Katolski Posoł – 18. septembra 2022
Koho njeměli ženje z wočow zhubić a z čim njeměli so ženje stać, wo tym pisa awtor w swojim zawodnym nastawku. Poćahujo so na ewangelij tuteje njedźele wón rozłoži, na koho a što měł křesćan twarić a kak měł słužbu Bohu zrozumić.
Towarstwo Cyrila a Metoda z.t. (TCM), Sportowa jednotka 1922 Radwor kaž tež tamniši młodźinski klub přeprošuja sportowcow wšěch starobnych skupin wot šěsć lět na běh wo pokal zbóžneho Alojsa do Radworja. Tutón wotměje so póndźelu, 3. oktobra. Zajimcy měli so online přizjewić.
Bamž Franciskus wobdźěli so na kongresu swětowych nabožinow w Kazachstanje. W swojej narěči praji swjaty wótc mjez druhim, zo su „zrozumjenje, sćerpliwosć a dialog ze wšěmi trěbne“, zo by so stabilniši a měrniši swět natwarił.
Z wjacorymi reformowymi wobzamknjenjemi, ale tež njewočakowanym wuslědkom je so štwórta plenarna zhromadźizna Synodalneho puća w Frankfurće nad Mohanom skónčiła. Něhdźe 200 lajkow a biskopow zaběraše so ze zdźěla daloko sahacymi namjetami k změnjenju cyrkwinskeje wučby kaž tež cyrkwinskeho porjada.
Na jednu z najdrohotnišich modlitwow cyrkwje poćahowaše so serbski duchowny w swojim prědowanju na putniskich kemšach w Róžeńće. Z nimale wšěch serbskich wosadow běchu wěriwi na swjedźenju Marije naroda na hnadowne městno pěši putnikowali.
Směmy sej dowolić, zo z procesionom w ćmě ducy dale takle swojich wosadnych wohrožujemy? Tole praša so awtorka a poćahuje so na wječorne putnikowanje na swjedźenju Marije naroda. Zdobom namjetuje wona alternatiwje.
Schrödingerowy institut w Filipovje je spočatk septembra swoje dźesaćlětne wobstaće woswjećił. Božu mšu swjećeše Litoměřicski biskop Jan Baxant, kotryž je zdobom kmótřistwo instituta přewzał. Mjez hosćimi běštaj tež Serbaj.
Ekumeniska rada cyrkwjow je pozitiwnu bilancu swojeje plenarneje zhromadźizny w Karlsruhe sćahnyła. Mjez wobdźělnikami běše tež Serbowka. W interviewje powěda wona wo tym, kotre temy buchu rozjimane a kak je zetkanje dožiwiła.
Wjele chwalby a wjacemjeńšinski aplaws žněješe inscenacija „Mór a lubosć“ w Chrósćicach. Po dwójnym přestorčenju dožiwi hra lětsa skónčnje swoju premjeru. Poslednje předstajenje je njedźelu,
18. septembra, w 19.30 hodź.
Wjesołe hodźiny dožiwichu wobdźělnicy wulěta serbskeje dekanatneje młodźiny. Cil běchu lětsa Błóta, kotrež wotkrychu sej z kajakami. Dźeń wuklinča ze rejemi a spěwom w Hórkach.
Drježdźansko-Mišnjanske biskopstwo přeprošuje młodostnych a młodych dorosćenych wot 16 do 35 lět na swětowe zetkanje młodźiny do Lissabona. Serbska skupina budźe při tym dźěl diecezanskeje skupiny. Přizjewjenja přijimuja so hač do njedźele, 22. januara 2023, online.
Swoju premjeru změje nowa serbska spěwohra „Z TOBU – Bohu swjećene lěto“ pjatk, 21. oktobra, we 18 hodź. w Chróšćanskej wjacezaměrowej hali „Jednota“. Kartki za cyłkownje pjeć předstajenjow předawaja so pola časnikarja Jürgena Njeka w Chrósćicach abo online.
Před pozadkom wot bamža Franciskusa nastorčeneho Synodalneho procesa w swětowej cyrkwi wotměje so štwórtk, 29. septembra, mjezynarodna digitalna konferenca wo synodalnosći po wšěm swěće. Zajimcy měli so online přizjewić.
W Kulowje zhladuje tamniše Arcybratstwo swjateho róžowca lětsa na 350. róčnicu swojeho załoženja. Składnostnje tutoho jubileja ma wustajeńca nastać, za kotruž móža wěriwi wosebite róžowcy abo napisane wosobinske nazhonjenja z modlenjom róžowca na tamnišej farje wotedać.
Serbska protyka
