bus do čěskich Litoměřic jěć. Zajimcy měli so hač do soboty, 14. septembra, pak do lisćiny w interneće zapisać pak so wosobinsce pola Rafaela Ledźborja w Ralbicach přizjewić.
Orchester Serbskeho ludoweho ansambla (SLA) wuhotuje zhromadnje ze spěwnymi solistami a z organistom Tomašom Žurom „Portretowy koncert za Ulricha Pogodu & Tomaša Žura“. Prěni budźe sobotu, 7. septembra, w 19.00 hodź w Choćebuskim konserwatoriju, dalši njedźelu, 22. septembra, w 16.00 hodź. w Kulowskej cyrkwi Marije donjebjeswzaća.
Drježdźansko-Mišnjanske biskopstwo přeprošuje wěriwych we wobłuku Swjateho lěta na diecezanske putnikowanje z biskopom Heinrichom Timmereversom do Roma. Wone wotměje so wot soboty do soboty, 11. do 18. oktobra 2025.
Serbska protyka
